ନୂଆଦିଲ୍ଲୀ,୨୩/୧୨: ସୁପ୍ରିମକୋର୍ଟର ପୂର୍ବତନ ବିଚାରପତି ବି.ରାମାସୁବ୍ରମଣ୍ୟନଙ୍କୁ ଏନ୍‌ଏଚ୍‌ଆର୍‌ସିର ଅଧ୍ୟକ୍ଷ ଭାବେ ନିଯୁକ୍ତି ଦିଆଯାଇଛି। ରାଷ୍ଟ୍ରପତି ଦ୍ରୌପଦୀ ମୁର୍ମୁ ଏହି ନିଯୁକ୍ତି ଦେଇଛନ୍ତି। ମାନବିକ ଅଧିକାର ସୁରକ୍ଷା ଆଇନ, ୧୯୯୩ ଅନୁଯାୟୀ ଏହି ନିଯୁକ୍ତି ଦିଆଯାଇଛି। ଜଷ୍ଟିସ୍ ରାମସୁବ୍ରମଣ୍ୟନ୍ ଦାୟିତ୍ବ ଗ୍ରହଣ କରିବା ଦିନଠାରୁ NHRC ର ଅଧ୍ୟକ୍ଷ ପଦ ସମ୍ଭାଳିବେ। କେନ୍ଦ୍ର ସରକାରଙ୍କ ଦ୍ବାରା ପ୍ରଦତ୍ତ ଗ୍ୟାଜେଟ୍‌ରେ ଏହି ସୂଚନା ଦିଆଯାଇଛି।

ନିଯୁକ୍ତ କଲେ ରାଷ୍ଟ୍ରପତି:

ବିଜ୍ଞପ୍ତିରେ ଲେଖାଅଛି ଯେ, ' ମୁଁ ଭାରତର ରାଷ୍ଟ୍ରପତି, ଦ୍ରୌପଦୀ ମୂର୍ମୁ, ମାନବ ଅଧିକାର ସୁରକ୍ଷା ଆଇନ ୧୯୯୩ର ଧାରା ୪ ର ଉପଧାରା (୧) ଦ୍ବାରା ପ୍ରଦତ୍ତ କ୍ଷମତାର ପ୍ରୟୋଗ କରି ବିଚାରପତି ବି.ରାମାସୁବ୍ରମଣ୍ୟନ୍‌ (ଅବସରପ୍ରାପ୍ତ)ଙ୍କୁ ରାଷ୍ଟ୍ରୀୟ ମାନବାଧିକାର ଆୟୋଗର ଅଧ୍ୟକ୍ଷ ଭାବେ ନିଯୁକ୍ତ କରୁଛି, ଏହି ନିଯୁକ୍ତି ତାଙ୍କ ପଦ ଗ୍ରହଣ କରିବା ଦିନଠାରୁ ଲାଗୁ ହେବ।'

ଜଷ୍ଟିସ୍‌ ରମାସୁବ୍ରମଣ୍ୟନ୍ କିଏ?

ଜଷ୍ଟିସ୍ ବି ରାମାସୁବ୍ରମଣ୍ୟନ୍ ୩୦ ଜୁନ୍ ୧୯୫୮ ରେ ଜନ୍ମଗ୍ରହଣ କରିଥିଲେ। ସେ ଚେନ୍ନାଇର ରାମକୃଷ୍ଣ ମିଶନ ବିବେକାନନ୍ଦ କଲେଜରୁ ରସାୟନ ବିଜ୍ଞାନରେ ସ୍ନାତକ ହାସଲ କରିଥିଲେ ଏବଂ ମାଡ୍ରାସ ଆଇନ କଲେଜରୁ ଆଇନ ଅଧ୍ୟୟନ ସମାପ୍ତ କରିଥିଲେ। ସେ ୧୬ ଫେବୃଆରୀ ୧୯୮୩ ରେ ବାର୍‌ର ସଦସ୍ୟ ହୋଇଥିଲେ ଏବଂ ପ୍ରାୟ ୨୩ ବର୍ଷ ପର୍ଯ୍ୟନ୍ତ ମାଡ୍ରାସ ହାଇକୋର୍ଟରେ ଓକିଲାତି କରିଥିଲେ। ୩୧ ଜୁଲାଇ ୨୦୦୬ ରେ, ସେ ମାଡ୍ରାସ ହାଇକୋର୍ଟର ଅତିରିକ୍ତ ବିଚାରପତି ଭାବରେ ନିଯୁକ୍ତ ହୋଇଥିଲେ ଏବଂ ୯ ନଭେମ୍ବର ୨୦୦୯ ରେ ସ୍ଥାୟୀ ବିଚାରପତି ହୋଇଥିଲେ। ଏହା ପରେ, ୨୭ ଏପ୍ରିଲ ୨୦୧୬ ରେ ତାଙ୍କୁ ହାଇଦ୍ରାବାଦ ହାଇକୋର୍ଟକୁ ସ୍ଥାନାନ୍ତର କରାଯାଇଥିଲା। ସେ ତେଲେଙ୍ଗାନା ଏବଂ ଆନ୍ଧ୍ରପ୍ରଦେଶର ବିଚାରପତି ଥିଲେ। ୧ ଜାନୁଆରୀ ୨୦୧୯ ରେ ଆନ୍ଧ୍ରପ୍ରଦେଶ ହାଇକୋର୍ଟ ଗଠନ ପରେ ସେ ତେଲେଙ୍ଗାନା ହାଇକୋର୍ଟର ବିଚାରପତି ରହିଲେ।

୨୨ ଜୁନ୍ ୨୦୧୯ ରେ, ସେ ହିମାଚଳ ପ୍ରଦେଶ ହାଇକୋର୍ଟର ପ୍ରଧାନ ବିଚାରପତି ଭାବରେ ନିଯୁକ୍ତ ହୋଇଥିଲେ। ଏହି ବର୍ଷ ୨୩ ସେପ୍ଟେମ୍ବର ୨୦୧୯ ରେ ସେ ସୁପ୍ରିମକୋର୍ଟର ବିଚାରପତି ହୋଇଥିଲେ। ସୁପ୍ରିମକୋର୍ଟରେ ତାଙ୍କ କାର୍ଯ୍ୟକାଳ ମଧ୍ୟରେ ସେ ୧୦୨ ଟି ବିଚାର କରିଥିଲେ ଏବଂ ୨୯ ଜୁନ୍ ୨୦୨୩ ରେ ଅବସର ନେଇଥିଲେ। ଅବସର ପରେ ଏବେ ଜଷ୍ଟିସ ରାମାସୁବ୍ରମଣ୍ୟନ୍‌ଙ୍କୁ ଜାତୀୟ ମାନବ ଅଧିକାର ଆୟୋଗ (ଏନ୍‌ଏଚ୍‌ଆର୍‌ସି)ର ଅଧ୍ୟକ୍ଷ ଭାବରେ ନିଯୁକ୍ତ କରାଯାଇଛି।