ନୂଆଦିଲ୍ଲୀ,୨୩।୧୨: ସୁପରଷ୍ଟାର ଅଲ୍ଲୁ ଅର୍ଜୁନ ‘ପୁଷ୍ପା-୨ ଦ ରୁଲ୍’ ପାଇଁ ଲଗାତାର ଚର୍ଚ୍ଚାରେ ରହିଛନ୍ତି। ତେବେ ପ୍ରିମିୟର ବେଳେ ଘଟିଥିବା ଦଳାଚକଟା ଘଟଣା ପାଇଁ ବିବାଦ ତାଙ୍କ ପିଛା ଛାଡୁନି। ଏହି ଘଟଣାରେ ଜଣେ ମହିଳାଙ୍କ ମୃତ୍ୟୁ ହୋଇଥିଲା। ମାମଲାରେ ଅଲ୍ଲୁ ଅର୍ଜୁନଙ୍କୁ ଗୋଟିଏ ରାତି ମଧ୍ୟ ଜେଲ୍ରେ ରହିବାକୁ ପଡିଥିଲା। ଏହି ପ୍ରକରଣକୁ ନେଇ ତେଲେଙ୍ଗାନା ସିଏମ୍ ରେଭନ୍ତ ରେଡ୍ଡୀ ଅଭିନେତାଙ୍କୁ କଡା ସମାଲୋଚନା କରିଥିଲେ। ଏବେ ତେଲେଙ୍ଗାନାର ମନ୍ତ୍ରୀ ମୋଟିରେଡ୍ଡୀ ଭେଙ୍କଟ ରେଡ୍ଡୀ ଦାବି କରିଛନ୍ତି ଯେ, ଅଲ୍ଲୁ ଅର୍ଜୁନ ଫିଲ୍ମ ୨୦୦୦ କୋଟି କଲେକ୍ସନ କରିସାରିଲାଣି। ତେଣୁ ଅଲ୍ଲୁ ମହିଳାଙ୍କ ପରିବାରକୁ ୨୦ କୋଟି ଟଙ୍କାର କ୍ଷତିପୂରଣ ଦିଅନ୍ତୁ। ସେ ଏହା ମଧ୍ୟ କହିଛନ୍ତି ଯେ, ଅଭିନେତା ନିଜର କାମ ପାଇଁ ସରକାର ଓ ମୁଖ୍ୟମନ୍ତ୍ରୀଙ୍କୁ କ୍ଷମା ମାଗନ୍ତୁ।
ଏହି ଦୁଃଖଦ ଘଟଣା ୪ ଡିସେମ୍ବରରେ ଘଟିଥିଲା, ଯେତେବେଳେ ଅଲ୍ଲୁ ଅର୍ଜୁନ ନିଜ ଫିଲ୍ମ ‘ପୁଷ୍ପା ୨: ଦ ରୁଲ୍’ ର ପ୍ରିମିୟରେ ସାମିଲ ହେବାପରେ ହାଇଦ୍ରାବାଦର ସନ୍ଧ୍ୟା ଥିଏଟରରେ ପହଁଞ୍ଚିଥିଲେ। ସେ ନିଜର ଫ୍ୟାନ୍ଙ୍କ ସହ ହାତ ମିଳାଇବାକୁ ଆଗକୁ ଆସିବା ମାତ୍ରେ, ଆରମ୍ଭ ହୋଇଯାଇଥିଲା ଦଳାଚକଟା। ଏହି ଘଟଣାରେ ଜଣେ ମହିଳାଙ୍କର ମୃତ୍ୟୁ ହୋଇଛି। ଘଟଣାକୁ ନେଇ କିଛି ଲୋକ ରବିବାର ଅଲ୍ଲୁ ଅର୍ଜୁନଙ୍କ ଘର ବାହାରେ ଭଙ୍ଗାରୁଜା କରିଥିଲେ। ୮ ଅଭିଯୁକ୍ତଙ୍କ ଭିତରୁ ୬ ଜଣଙ୍କୁ ସୋମବାର ଜାମିନ୍ ମିଳିଯାଇଛି।
ପ୍ରେସ୍ ମିଟ୍ରେ କେମାଟିରେଡ୍ଡୀ ଅଭିନେତାଙ୍କ କାର୍ଯ୍ୟକୁ ସମାଲୋଚନା କରିଛନ୍ତି। ସେ କହିଛନ୍ତି, ପୂର୍ବ ଚେତାବନୀ ପରେ ମଧ୍ୟ ପ୍ରିମିୟରରେ ଅଲ୍ଲୁ ଅର୍ଜୁନଙ୍କ ଉପସ୍ଥିତି ଯୋଗୁଁ ଅଧିକ ଭିଡ ହୋଇଥିଲା। ଅଭିନେତାଙ୍କ ଆଚରଣ ବେପୁରୁଆ ଥିଲା। ପୋଲିସର ଚେତାବନୀ ପରେ ମଧ୍ୟ ସେ ଥିଏଟର ଭିତରେ ଥିଲେ। ଏହି ଘଟଣାରେ ରେବତୀ ନାମକ ଜଣେ ମହିଳାଙ୍କ ମୃତ୍ୟୁ ହୋଇଛି। ତାଙ୍କର ନାବାଳକ ପୁଅ ଶ୍ରୀଜିତ ମଧ୍ୟ ଗୁରୁତର ଅବସ୍ଥାରେ ଚିକିତ୍ସିତ ହେଉଛନ୍ତି।
