ନୂଆଦିଲ୍ଲୀ,୧୭।୧୦: ବାଂଲାଦେଶରେ କ୍ଷମତା ପରିବର୍ତ୍ତନ ଓ ରକ୍ତାକ୍ତ ସଂଘର୍ଷ ପରେ ଦେଶ ଛାଡି ଦେଇଛନ୍ତି ପୂର୍ବତନ ପ୍ରଧାନମନ୍ତ୍ରୀ ଶେଖ୍ ହାସିନା। ଏବେ ସେ ଭାରତରେ ରହୁଛନ୍ତି। ହେଲେ ତାଙ୍କ ବିରୋଧରେ ଜାରି କରାଯାଇଛି ଗିରଫ ଓ୍ବାରେଣ୍ଟ। ସ୍ଥାନୀୟ ଗଣମାଧ୍ୟମର ସୂଚନା ଅନୁସାରେ, ବାଂଲାଦେଶର ଏକ କୋର୍ଟ ମାନବତା ବିରୋଧରେ ଅପରାଧ କରିଥିବା ନେଇ ଓ୍ବାରେଣ୍ଟ ଜାରି କରିଛି। ଶେଖ୍ ହସିନା ବାଂଲାଦେଶରୁ ହେଲିକପ୍ଟରରେ ଯାତ୍ରା କରି ଦେଶ ଛାଡିଥିଲେ ଓ ଦିଲ୍ଲୀ ସ୍ଥିତ ହିଣ୍ଡନ ଏୟାରବେସ୍ରେ ଓହ୍ଲାଇଥିଲେ। ଏହାପରେ ସେ ଭାରତରେ ହିଁ ରହୁଛନ୍ତି, କିନ୍ତୁ ସେ ରହୁଥିବା ସ୍ଥାନ ବିଷୟରେ କେହି ଜାଣି ନାହାନ୍ତି। ତାଙ୍କୁ କୌଣସି ସୁରକ୍ଷିତ ସ୍ଥାନରେ ରଖାଯାଇଛି।
ହସିନାଙ୍କ ବିରୋଧ କୋର୍ଟ ଅବମାନନା ମାମଲା ରୁଜୁ କରିଥିବା ଓକିଲ ମହମ୍ମଦ ତାଜୁଲ ଇସ୍ଲାମ କହିଛନ୍ତି, ଏହା ଖୁବ୍ ସ୍ମରଣୀୟ ଦିନ। ସେଭଳି ବାଂଲାଦେଶରେ ଆନ୍ଦୋଳନରେ ମୃତକଙ୍କ ପରିଜନ କହିଛନ୍ତି, ଏହା ଭଲ ଖବର। ଆମ ଆଶା କରୁଛୁ ଏବେ ଶେଖ ହସିନାଙ୍କ ବିରୋଧରେ ଟ୍ରାଏଲ ଆଗକୁ ବଢିବ ଓ ଆମକୁ ନ୍ୟାୟ ମିଳିବ। ଶେଖ ହସିନା ଗତ ୧୫ ବର୍ଷ ହେବ ବାଂଲାଦେଶର କ୍ଷମତାରେ ଥିଲେ। ତାଙ୍କ ଉପରେ ଅଭିଯୋଗ ରହିଛି ଯେ, ପିଏମ୍ ଥିବା ବେଳେ ତାଙ୍କ ଶାସନକାଳରେ ବଡ ପରିମାଣରେ ଲୋକଙ୍କୁ ଗିରଫ କରାଯାଇଥିଲା। ଏହାଛଡା ରାଜନୈତିକ ବିରୋଧିଙ୍କୁ ଖୋଜି ଖୋଜି ମାରିଥିଲେ।
ବାଂଲାଦେଶ ଇଣ୍ଟରନ୍ୟାସନାଲ କ୍ରାଇମ୍ସ ଟ୍ରିବୁନାଲ ମୁଖ୍ୟ ଅଧିବକ୍ତା ତାଜୁଲ ଇସ୍ଲାମ କହିଛନ୍ତି, ଶେଖ୍ ହସିନାଙ୍କୁ ୧୮ ନଭେମ୍ବରରେ କୋର୍ଟରେ ହାଜର ହେବାର ନିର୍ଦେଶ ଦିଆଯାଇଥିଲା। ଇସ୍ଲାମ କହିଛନ୍ତି, ଶେଖ ହାସିନା ସେହି ଲୋକଙ୍କର ନେତୃତ୍ବ ନେଉଥିଲେ ଯେଉଁମାନେ ଦେଶରେ ଜୁଲାଇରୁ ଅଗଷ୍ଟ ପର୍ଯ୍ୟନ୍ତ ହିଂସା ସୃଷ୍ଟି କରାଯାଇଥିଲା, ସେଥିରେ ଶତାଧିକ ଲୋକ ନିହତ ହୋଇଥିଲେ।’ କୋର୍ଟ ଶେଖ ହସିନାଙ୍କ ବ୍ୟତୀତ ତାଙ୍କ ପାର୍ଟି ଆବାମୀ ଲିଗ୍ର ମହାସଚିବ କାୟଦୁଲ କାଦରଙକୁ ମଧ୍ୟ ଗିରଫ କରିବା କଥା କହିଛନ୍ତି।ଦୁଇ ନେତାଙ୍କ ବ୍ୟତୀତ ୪୪ ଅନ୍ୟଙ୍କ ପାଇଁ ମଧ୍ୟ ଗିରଫ ଓ୍ବାରେଣ୍ଟ ଜାରି କରାଯାଇଛି।