ନୂଆଦିଲ୍ଲୀ,୧୮/୧୦: ଗତ ୪ ଦିନ ହେଲା ଭାରତର ବିଭିନ୍ନ ବିମାନରେ ବୋମା ରଖାଯାଇଥିବା ନେଇ ଧମକ ମିଳିବାରେ ଲାଗିଛି। ଆଜି ୧୫ ବିମାନକୁ ବୋମା ଧମକ ମିଳିଛି । ସେଥିରେ ଏୟାର ଇଣ୍ଡିଆର ୫ଟି ବିମାନ ରହିଛି । ସେଗୁଡିକ ହେଲା ମୁମ୍ବାଇଲଣ୍ଡନ (ଏଆଇ-୧୨୯), ଦିଲ୍ଲୀ-ନ୍ୟୁୟର୍କ ଜେଏଫକେ (ଏଆଇ-୧୧୯), ଚେନ୍ନାଇସିଙ୍ଗାପୁର ବିମାନ ଏବଂ ୨ଟି ଘରୋଇ ବିମାନ ରହିଛି । ସେହିଭଳି ଭିସ୍ତାରା ଓ ଇଣ୍ଡିଗୋର ୨ଟି ଲେଖାଏ ବିମାନକୁ ମଧ୍ୟ ବୋମା ଧମକ ମିଳିଛି । ଏୟାର ଇଣ୍ଡିଆ ଏକ୍ସପ୍ରେସର ୬ଟି ବିମାନକୁ ବୋମା ଧମକ ଦିଆଯାଇଥିବା ସୂଚନା ମିଳିଛି । ସୋସିଆଲ ମିଡିଆରେ ଏହି ଧମକ ଦିଆଯାଇଛି । ଏହାକୁ ମିଶାଇ ଗତ ସୋମବାର ଠାରୁ ପ୍ରାୟ ୪୦ଟି ବିମାନକୁ ବୋମା ଧମକ ମିଳିସାରିଲାଣି । ନ୍ୟୁୟର୍କ ଓ ସିଙ୍ଗାପୁର ବିମାନ ବିନା ବାଧାରେ ଲ୍ୟାଣ୍ଡିଂ କରିଥିବା ବେଳେ ଲଣ୍ଡନ ବିମାନକୁ କିଛି ସମୟ ଆକାଶରେ ଚକ୍କର କାଟିବାକୁ ପଡିଥିଲା । 

ତେବେ ବ୍ରିଟେନ ସରକାରଙ୍କ ଠାରୁ ସ୍ପଷ୍ଟ ଅନୁମତି ମିଳିବା ପରେ ଏହାକୁ ହିର୍ଥୋ ବିମାନବନ୍ଦରରେ ଅବତରଣ କରାଯାଇଥିଲା । ସେହିଭଳି ଧମକ ମିଳିବା ପରେ ଫ୍ରାଙ୍କଫର୍ଟ ମୁମ୍ବାଇ ଭିସ୍ତାରା ବିମାନ ସଂଖ୍ୟା ୟୁକେ ୦୨୮କୁ ମୁମ୍ବାଇରେ ଜରୁରି ଅବତରଣ କରାଯାଇଥିଲା । ପ୍ୟାରିସ-ଦିଲ୍ଲୀ ୟୁକେ-୨୨ ବିମାନ ଦିଲ୍ଲୀରେ ସଫଳତାର ସହ ଲ୍ୟାଣ୍ଡିଂ କରିଛି । ତେବେ ୟୁକେ-୦୨୮ ବିମାନକୁ ଯେତେବେଳେ ବୋମା ଧମକ ମିଳିଥିଲା ସେହି ସମୟରେ ବିମାନଟି ପାକିସ୍ତାନ ଆକାଶ ସୀମାରେ ଉଡୁଥିଲା । ବିମାନରେ ୧୪୭ ଜଣ ଯାତ୍ରୀ ଥିଲେ । ସକାଳ ୭ଟା ୪୫ରେ ମୁମ୍ବାଇରେ ସଫଳତାର ସହ ଲ୍ୟାଣ୍ଡିଂ କରିବା ପରେ ବିମାନକୁ ଆଇସୋଲସେନ ବେ’କୁ ନିଆଯାଇଥିଲା । ସେଠାରେ ସବୁ ଯାତ୍ରୀଙ୍କୁ ଓହ୍ଲାଇ ଦିଆଯିବା ପରେ ବିମାନକୁ ଭଲ ଭାବେ ତନଖି କରାଯାଇଥିଲା । ସ୍ୱତନ୍ତ୍ର ବୋମା ନିଷ୍କ୍ରିୟକାରୀ ଦଳ ଓ ଡଗ୍‌ ସ୍କ୍ୱାଡ୍‌ ସାହାଯ୍ୟରେ ଯାଞ୍ଚ କରାଯାଇଥିଲା । କିନ୍ତୁ କୌଣସି ପ୍ରକାର ବୋମା ମିଳି ନଥିଲା । ସେହିଭଳି ଇସ୍ତାନବୁଲରୁ ମୁମ୍ବାଇ ଆସୁଥିବା ଏକ ଇଣ୍ଡିଗୋ ବିମାନ (୬ଇ-୧୮)କୁ ମଧ୍ୟ ବୋମା ଧମକ ମିଳିଥିବା ଜଣାପଡିଛି । 

୬ଇ-୧୮ ନାମକ ଏହି ବିମାନଟି ମୁମ୍ବାଇରେ ଅବତରଣ କରିବା ପରେ ତାକୁ ଆଇସୋଲେସନ ବେ’କୁ ନିଆଯାଇଥିଲା । ସେଠାରେ ଯାତ୍ରୀଙ୍କୁ ଓହ୍ଲାଇ ଦିଆଯିବା ପରେ ବିମାନକୁ ତନ୍ନତନ୍ନ କରି ଯାଞ୍ଚ କରାଯାଇଥିଲା । ହେଲେ ବୋମା ମିଳି ନଥିଲା । ଲକ୍ଷ୍ନୌରୁ ପୁନେ ଯାଉଥିବା ଇଣ୍ଡିଗୋର ଅନ୍ୟ ଏକ ବିମାନ (୬ଇ-୧୧)କୁ ଧମକ ମିଳିଥିଲେ ମଧ୍ୟ ଏହା ଗନ୍ତବ୍ୟସ୍ଥଳରେ ସଫଳତାର ସହ ଲ୍ୟାଣ୍ଡିଂ କରିଛି । ଗତ ରବିବାର ଠାରୁ ବିଭିନ୍ନ ବିମାନରେ ବୋମା ଥିବା ନେଇ ଧମକ ମିଳିବାରେ ଲାଗିଛି । ସୋମବାର ୩, ମଙ୍ଗଳବାର ୮ ଓ ବୁଧବାର ୭ଟି ବିମାନକୁ ଧମକ ମିଳିଥିଲା । ଏଥିସହ ଆଉ ଏକ ବିମାନରେ ମଧ୍ୟ ବୋମା ଥିବା ନେଇ ସୋସିଆଲ ମିଡିଆରେ ଧମକ ଦିଆଯାଇଥିଲା ।