ନୂଆଦିଲ୍ଲୀ: ଋଷ ବିରୋଧରେ ଦୀର୍ଘ ଅଢେଇ ବର୍ଷ ହେବ ଯୁଦ୍ଧ ଜାରି ରଖିଥିବା ୟୁକ୍ରେନକୁ ସାହାଯ୍ୟ କରିବାକୁ ଆଗେଇ ଆସିଛି ଅଷ୍ଟ୍ରେଲିଆ । ଏହା ପୂର୍ବରୁ ଆମେରିକା ଏବଂ ବ୍ରିଟେନ ମଧ୍ୟ ୟୁକ୍ରେନର ସବୁଠାରୁ ବଡ ସାହାଯ୍ୟକାରୀଙ୍କ ମଧ୍ୟରେ ରହିଆସିଛନ୍ତି। କିନ୍ତୁ ବର୍ତ୍ତମାନ ଅଷ୍ଟ୍ରେଲିଆ ୟୁକ୍ରେନକୁ ଏହାର ବିପଜ୍ଜନକ ଆବ୍ରାମସ୍ ଟ୍ୟାଙ୍କ ଦେବାକୁ ଯାଉଛି । ଏନେଇ ଅଷ୍ଟ୍ରେଲିଆ କହିଛି ଯେ, ଏହାର ୪୯ ଟି ପୁରୁଣା M1A1 ଆବ୍ରାମସ୍ ଟ୍ୟାଙ୍କ ୟୁକ୍ରେନକୁ ଦାନ କରିବ । ଅଷ୍ଟ୍ରେଲିଆର ପ୍ରତିରକ୍ଷା ମନ୍ତ୍ରୀ ରିଚାର୍ଡ ମାର୍ଲେସ୍ ଗୁରୁବାର ଏହି ସୂଚନା ଦେଇଛନ୍ତି । ୟୁକ୍ରେନ ଏହି ଟ୍ୟାଙ୍କକୁ କିଛି ମାସ ପୂର୍ବରୁ ଦେବାକୁ ଅଷ୍ଟ୍ରେଲିଆକୁ ଅନୁରୋଧ କରିଥିଲା ।

ମାର୍ଲେସ କହିଛନ୍ତି ଯେ, ଅଷ୍ଟ୍ରେଲିଆ ସରକାର ୟୁକ୍ରେନକୁ ଏହାର ଅଧିକାଂଶ ଆମେରିକୀୟ ନିର୍ମିତ M1A1 ଟ୍ୟାଙ୍କ ଦେଉଛନ୍ତି, ଯାହାର ମୂଲ୍ୟ ୨୪ କୋଟି ୫୦ ଲକ୍ଷ  ଅଷ୍ଟ୍ରେଲିୟ ଡଲାର । ଯଦିଓ ମାର୍ଲେସ୍ ଫେବୃଆରୀରେ କହିଥିଲେ ଯେ, ୟୁକ୍ରେନକୁ ପୁରୁଣା ଟ୍ୟାଙ୍କ ଦେବା ତାଙ୍କ ସରକାରଙ୍କ କାର୍ଯ୍ୟସୂଚୀରେ ନାହିଁ, କିନ୍ତୁ ଗୁରୁବାର ଦିନ ସେ କହିଛନ୍ତି ଯେ ସେ ଏହି ସହାୟତାକୁ ତାଙ୍କ ସରକାରଙ୍କ ପୂର୍ବ ଆଭିମୁଖ୍ୟରୁ ପ୍ରତ୍ୟାହାର ଭାବରେ ଦେଖୁ ନାହାଁନ୍ତି। ଅଷ୍ଟ୍ରେଲୀୟ ବ୍ରଡକାଷ୍ଟିଂ କର୍ପୋରେସନକୁ ମାର୍ଲେସ କହିଛନ୍ତି ଯେ ଆମେ ୟୁକ୍ରେନ ସରକାରଙ୍କ ସହ କଥାବାର୍ତ୍ତା ଜାରି ରଖିଛୁ।

ଅଷ୍ଟ୍ରେଲିଆର ଆବ୍ରାମସ୍ ଟ୍ୟାଙ୍କର ପୁରୁଣା ହୋଇପାରେ, କିନ୍ତୁ ସେଗୁଡିକୁ ବିପଦପୂର୍ଣ୍ଣ ବର୍ଗରେ ସେନା ରଖିଥାଏ । ସେ କହିଛନ୍ତି, "ଆମ ପାଖରେ ଥିବା ସାମଗ୍ରୀକୁ ପ୍ରଥମେ ସମୀକ୍ଷା କରୁ,ଏହାର କାର୍ଯ୍ୟକାରିତା, ସ୍ଥିତିକୁ ଦେଖୁ ଏବଂ ଏହା ପରିବର୍ତ୍ତନ ଆଣିବ କି ନାହିଁ, ଏହା ସ୍ଥିର ହୋଇପାରିବ କି ନାହିଁ ଏବଂ ଏହାକୁ ଯୁଦ୍ଧରେ ବ୍ୟବହାର କରାଯାଇପାରିବ କି ନାହିଁ ସମୀକ୍ଷା କରୁ । ଆଉ ଏହି ସମସ୍ତ ମାନଦଣ୍ଡ ଗୁଡିକ ଏହି ଟ୍ୟାଙ୍କ ଗୁଡିକ ପୂରଣ କରୁଛି ।