ବାଲିପଦର,୧୮/୦୭:ସ୍ଥାନୀୟ ଡାକ ଘରେ କାର୍ଯ୍ୟରତ ମହିଳା କର୍ମଚାରୀ ରଶ୍ମିତା  ବେହେରା (୨୫)ଙ୍କ ଝୁଲନ୍ତା ମୃତଦେହ ମଙ୍ଗଳବାର ବୁଗୁଡ଼ା ଅରବିନ୍ଦନଗର ୨ୟ  ଗଳିରେ ଥିବା ଭଡ଼ା ଘରୁ ପୁଲିସ ଉଦ୍ଧାର କରିଛି । ଆତ୍ମହତ୍ୟାର କାରଣ ଜଣା ପଡିନଥିବା  ବେଳେ ପୁଲିସ ରଶ୍ମିତାଙ୍କ ଏକ ହାତଲେଖା ଡାଏରୀ ଜବତ କରିଛି । ମଙ୍ଗଳବାର ରାତି ୯ଟାରେ ସେ ମୋବାଇଲ୍‌ରେ ଶେଷ ଥର ପାଇଁ  କଲ୍‌ ରିସିଭ୍‌ କରିଲେ । କେଉଁ ସମୟରେ ସେ  ଆତ୍ମହତ୍ୟା କଲେ ତାହା ଜଣାପଡ଼ିନି ।  

ପଡ଼ୋଶୀଙ୍କ ସୂଚନା ଅନୁସାରେ ରଶ୍ମିତା ଗତ  ରାତିରେ ଖାଇପିଇ ଶୋଇଥିଲେ । ବୁଧବାର ମଧ୍ୟାହ୍ନ ଗୋଟାଏ ପର୍ଯ୍ୟନ୍ତ ତାଙ୍କ ଘର କବାଟ ଖୋଲା ନହେବାରୁ ପଡୋଶୀ ଡାକିଥିଲେ । ଏପରିକି ମୋବାଇଲ୍‌ କଲ୍‌ କରିଥିଲେ ହେଁ  କୌଣସି ଉତ୍ତର ନ ମିଳିବାରୁ ସନ୍ଦେହ ଜାତ ହେବାରୁ ଘର ମାଲିକଙ୍କୁ ଡାକି ପୁଲିସକୁ  ଖବର ଦିଆ ଯାଇଥିଲା । ପୁଲିସ କବାଟ ଭାଙ୍ଗି ଭିତରେ ପଶିବା ପରେ ରଶ୍ମିତାଙ୍କ ମୃତ  ଦେହ ଦ୍ୱିତୀୟ ବଖରାର ଛାତ ହୁକରୁ ଝୁଲୁଥିବା ଦେଖିବାକୁ ମିଳିଥିଲା । 

ନିଜ ନିର୍ବନ୍ଧରେ  ଭାବି ସ୍ୱାମୀଙ୍କ ଘରଲୋକଙ୍କ ତରଫରୁ ମିଳିଥିବା ନୂଆ ଶାଢ଼ୀ ଓ ଚୁଡ଼ି ପିନ୍ଧି ଏକ ନୂଆ  ପ୍ଲାଷ୍ଟିକ୍‌ ରଶି ବାନ୍ଧି ଝୁଲି ପଡ଼ିଥିଲେ । ତାଙ୍କ ଘର ଖୋର୍ଦ୍ଧା ଜିଲ୍ଲା ଟାଙ୍ଗୀ ଥାନା ଅନ୍ତର୍ଗତ  କୁହୁଡ଼ି ନିକଟସ୍ଥ ସାରଣ ଗ୍ରାମ । ଦୁଇ ମାସ ତଳେ କୁହୁଡ଼ି ଗ୍ରାମର ଜଣେ ଯୁବକଙ୍କ ସହ ତାଙ୍କ ନିର୍ବନ୍ଧ ସରିଥିବା ବେଳେ ଗତ ୧୨ ତାରିଖରେ ବିବାହ ତିଥି ଧାର୍ଯ୍ୟ ହୋଇଥିଲା ।  କୌଣସି କାରଣବଶତଃ ବାହାଘର ସ୍ଥଗିତ ରହିଥିଲା । ପୁଲିସ ଅପମୃତ୍ୟୁ ମାମଲା ରୁଜୁ  କରିଛି । ରଶ୍ମିତାଙ୍କ ପିତା ଗଙ୍ଗାଧର ବେହେରା ସନ୍ଧ୍ୟାରେ ଏଠାରେ ପହଞ୍ଚିବା ପରେ  ପୁଲିସ ତାଙ୍କ ସହାୟତାରେ ତଦନ୍ତ ତ୍ୱରାନ୍ୱିତ କରିଛି।