ଭୁବନେଶ୍ୱର୨୫/୦୭: ସ୍ୱାମୀଙ୍କ ନିର୍ଯାତନା ସହି ନ ପାରି ଜଣେ ସାମ୍ବାଦିକା ଟ୍ରେନ୍ ଆଗକୁ ଡେଇଁ ପଡିଥିବା ସନ୍ଦେହ କରାଯାଉଛି । ସାମ୍ବାଦିକା ଜଣଙ୍କ ହେଲେ ମଧୁସ୍ମିତା ପରିଡ଼ା । ରେଳବାଇ ପୁଲିସ୍ ଖଣ୍ଡବିଖଣ୍ଡିତ ମୃତଦେହ ଉଦ୍ଧାର କରି ବ୍ୟବଚ୍ଛେଦ ପାଇଁ ପଠାଇଛି । ମୃତ୍ୟୁ ପୂର୍ବରୁ ମଧୁସ୍ମିତା ସୋସିଆଲ୍ ମିଡିଆରେ ଏକ ଭିଡିଓ ପୋଷ୍ଟ କରିଛନ୍ତି । ଉକ୍ତ ଭିଡିଓରେ ସେ ତାଙ୍କ ସ୍ୱାମୀ ଶ୍ରୀଧର ଜେନାଙ୍କ ନିର୍ଯାତନା ବିଷୟରେ ଜଣାଇଛନ୍ତି । ତାହା ସୋସିଆଲ୍ ମିଡିଆରେ ଭାଇରାଲ୍ ହେଉଛି । ଏନେଇ ପରିବାର ଲୋକ ଥାନାରେ ଅଭିଯୋଗ କରିଛନ୍ତି । ନିଜ ସ୍ୱାମୀଙ୍କ ଅନୈତିକ ପ୍ରେମ କଥା ଜାଣିବା ପରେ ସେ ଏମିତି କରିଥିବା ପୁଲିସ୍ ପ୍ରାଥମିକ ତଦନ୍ତରୁ ଜାଣିବାକୁ ପାଇଛି ।
ମଧୁସ୍ମିତାଙ୍କ ଟ୍ରେନ୍ ଲାଇନ୍କୁ ଡେଇଁବା ପୂର୍ବରୁ ସୋସିଅଲ୍ ମିଡିଆ ଇନ୍ଷ୍ଟାଗ୍ରାମ୍ରେ ଏକ ସାଢ଼େ ୪ ମିନିଟ୍ର ଭିଡିଓ ପୋଷ୍ଟ କରିଥିଲେ । ଭିଡିଓରେ ସେ କହିଛନ୍ତି, ସରି ମମି । ମତେ କ୍ଷମା କରିଦେବୁ । ଭୁଲିଯିବୁ ତୋର ଗୋଟିଏ ଝିଅ ଥିଲା ବୋଲି.... । ଯାହାବି କରିବାକୁ ଯାଉଛି ସମସ୍ତଙ୍କୁ ସରି । ଦୁନିଆରେ ଏତେ ଫ୍ରଡ୍ ଲୋକ ଅଛନ୍ତି ବୋଲି କେବେ ଜାଣିନଥିଲି । ୫ ବର୍ଷ ଧରି ରିଲେସନ୍ରେ ରହିବା ପରେ ବାହା ହୋଇଥିଲି । ହେଲେ ମୋ' ସ୍ୱାମୀ ମତେ ଧୋକା ଦେଇଛନ୍ତି । ସେ ଆଉ ଜଣଙ୍କ ସହ ରିଲେସନ୍ରେ ଅଛନ୍ତି । ତା’ ସହିତ ରାତି ଗୋଟାଏ, ୨ଟା ପର୍ଯ୍ୟନ୍ତ ଗପୁଛନ୍ତି । ଏ ସମ୍ପର୍କରେ ମୁଁ ଜାଣିନେଲି । ସେଇଟା ମୋର ସବୁଠାରୁ ବଡ଼ ଭୁଲ ହେଲା । ଏବେ ସେ କହୁଛନ୍ତି ମୋ ସହିତ ରହିବେନି....ଡିଭର୍ସ ଦେବେ । ତାଙ୍କୁ ସମସ୍ତେ ବୁଝାଇ ସାରିଲେଣି । ହେଲେ ସେ ବୁଝୁ ନାହାନ୍ତି । ୧୦ ଦିନ ଛୁଟିରେ ଆସି ଖାଲି ଝଗଡ଼ା କରୁଛନ୍ତି । ସେଥିପାଇଁ ମୁଁ ଅଫିସ୍ ଯାଇପାରୁନି....... । ମ୍ୟାରେଜ ପରେ କାହିଁକି ଏମିତି କହୁଛି? ଯଦି ଏମିତି କରିବାର ଥିଲା, ତାହେଲେ କାହିଁକି ମତେ ବାହା ହେଉଥିଲେ? ମତେ କ୍ଷମା କରିଦିଅ ମମି... ମୁଁ ନିଜକୁ ସମ୍ଭାଳି ପାରୁନି... ଆଜି ଯାହା ହେବ ମମି ମତେ କ୍ଷମା କରିଦେବୁ।