ଯାଜପୁର, ୨୪।୭: ଯବାନଙ୍କ ନାଁରେ ଥିବା ଜମି ଉଦ୍ଧାର କରିବାକୁ ରାଜା ନାରାୟଣ ଚନ୍ଦ୍ର ଫାଉଣ୍ଡେସନ ଟ୍ରଷ୍ଟ ପକ୍ଷରୁ ଜିଲ୍ଲାପାଳଙ୍କୁ ଚିଠି । ଯାଜପୁର ଜିଲ୍ଲା ଧର୍ମଶାଳା ତହସିଲ ଅଞ୍ଚଳ ତଳଗଡ଼ ସର୍କଲ ସୁକୁଟିଝର ମୌଜା ଅନ୍ତର୍ଗତ ହାଲ ଖାତା ନଂ ୩୦୫ ଏ ୧୩.୮୮ ଡି ଜମି ଯବାନମାନଙ୍କ ପାଇଁ ଉଦ୍ଦିଷ୍ଟ । ବର୍ତ୍ତମାନ ସ୍ଥାନୀୟ ଜମି ମାଫିଆମାନଙ୍କ କବଜାରେ ଏହି ଜମି । ମଧୁପୁରଗଡ଼ର ରାଜା ନାରାୟଣ ଚନ୍ଦ୍ର ଫାଉଣ୍ଡେସନ ଟ୍ରଷ୍ଟ ପକ୍ଷରୁ ଧର୍ମଶାଳା ତହସିଲଦାର ଶୁଭଙ୍କର ମହାନ୍ତିଙ୍କ ନିକଟରେ ଏନେଇ ଅଭିଯୋଗ ହୋଇଛି ।
ଟ୍ରଷ୍ଟର ମ୍ୟାନେଜିଙ୍ଗ ଟ୍ରଷ୍ଟି ଶିବପ୍ରସାଦ ଜେନା ଓ ଫାଉଣ୍ଡର ଅପର୍ଣ୍ଣା ଧୀର ସିଂ ଏବଂ ସଭ୍ୟ ବିନୋଦ ପରିଡ଼ା ଓ ଶ୍ୟାମ ସୁନ୍ଦର ସାହୁଙ୍କ ଅଭିଯୋଗ ମୁତାବକ, ଭାରତ ସରକାରଙ୍କ ପ୍ରତିରକ୍ଷା ବିଭାଗ ଯବାନମାନଙ୍କ ପାଇଁ ମୌଜା ସୁକୁଟିଝର ତଳ ତଫସିଲ ଖାତା ପ୍ଲଟ୍ ଓ ରକବା ସଂରକ୍ଷିତ ଥିଲା । କିଛି ଅସାଧୁ ଜମି ମାଫିଆ ଉକ୍ତ ଜମିକୁ ନିଜ ସ୍ୱାର୍ଥ ପାଇଁ ବେଆଇନ ଭାବେ କ୍ରସର୍ ଓ ବ୍ୟବସାୟ ପ୍ରତିଷ୍ଠାନ ଏବଂ ଗୃହ ନିର୍ମାଣ କରି ମାଫିଆ ସାମ୍ରାଜ୍ୟ ବିସ୍ତାର କରିଚାଲିଛନ୍ତି ।
ଯାହା ଫଳରେ ଯବାନମାନଙ୍କ ପାଇଁ ଉଦ୍ଦିଷ୍ଟ ସଂରକ୍ଷିତ ଜମିର ଅପବ୍ୟବହାର ହେବା ସଙ୍ଗେ ସଙ୍ଗେ ଭାରତ ସରକାରଙ୍କର ପ୍ରତିରକ୍ଷା ବିଭାଗର ଉଦ୍ଦେଶ୍ୟ ପୂରଣ ହୋଇପାରୁନାହିଁ । ତେବେ ତୁରନ୍ତ ଜିଲ୍ଲାପାଳ ଏବଂ ରାଜସ୍ୱ ବିଭାଗ ଓ ପ୍ରତିରକ୍ଷା ବିଭାଗ ଏଥିପ୍ରତି ଦୃଷ୍ଟି ଦେଇ ଏହାର ସର୍ଜମିନ୍ ତଦାରଖ କରି ଏହି ଜମିକୁ ମାଫିଆମାନଙ୍କ କବଳରୁ ଉଦ୍ଧାର କରିବାକୁ ରାଜା ନାରାୟଣ ଚନ୍ଦ୍ର ଫାଉଣ୍ଡେସନ ଦାବି କରିଛି ।