ଭୁବନେଶ୍ୱର,୨୬/୦୭: ଫ୍ରାଇଡେ ରିଲିଜ୍ ଅବସରରେ ରାଜ୍ୟର ୧୫ଟି ହଲ୍ରେ ମୁକ୍ତିଲାଭ କରୁଛି ଓଡ଼ିଆ ସିନେମା ‘ସଲାମ୍ ଭୁବନେଶ୍ୱର’ । ଭୁବନେଶ୍ୱରର ଏକ ହଲ୍ରେ ଦିନ ୨ଟା ବେଳେ କଳାକାରଙ୍କ ସହ ପ୍ରିମିୟର୍ ଅନୁଷ୍ଠିତ ହେଉଛି ବୋଲି ମିଡିଆ ପ୍ଲାନର୍ ଅମରେଶ ସୂଚନା ଦେଇଛନ୍ତି ।
ଜଣେ ଗ୍ୟାଙ୍ଗ୍ଷ୍ଟର୍ ଅପରାଧିକ କାର୍ଯ୍ୟରୁ ନିବୃତ୍ତ ହୋଇ ଭଲ ମଣିଷ ହେଉଛି । ହେଲେ ପୁଲିସ୍ ତାଙ୍କୁ ବାଧ୍ୟ କରୁଛି ଯେ ସେ ପୁଣି ଅପରାଧମୂଳକ କାର୍ଯ୍ୟରେ ଲିପ୍ତ ହେଉ । କାରଣ ଗ୍ୟାଙ୍ଗ୍ଷ୍ଟର୍ ନ ରହିଲେ ପୁଲିସ୍କୁ ବଟି ଦେବ କିଏ? ପୁଲିସ୍ର ଚାପରେ ସେ ପୁଣି ଖରାପ ବାଟ ଆପଣାଉଛି । ଏହା ଭିତରେ ତା’ ଜୀବନ ସହିତ ଯୋଡ଼ି ହେଇଯାଉଛି ଜଣେ ସମ୍ଭ୍ରାନ୍ତ ପରିବାରର ଆଦର୍ଶ ଝିଅ । ତାକୁ ଗ୍ୟାଙ୍ଗ୍ଷ୍ଟର୍ କାମରୁ ଭଲ ବାଟକୁ ଆଣିବା ପାଇଁ ଝିଅଟି ତାକୁ ପ୍ରେମ କରୁଛି । ସେଇ ଝିଅ ସହ ପ୍ରେମ ସମ୍ପର୍କ ଗଢ଼ି ଉଠିବା ପରେ କାହାଣୀର ନାୟକ ଭଲ ବାଟକୁ ଫେରିଆସୁଛି । ‘ଅରୁନ୍ଧତୀ’, ‘ଲଭ୍ ଫିଭର୍’ ପରି ସିନେମାର ନାୟକ ସାଜିଥିବା ରାଜବୀର ଏହି ସିନେମାରେ ମୁଖ୍ୟ ନାୟକ ସାଜିଛନ୍ତି । ତାଙ୍କ ନାୟିକା ରହିଛନ୍ତି ନବାଗତା ମଡେଲ୍ ଅନିଶା । ବବି ମିଶ୍ର, ସୁଇଟି, କେକେ, ପ୍ରଜ୍ଞା, ଶଙ୍କର, ରବି ମିଶ୍ର, ସୁଧାକର ବସନ୍ତ, ମଧୁଙ୍କ ସହ ସ୍ୱର୍ଗତ ପିଣ୍ଟୁ ନନ୍ଦ ଏକ ଗୁରୁତ୍ୱପୂର୍ଣ୍ଣ ଭୂମିକାରେ ଅଭିନୟ କରିଛନ୍ତି । ମୁନ୍ ଟିଭି ମୁଭିଜ୍ ବ୍ୟାନରରେ ନିର୍ମିତ ଏହି ସିନେମାର ପ୍ରଯୋଜନା କରିଛନ୍ତି ସଚ୍ଚିକାନ୍ତ ଜେନା । କାର୍ଯ୍ୟନିର୍ବାହୀ ପ୍ରଯୋଜକ ରହିଛନ୍ତି ପ୍ରସନ୍ନ ଦ୍ୱିବେଦୀ । କାହାଣୀ ସଚ୍ଚିକାନ୍ତଙ୍କର ଥିବାବେଳେ ଚିତ୍ରନାଟ୍ୟ ଓ ନିର୍ଦ୍ଦେଶନା ଦେଇଛନ୍ତି ସୁଧାକର ବସନ୍ତ । ସଙ୍ଗୀତ ଅଭିଜିତ୍ ମଜୁମ୍ଦାର୍ ଏବଂ ସଂଳାପ ଲେଖିଛନ୍ତି ମନୋରଞ୍ଜନ ରାଉଳ । ଏଥିସହିତ ବଲିଉଡ୍ରେ ବକ୍ସ ଅଫିସ୍କୁ ଆସୁଛି ମହେଶ ଭଟ୍ଟ ଲିଖିତ, ବିକ୍ରମ ଭଟ୍ଟ ନିର୍ଦ୍ଦେଶିତ ଏବଂ ଅଭିକା ଗର ଓ ବର୍ଦ୍ଧନ ପୁରୀ ଅଭିନୀତ ହିନ୍ଦୀ ହରର୍ ସିନେମା ‘ବ୍ଲଡି ଇସ୍କ୍’ ।