ମୁମ୍ବାଇ୦୫/୦୯: ହରିଆଣାର ଷ୍ଟାର୍ ଡ୍ୟାନ୍ସର୍ ସପ୍ନା ଚୌଧରୀଙ୍କ ବାୟୋପିକ୍ ପରଦାରେ ଦେଖିବାକୁ ପାଇବେ ସିନେପ୍ରେମୀ । ଫିଲ୍ମର ନାଁ ‘ମ୍ୟାଡାମ୍ ସପ୍ନା’ । ବାୟୋପିକ୍ ଘୋଷଣା କରିବା ପାଇଁ ସପ୍ନା ନିଜ ଇନ୍ଷ୍ଟାଗ୍ରାମ୍ ଆକାଉଣ୍ଟ୍ରୁ ସବୁ ଫଟୋ ଡିଲିଟ୍ କରିଥିଲେ । ତାଙ୍କ ଜୀବନର ଉତ୍ଥାନ-ପତନ ଫିଲ୍ମରେ ପ୍ରଦର୍ଶିତ ହେବ । ହରିଆଣାର କଠୋର ଓ ଆହ୍ୱାନଭରା ପୃଷ୍ଠଭୂମିରୁ କାନ୍ର ଗ୍ଲାମରସ୍ ରେଡ୍ କାର୍ପେଟ୍ ପର୍ଯ୍ୟନ୍ତ ଅର୍କ୍ରେଷ୍ଟ୍ରା ଡ୍ୟାନ୍ସର୍ ସପ୍ନାଙ୍କ ଯାତ୍ରା ଫିଲ୍ମରେ ଦେଖିବାକୁ ମିଳିବ । ଏହାର ଟିଜର୍ ରିଲିଜ୍ ହୋଇଛି । ଏଥିରେ ସପ୍ନା ନିଜର ପରିଚୟ ଦେଇଛନ୍ତି ଏବଂ ତାଙ୍କ ଯାତ୍ରା ପ୍ରାୟ ୧୬ ବର୍ଷର ବୋଲି କହିଛନ୍ତି ।
ଘରର ଆର୍ଥିକ ପରିସ୍ଥିତିକୁ ଦେଖି ସେ ମଞ୍ଚରେ ପାଦ ରଖିଥିଲେ । ଏଥିପାଇଁ ତାଙ୍କୁ ଲୋକଙ୍କ ଲାଞ୍ଝନା, ସମାଲୋଚନାର ସମ୍ମୁଖୀନ ହେବାକୁ ପଡ଼ିଥିଲା । ଏହାକୁ ସହି ନ ପାରି ସେ ଆତ୍ମହତ୍ୟା କରିବାକୁ ଚେଷ୍ଟା କରିଥିଲେ । ଜୀବନରେ ଅନେକ ବାଧାବିଘ୍ନର ସମ୍ମୁଖୀନ ହୋଇ ସପ୍ନା ଆଜି ଶୀର୍ଷରେ ପହଞ୍ଚିଛନ୍ତି । ଶାଇନିଂ ସନ୍ ଷ୍ଟୁଡିଓଜ୍ ବ୍ୟାନର୍ ଅଧୀନରେ ଫିଲ୍ମ ନିର୍ମାଣ ହେବ । ମହେଶ ଭଟ୍ଟ ଏବଂ ବିନୟ ଭରଦ୍ୱାଜ ଓ ରବିନା ଠାକୁର ଏହାର ନିର୍ମାଣ ଦାୟିତ୍ୱ ବହନ କରିବେ ।
ମହେଶ ଭଟ୍ଟ କହିଛନ୍ତି, ସପ୍ନାଙ୍କ କାହାଣୀ କେବଳ ଜଣେ ମହିଳାଙ୍କ ବ୍ୟକ୍ତିଗତ ବିଜୟ ନୁହେଁ³ ବରଂ ଆମ ସମାଜର ପରିବର୍ତ୍ତିତ ଚିନ୍ତାଧାରା ଓ ମାନସିକତାର ପ୍ରତୀକ । ନିଜର ଭିନ୍ନ ପରିଚୟ ସୃଷ୍ଟି କରିବାକୁ ସାହସ ରଖୁଥିବା ପ୍ରତ୍ୟେକ ମହିଳାଙ୍କୁ ଏହି ଫିଲ୍ମ ସମର୍ପିତ । ଫିଲ୍ମରେ ହରିଆଣା ସଙ୍ଗୀତ ଓ ନୃତ୍ୟର ଦମ୍ଦାର ଦୁନିଆ ପ୍ରଦର୍ଶିତ ହେବ ।
