ବ୍ରହ୍ମପୁର,୦୨/୦୯ : ଦୁଇଟି ପୃଥକ ପୃଥକ ଦୁର୍ଘଟଣାରେ ଚାଲିଗଲା ତିନିଜଣଙ୍କ ଜୀବନ । ବ୍ରହ୍ମପୁରର ଲାଞ୍ଜିପଲ୍ଲୀ ଏନଏଚ ଦୁର୍ଘଟଣାରେ ସ୍ୱାମୀ ସ୍ତ୍ରୀଙ୍କର ମୃତ୍ୟୁ ଘଟିଛି । ମୃତକ ଦୁଇଜଣ ଦୁର୍ଗା ପ୍ରସାଦ ମିଶ୍ର,ଚିନ୍ମୟ ରାଣୀ ମିଶ୍ର ବୋଲି ଜଣାପଡ଼ିଛି । ଅନ୍ୟପଟେ ବ୍ରହ୍ମପୁର ବ୍ଲକ୍ ଅନ୍ତର୍ଗତ ଗୋସାଇଁନୂଆଗାଁ ଅଞ୍ଚଳରେ ସଡ଼କ ଦୁର୍ଘଟଣା ଘଟି ଆଉ ଜଣଙ୍କ ମୃତ୍ୟୁ ଘଟିଛି । ମୃତଙ୍କ ପରିଚୟ ଅସ୍ପଷ୍ଟ ରହିଛି । 

ସୂଚନା ଅନୁଯାୟୀ, ଦୁଇଟି ପୃଥକ ପୃଥକ ଦୁର୍ଘଟଣାରେ ଚାଲିଗଲା ୩ଜଣଙ୍କ ଜୀବନ । ପ୍ରଥମ ଦୁର୍ଘଟଣାଟି ଲାଞ୍ଜିପଲ୍ଲୀ ଏନଏଚରେ ହୋଇଛି । ଦୁର୍ଗା ପ୍ରସାଦ ମିଶ୍ର ଏବଂ ତାଙ୍କ ପତ୍ନୀ ଚିନ୍ମୟ ରାଣୀ ମିଶ୍ର କନିସିରୁ ବ୍ରହ୍ମପୁର ଅଭିମୁଖେ ବାଇକ ଯୋଗେ ଆସୁଥିଲେ । ଏହି ସମୟରେ ଲାଞ୍ଜିପଲ୍ଲୀ ନିକଟରେ ବାଇକ୍କୁ ପଛ ପଟୁ ଏକ ଟ୍ରକ ଧକ୍କା ଦେଇଥିଲା । ଫଳରେ ଘଟଣାସ୍ଥଳରେ ସ୍ତ୍ରୀ ଚିନ୍ମୟ ରାଣୀଙ୍କ ମୃତ୍ୟୁ ହୋଇଥିଲା । ଏହା ଦେଖି ସ୍ଥାନୀୟଲୋକେ ତୁରନ୍ତ ପୋଲିସକୁ ଖବର ଦେଇଥିଲେ । ଖବର ପାଇ ଘଟଣା ସ୍ଥଳରେ ପୋଲିସ ପହଞ୍ଚି ଗୁରୁତର ଅବସ୍ଥାରେ ଦୁର୍ଗା ପ୍ରସାଦଙ୍କୁ ବଡ଼ ମେଡିକାଲ ପଠାଇଥିଲେ । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଛନ୍ତି । ଏହି ଦୁର୍ଘଟଣାକୁ ନେଇ ଉତ୍ୟକ୍ତ ଲୋକେ ବହୁ ସମୟ ଧରି ବିଳମ୍ବିତ ରାତି ପର୍ଯ୍ୟନ୍ତ ରାସ୍ତାରୋକ କରିଥିଲେ । ଏକ ଫ୍ଲାଇ ଓଭର ବ୍ରିଜର ନିର୍ମାଣ ଦାବୀ ନେଇ ରାସ୍ତା ଅବରୋଧ କରିଥିଲେ ସ୍ଥାନୀୟଲୋକେ । ଘଟଣାସ୍ଥଳରେ ବୈଦ୍ୟନାଥପୁର ପୁଲିସ, ଟ୍ରାଫିକ ପୁଲିସ ପହଞ୍ଚି ଉତ୍ତ୍ୟକ୍ତ ଲୋକଙ୍କୁ ବୁଝାସୁଝା କରିବା ପରେ ରାସ୍ତା ରୋକ ହଟିଥିଲା। ସେପଟେ ଟ୍ରକ ଡ୍ରାଇଭରକୁ ପୁଲିସ ଅଟକ ରଖି ଅଧିକ ତଦନ୍ତ କରୁଛି ।

ଅନ୍ୟପଟେ ବ୍ରହ୍ମପୁର ବ୍ଲକ୍ ଅନ୍ତର୍ଗତ ଗୋସାଇଁନୂଆଗାଁ ଅଞ୍ଚଳରେ ଘଟିଛି ଆଉ ଏକ ସଡ଼କ ଦୁର୍ଘଟଣା । ବାଇକ ଯୋଗେ ଆସୁଥିବା ବେଳେ ଦୁର୍ଘଟଣା ଘଟି ବାଇକ ଚାଳକଙ୍କ ମୃତ୍ୟୁ ହୋଇଛି । ଏହା ଦେଖି ସ୍ଥାନୀୟଲୋକେ ତୁରନ୍ତ ପୋଲିସକୁ ଖବର ଦେଇଥିଲେ । ଖବର ପାଇ ଘଟଣା ସ୍ଥଳରେ ପୋଲିସ ପହଞ୍ଚି ମୃତଦେହକୁ ଜବତ କରି ଘଟଣାର ତଦନ୍ତ କରୁଛି ।