ଭୁବନେଶ୍ୱର, ୧୫।୫: ଭୁବନେଶ୍ୱର ଜେଏମ୍‌ଏଫ୍‌ସି ପାୟଲ ଗୁପ୍ତା ଚଡ଼ି ଗ୍ୟାଙ୍ଗ୍‌ର ୧୧ ଜଣଙ୍କୁ ମଙ୍ଗଳବାର ପ୍ରତ୍ୟେକଙ୍କୁ ୯ ମାସ ସଶ୍ରମ କାରାଦଣ୍ଡାଦେଶ ଦେଇଛନ୍ତି । ମାମଲାରୁ ପ୍ରକାଶ, ଗତବର୍ଷ ମେ’ମାସ ୧୫ ତାରିଖରେ ତମାଣ୍ଡୋ ଥାନା ବିଜିପୁର ଗ୍ରାମର ଜଣେ ମହିଳାଙ୍କ ଘରୁ ଚୋରି ହୋଇଥିଲା । ଏ ନେଇ ମହିଳା ତମାଣ୍ଡୋ ଥାନାରେ ଅଭିଯୋଗ କରିଥିଲେ । ପୁଲିସ ଥାନାରେ ଏକ ମାମଲା (ନଂ-୧୩୨/୨୩) ରୁଜୁ କରିଥିଲା । ଥାନା ଏସ୍‌ଆଇ ସଞ୍ଜିତ ବେହେରା ଏହାର ତଦନ୍ତ ଭାର ନେଇଥିଲେ । 

ତେବେ ଏହି ଚୋରିରେ ସଂପୃକ୍ତ ଚଡ଼ି ଗ୍ୟାଙ୍ଗ୍‌ର ୧୧ ଜଣଙ୍କୁ ଧଉଳି ଥାନା ପୁଲିସ ଗିରଫ କରି ଜେଲ୍‌ ପଠାଇଥିଲା । ଧଉଳି ଥାନା କେସ୍‌ ନଂ-୧୨୩/୨୩ରେ ଥାନା ଏସ୍‌ଆଇ ସନ୍ତୋଷ ବଳ ଏହି ୧୧ ଜଣିଆ ଚୋର ଦଳଙ୍କୁ ଗିରଫ କରି ଜେଲ୍‌ ପଠାଇଥିଲେ । ତମାଣ୍ଡୋ ଥାନା ପୁଲିସ ଏହି ଗ୍ୟାଙ୍ଗକୁ ରିମାଣ୍ଡରେ ନେଇଥିଲା । ତମାଣ୍ଡୋ ଥାନା କେସ୍‌ରେ ୧୩ ଜଣ ସାକ୍ଷୀ ଓ ବିଭିନ୍ନ ଦସ୍ତାବିଜ୍‌ ଆଧାରରେ ଅଦାଲତ ଆଜି ୧୧ ଜଣିଆ ଚଡ଼ି ଗ୍ୟାଙ୍ଗକୁ ଦୋଷୀ ସାବ୍ୟସ୍ତ କରିବା ସହ ୯ ମାସ ସଶ୍ରମ କାରାଦଣ୍ଡରେ ଦଣ୍ଡିତ କରିଛନ୍ତି । ମାମଲାକୁ ଏପିପି ବିଜୟ କୁମାର ବାରିକ ଓ ବିଜନ ବିହାରୀ କର ପରିଚାଳନା କରୁଥିଲେ ।