ମୁମ୍ବାଇ ୨୭/୦୭: ଗତ ଶୁକ୍ରବାର ମୁକ୍ତିଲାଭ କରିଛି ବହୁପ୍ରତୀକ୍ଷିତ ଆକ୍ସନ୍-କମେଡି ହଲିଉଡ୍ ଫିଲ୍ମ ‘ଡେଡ୍ପୁଲ ଆଣ୍ଡ ଉଲଭରାଇନ୍’ । ମାର୍ଭଲ ଷ୍ଟୁଡିଓଜ୍ ଓ ଡିଜ୍ନୀ ଦ୍ୱାରା ପ୍ରଯୋଜିତ ଏହି ଫିଲ୍ମ ପ୍ରଥମ ଦିନ ବିଶ୍ୱସ୍ତରରେ ୩୮.୫ ନିୟୁତ ଡଲାର ବ୍ୟବସାୟ କରିଛି । ଆର୍-ରେଟେଡ୍ ଫିଲ୍ମ ଭାବେ ଏପର୍ଯ୍ୟନ୍ତର ଏହା ସର୍ବଶ୍ରେଷ୍ଠ ପ୍ରଦର୍ଶନ । ଭାରତରେ ଏହା ପ୍ରଥମ ଦିନ ୧୬-୧୮ କୋଟି ବ୍ୟବସାୟ କରିଛି । ଭାରତୀୟ ବକ୍ସ ଅଫିସ୍ରେ ଏହା ୭ମ ସବୁଠୁ ବଡ଼ ହଲିଉଡ୍ ଓପନର ହୋଇଛି । ଆମେରିକାରେ ଏହା ୩୬ ନିୟୁତ ଡଲାର ଆୟ କରିଛି । ପ୍ରଥମ ସପ୍ତାହାନ୍ତରେ ଆମେରିକାରେ ୧୬୦ରୁ ୧୮୦ ନିୟୁତ ଡଲାର ବ୍ୟବସାୟ କରିବ ବୋଲି ସମୀକ୍ଷକମାନେ ଆଶା କରୁଛନ୍ତି ।
ଫିଲ୍ମରେ ଡେଡ୍ପୁଲ ଭୂମିକାରେ ଅଭିନୟ କରିଛନ୍ତି ର୍ୟାନ୍ ରେନୋଲ୍ଡସ । ଉଲ୍ଭରାଇନ୍ ଭୂମିକାରେ ନଜର ଆସିଛନ୍ତି ହ୍ୟୁଗ୍ ଜ୍ୟାକ୍ମ୍ୟାନ । ଏହା ହାସ୍ୟରାସ, ଆକ୍ସନ୍ ଓ ଆବେଗର ଫେଣ୍ଟାଫେଣ୍ଟି କାହାଣୀ ଭେଟି ଦେଇଛି, ଯାହାକୁ ଖୁବ୍ ପସନ୍ଦ କରୁଛନ୍ତି ସିନେପ୍ରେମୀ । ଶନ୍ ଲେଭିଙ୍କ ଲିଖିତ ଓ ନିର୍ଦ୍ଦେଶିତ ଏହି ଫିଲ୍ମରେ ଏମା କୋରିନ୍, ମୋରେନା ବାକାରିନ, ରୋବ୍ ଡେଲାନି, ଲେସଲି ଉଗମ୍ସ, କରନ ସୋନି, ମାଥ୍ୟୁ ମ୍ୟାକ୍ଫାଡାଇନ୍ଙ୍କ ଭଳି କଳାକାର ଗୁରୁତ୍ୱପୂର୍ଣ୍ଣ ଭୂମିକାରେ ଅଭିନୟ କରିଛନ୍ତି ।