ଭୁବନେଶ୍ୱର, ୨୭/୦୭: କିଏ ନେବ ରାଜ୍ୟ କଂଗ୍ରେସ ନେତୃତ୍ୱ ? କାହା ମୁଣ୍ଡରେ ମୁକୁଟ ପିନ୍ଧାଇବେ ଏଆଇସିସି ଅଧ୍ୟକ୍ଷ? ପୁଣି ଯିଏ କଂଗ୍ରେସର ନୂଆ ଅଧ୍ୟକ୍ଷ ହେବେ ସେ ଦଳର ସ୍ଥିତିକୁ କେତେ ମାତ୍ରାରେ ସୁଦୃଢ଼ କରିବେ । ଏଭଳି ଅନେକ ପ୍ରଶ୍ନ ଏବେ କଂଗ୍ରେସ କର୍ମୀ ଓ ସାଧାରଣଜନତାଙ୍କ ମନରେ । ବିଭିନ୍ନ ରାଜନୈତିକ ଖଟିରେ ଏହି ଚର୍ଚ୍ଚା ମଧ୍ୟ ଜୋର ଧରିଛି । କିଏ କହୁଛି, ତାରା ବାହିନୀପତି, ପ୍ରସାଦ ହରିଚନ୍ଦନ, ଜୟଦେବ ଜେନା ତ ଆଉ କିଏ କହୁଛି ମହମ୍ମଦ ମୋକିମ ପୁଣି ଆଉ କିଏ ଦଳର ଏକ ମାତ୍ର ସାଂସଦ ସପ୍ତଗିରି ଉଲାକାଙ୍କ ନାଁ ନେଉଛି । ଏଭଳି ଚର୍ଚ୍ଚା ଓ ଦ୍ୱନ୍ଦ୍ୱ ମଧ୍ୟରେ କେତେକ ଛାମୁଆ ନେତା ଯାଇ ଦିଲ୍ଲୀରେ ଡେରା ପକାଇଥିବା ସୂଚନା ମିଳିଛି ।
ଏପଟେ ପିସିସି ଭଙ୍ଗ ସହ ଶରତ ପଟ୍ଟନାୟକ ମୁଖିଆ ପଦରୁ ଓହରିବା ପରେ ନିସ୍ତବ୍ଧ କଂଗ୍ରେସ ଭବନ । ଅନେକ ସମୟରେ କଂଗ୍ରେସ ଭବନ ଆଗରେ ବଡ଼ ବଡ଼ ଗାଡ଼ି ଓ ହେଭିୱେଟ୍ ନେତା, କର୍ମୀଙ୍କ ଭିଡ଼ ଲାଗୁଥିଲା । ହେଲେ ବର୍ତ୍ତମାନ ସ୍ଥିତି ବଦଳିଛି । ଏଆଇସିସି ରାଜ୍ୟ ସଂଗଠନକୁ ଭାଙ୍ଗିବା ପରେ ନେତା କିମ୍ବା କର୍ମୀ କଂଗ୍ରେସ ଭବନରେ ପାଦ ଦେଉନାହାନ୍ତି । କେବଳ କର୍ମଚାରୀମାନେ ସକାଳୁ ରାତି ପର୍ଯ୍ୟନ୍ତ ବସି ରହୁଛନ୍ତି । ପିସିସି ସଭାପତିଙ୍କ କାର୍ଯ୍ୟାଳୟଠୁ ନେଇ ମିଡିଆ ସେଲ, ସୋସିଆଲ ମିଡିଆ ସେଲ, କୃଷକ ସେଲ୍ରେ ତାଲା । ୫ ଦିନ ହେଲା ବିଧାନସଭାରେ କଂଗ୍ରେସର ସ୍ୱର ମଧ୍ୟ ଧିମେଇ ଯାଇଛି । ସେପଟେ ଦିଲ୍ଲୀ ଯାଇଥିବା ନେତାମାନେ ରାଜ୍ୟ କଂଗ୍ରେସର ନେତୃତ୍ୱ ନେବା ପାଇଁ ହାଇକମାଣ୍ଡଙ୍କ ପାଖରେ ଲବି କରୁଥିବା ସୂଚନା ମିଳିଛି ।
ପ୍ରକାଶ ଥାଉକି, ଗତ ୨୪ ବର୍ଷରେ ରାଜ୍ୟ କଂଗ୍ରେସକୁ ମିଳିଛନ୍ତି ୬ ପିସିସି ସଭାପତି । ପୂର୍ବତନ ମୁଖ୍ୟମନ୍ତ୍ରୀ ସ୍ୱର୍ଗତ ଜାନକୀ ବଲ୍ଲଭ ପଟ୍ଟନାୟକ, ଜୟଦେବ ଜେନା, କାମାକ୍ଷାପ୍ରସାଦ ସିଂହଦେଓ, ନିରଞ୍ଜନ ପଟ୍ଟନାୟକ, ପ୍ରସାଦ ହରିଚନ୍ଦନ ଓ ଶରତ ପଟ୍ଟନାୟକଙ୍କ ଭଳି ନେତା କଂଗ୍ରେସର ମଙ୍ଗ ଧରିଛନ୍ତି । ହେଲେ ଜେବିଙ୍କ ବ୍ୟତୀତ କେହି ବି ରାଜ୍ୟ କଂଗ୍ରେସର ଭାଗ୍ୟ ବଦଳାଇ ପାରିନାହାନ୍ତି । ଯେଉଁଥିପାଇଁ ୨୪ ବର୍ଷ ଧରି ଓଡ଼ିଶାରେ କ୍ଷମତାରୁ ଦୂରରେ କଂଗ୍ରେସ।
