ନୂଆଦିଲ୍ଲୀ ୦୩/୦୨: ସୋସିଆଲ ମିଡିଆରେ ଅଭିନେତା ତଥା ରାଜନେତା ପ୍ରକାଶ ରାଜଙ୍କ ଏକ ଫଟୋ ଭାଇରାଲ ହୋଇଛି । ଫଟୋରେ ପ୍ରକାଶ ପ୍ରୟାଗରାଜ ମହାକୁମ୍ଭରେ ବୁଡ଼ ପକାଉଥିବା ଦେଖିବାକୁ ମିଳିଛି । ପ୍ରଶାନ୍ତ ସମ୍ବାରଗି ନାମକ ଜଣେ ବ୍ୟକ୍ତି ଆର୍ଟିଫିସିଆଲ ଇଣ୍ଟେଲିଜେନ୍ସ (ଏଆଇ) ମାଧ୍ୟମରେ ପ୍ରକାଶଙ୍କ ଫଟୋକୁ ଏଭଳି ଏଡିଟ କରି ପୋଷ୍ଟ କରିଛନ୍ତି । କ୍ୟାପସନ୍ରେ ପ୍ରଶାନ୍ତ ଲେଖିଥିଲେ, ‘ଆଶା ଯେ ତାଙ୍କର ସମସ୍ତ ପାପ ଧୋଇ ହୋଇଯାଇଥିବ’ । ଘଟଣାରେ ପ୍ରକାଶରାଜ ସମ୍ପୃକ୍ତ ବ୍ୟକ୍ତିଙ୍କ ନାଁରେ ଥାନାରେ ଏତଲା ଦେଇଛନ୍ତି ।
ପ୍ରକାଶରାଜ କହିଛନ୍ତି, ‘ମୁଁ କୌଣସି ଧର୍ମ ବିରୋଧରେ କେବେ କିଛି କହିନାହିଁ । ଏହି ଲୋକେ ଧାର୍ମିକ ଭେଦଭାବ ସୃଷ୍ଟି କରୁଛନ୍ତି । ପ୍ରଶାନ୍ତ କିଏ ତାଙ୍କୁ ମୁଁ ଜାଣି ନାହିଁ । ସେ ଏଆଇ ଟେକ୍ନୋଲୋଜି ବ୍ୟବହାର କରି ମୋ ଫଟୋକୁ ଏଡିଟ କରି ସୋସିଆଲ ମିଡିଆରେ ପୋଷ୍ଟ କରିଛନ୍ତି । ଏହାଦ୍ୱାରା ଭୁଲ୍ ତଥ୍ୟ ବିସ୍ତାର ହେଉଛି । ମହାକୁମ୍ଭ ହିନ୍ଦୁ ଧର୍ମ ଏବଂ ଈଶ୍ୱରଙ୍କ ଉପରେ ଆସ୍ଥା ରଖିଥିବା ଲୋକଙ୍କ ପାଇଁ ପବିତ୍ର ଆୟୋଜନ । କିନ୍ତୁ ମୋର ନକଲି ଫଟୋକୁ ରାଜନୈତିକ ଫାଇଦା ପାଇଁ ବ୍ୟବହାର କରାଯାଉଛି ।
କିଛି ବର୍ଷ ହେଲାଣି ମୋ ବିରୋଧରେ ଏକ ଗୁଜବ ପ୍ରସାର କରାଯାଇଛି ଯେ ମୁଁ କୁଆଡ଼େ ହିନ୍ଦୁ ବିରୋଧୀ । ଆସ୍ଥା ସମ୍ପୂର୍ଣ୍ଣ ଭାବେ ବ୍ୟକ୍ତିଗତ ମାମଲା । ମୁଁ ଈଶ୍ୱରକୁ ବିଶ୍ୱାସ ନ କଲେ ବି ମାନବିକତାକୁ ବିଶ୍ୱାସ କରେ । ଆସ୍ଥା ଉପରେ କେବେ ପ୍ରଶ୍ନ ଉଠାଏ ନାହିଁ, କିନ୍ତୁ ଅନ୍ଧବିଶ୍ୱାସକୁ ବିରୋଧ କରେ । ମୋ ସ୍ତ୍ର, ଝିଅ ମନ୍ଦିର ତଥା ଧାର୍ମିକ ଅନୁଷ୍ଠାନକୁ ଯାଆନ୍ତି ଏବଂ ସେମାନଙ୍କ ବିଶ୍ୱାସକୁ ମୁଁ ସମ୍ମାନ ଦିଏ’ ବୋଲି ପ୍ରକାଶରାଜ କହିଛନ୍ତି । ବିବାଦ ବଢ଼ିବା ପରେ ପ୍ରଶାନ୍ତ ଏହି ଫଟୋକୁ ଡିଲିଟ୍ କରିଦେଇଛନ୍ତି । ପ୍ରଶାନ୍ତଙ୍କୁ ଥାନାକୁ ଡକାଯିବା ସହ ୧୫ ଦିନ ମଧ୍ୟରେ ସଫେଇ ଦେବାକୁ ପୁଲିସ କହିଛି ।
