ନୂଆଦିଲ୍ଲୀ,୦୨/୦୨: ଦିଲ୍ଲୀ ବିଧାନସଭା ନିର୍ବାଚନକୁ ଆଉ ମାତ୍ର ୩ ଦିନ ବାକି ରହିଛି । ପ୍ରଚାର ମୈଦାନ କମ୍ପୁଛି । ଲୋକଙ୍କୁ ପ୍ରତିଶ୍ରୁତି ବର୍ଷା କରୁଛନ୍ତି ରାଜନୈତିକ ଦଳ । ଶାସକ ଆପକୁ ଗାଦିରୁ ହଟାଇବାକୁ ରଣନୀତି ପ୍ରସ୍ତୁତ କରୁଛନ୍ତି ବିଜେପି ଓ କଂଗ୍ରେସ । ଏହାରି ଭିତରେ ଆମ୍ ଆଦମୀ ପାର୍ଟିକୁ ଟାର୍ଗେଟ କରିଛନ୍ତି ବୈଦେଶିକ ବ୍ୟାପାର ମନ୍ତ୍ରୀ ଏସ୍ ଜୟଶଙ୍କର । ଦିଲ୍ଲୀବାସୀ ସେମାନଙ୍କ ମୌଳିକ ସୁବିଧାରୁ ବଞ୍ଚିତ । ପିଇବା ପାଣି, ବିଜୁଳି ଓ ସ୍ବାସ୍ଥ୍ୟସେବା ଯୋଗାଇବାରେ ଦିଲ୍ଲୀ ସରକାର ବିଫଳ ହୋଇଛନ୍ତି । ବହୁତ ପଛରେ ପଡି ଯାଇଛି ଦିଲ୍ଲୀ । ମୁଁ ଯେବେ ବିଦେଶ ଯାଏ ମୋତେ ଲାଜ ଲାଗେ ବୋଲି କହିଛନ୍ତି ଏସ୍ ଜୟଶଙ୍କର ।
ଦିଲ୍ଲୀରେ ଦକ୍ଷିଣ ଭାରତୀୟ ସମୁଦାୟଙ୍କ ସହ ଆଲୋଚନା ସମୟରେ ଆମ୍ ଆଦମୀ ପାର୍ଟିକୁ ଟାର୍ଗେଟ କରି ବୈଦେଶିକ ମନ୍ତ୍ରୀ ଏସ୍ ଜୟଶଙ୍କର ଆହୁରି କହିଛନ୍ତି, ଯେବେ ବି ବିଦେଶ ଯାଏ ମୋତେ ସ୍ବୀକାର କରିବାକୁ ଲାଜ ଲାଗେ କି ଦିଲ୍ଲୀରେ ଲୋକଙ୍କୁ ମୌଳିକ ସୁବିଧା ମିଳିନାହିଁ । ଏମିତିକି ନାଗରିକଙ୍କୁ ଘର, ସିଲିଣ୍ଡର, ଜଳ ଜୀବନ ମିଶନରେ ପାଇବ ଯୋଗେ ପିଇବା ପାଣି ଏବଂ ଆୟୁଷ୍ମାନ ଭାରତ ଯୋଜନାର ସୁବାଧ ମିଳିନାହିଁ । ତେଣୁ ଆଗାମୀ ବିଧାନସଭା ନିର୍ବାଚନରେ ସତ୍ତାରେ ପରିବର୍ତ୍ତନ ହେବା ଦରକାର ।
ଗତ ୧୦ ବର୍ଷରେ ଦିଲ୍ଲୀ କ୍ଷତି ସହିଛି- ଦିଲ୍ଲୀ ଫାଇଟ୍ ପୂର୍ବରୁ ଶାସକ ଆମ୍ ଆଦମୀ ପାର୍ଟିକୁ ଟାର୍ଗେଟ କରିଛନ୍ତି ବୈଦେଶିକ ବ୍ୟାପାର ମନ୍ତ୍ରୀ ଏସ୍ ଜୟଶଙ୍କର । ଗତ ୧୦ ବର୍ଷରେ ଦିଲ୍ଲୀକୁ ପଛରେ ଛାଡି ଦେଇଛି ଆପ୍ । ଏଠାକାର ଲୋକ ସେମାନଙ୍କ ଅଧିକାରରୁ ବଞ୍ଚିତ ଅଛନ୍ତି । ପାନୀୟ ଜଳ, ବିଜୁଳି, ଗ୍ୟାସ ସିଲିଣ୍ଡର ଏବଂ ସ୍ବାସ୍ଥ୍ୟ ସେବାରେ ଦିଲ୍ଲୀବାସୀଙ୍କୁ ସଂଘର୍ଷ କରିବାକୁ ପଡୁଛି । ଯଦି ଏଠାକାର ସରକାର ଯଦି ଲୋକଙ୍କ ଆବଶ୍ୟକତା ପୂରଣ କରିପାରୁନାହିଁ ତେବେ ଫେବୃଆରୀ ୫ ତାରିଖରେ ସରକାର ପରିବର୍ତ୍ତନ କରିବାକୁ ଗମ୍ଭୀରତାର ସହ ଚିନ୍ତା କରିବାକୁ ହେବ ବୋଲି କହିଛନ୍ତି ବୈଦେଶିକ ବ୍ୟାପାର ମନ୍ତ୍ରୀ ଏସ୍ ଜୟଶଙ୍କର ।
ଦିଲ୍ଲୀ ଗାଦି ପାଇଁ ହେବ ତ୍ରିକୋଣୀୟ ଲଢେଇ- ୭୦ ବିଧାନସଭା ଆସନ ପାଇଁ ଆସନ୍ତା ଫେବୃଆରୀ ୫ ତାରିଖରେ ନିର୍ବାଚନ ଅନୁଷ୍ଠିତ ହେବ । ୮ ତାରିଖରେ ଭୋଟ ଗଣତି ସହ ଫଳାଫଳ ପ୍ରକାଶ ପାଇବ । ଦିଲ୍ଲୀରେ ଏକ ତ୍ରିକୋଣୀୟ ଲଢେଇ ଦେଖିବାକୁ ମିଳିବ । ଶାସକ ଆପ୍, ବିଜେପି ଓ କଂଗ୍ରେସ ମଧ୍ୟରେ ଜୋରଦାର ଲଢେଇ ହେବ । ୧୦ ବର୍ଷ ହେବ ସରକାରରେ ରହି ମଧ୍ୟ ଆପ୍ ଦିଲ୍ଲୀବାସୀଙ୍କ ପାଇଁ କିଛି କାମ କରିନାହିଁ । ରାଜଧାନୀଙ୍କ ଆବଶ୍ୟକତାକୁ ପୂରଣ କରିବାରେ ଆମ୍ ଆଦମୀ ପାର୍ଟି ବିଫଳ ହୋଇଛି ବୋଲି କହି ଟାର୍ଗେଟ କରିଛି ବିଜେପି । ତେବେ ଦିଲ୍ଲୀ ନିର୍ବାଚନରେ କିଏ ବାଜି ମାରିବ ତାହା ଉପରେ ସମସ୍ତଙ୍କ ନଜର ରହିଛି ।
