ନୂଆଦିଲ୍ଲୀ,୦୩/୦୨: ଭାରତୀୟ ମହାକାଶ ଗବେଷଣା ସଂସ୍ଥା (ଇସ୍ରୋ)ର ସତ୍ୟ ୧୦୦ତମ ରକେଟ୍ ଅଭିଯାନରେ ସମସ୍ୟା ଦେଖା ଦେଇଛି । ନାଭିଗେସନ୍ ସାଟେଲାଇଟ ଏନଭିଏସ-୦୨ ରେ ବୈଷୟିକ ତ୍ରୁଟି ଦେଖାଦେଇଥିବା ଜଣାପଡିଛି । NVS-02 ସାଟେଲାଇଟରେ ଥ୍ରଷ୍ଟର୍ସ ଫାୟାର କରିବାରେ ବିଫଳ ହୋଇଥିବା ଜଣାପଡିଛି ।
ଉପଗ୍ରହକୁ ନିର୍ଦ୍ଧାରିତ ଅର୍ବିଟାଲ ସ୍ଲଟରେ ଅବସ୍ଥାପିତ କରିବା ଦିଗରେ କକ୍ଷପଥ ବୃଦ୍ଧି ଅଭିଯାନ ସମ୍ଭବ ହୋଇନାହିଁ । ଏକ ଭାଲ୍ବ ନ ଖୋଲିବାରୁ ସମସ୍ୟା ଉପୁଜିଛି । ୟୁ ଆର ରାଓ ସାଟେଲାଇଟ ସେଣ୍ଟର ଦ୍ବାରା ନିର୍ମିତ ଉପଗ୍ରହ ଏନଭିଏସ-୦୨ ଏକ ଜିଓଷ୍ଟେସନାରୀ ସର୍କୁଲା କକ୍ଷପଥରେ ସ୍ଥାପନ କରିବାର ଥିଲା । ଉପଗ୍ରହରେ ଥିଲା ତରଳ ଇଞ୍ଜିନ ଠିକ୍ ଭବରେ କାର୍ଯ୍ୟ ନ କରିବାରୁ ଏହାକୁ ନିର୍ଦ୍ଧାରିତ କକ୍ଷପଥକୁ ପଠାଇବାର ପ୍ରୟାସ ବିଳମ୍ଭ ହୋଇଛି । ଉପଗ୍ରହ ଠିକ୍ ଅଛି ଇଲିପ୍ଟିକାଲ କକ୍ଷପଥରେ ରହିଛି । ସମସ୍ୟାର ସମାଧାନ ପାଇଁ ବିକଳ୍ପ ରଣନୀତି କଣ ରହିବ ସେ ନେଇ କାର୍ଯ୍ୟ ଚାଲିଥିବା ନେଇ ଇସ୍ରୋ ସୂଚନା ଦେଇଛି ।
ଏହା ବି ପଢନ୍ତୁ...ଇସ୍ରୋର ସଫଳ ସେଞ୍ଚୁରୀ ଲଞ୍ଚ ; ମହାକାଶ ଗଲା ନାଭିଗେସନ୍ ସାଟେଲାଇଟ୍ NVS-02
କହି ରଖୁଛୁ କି, ଜାନୁଆରୀ ୨୯ ତାରିଖରେ ଆନ୍ଧ୍ରପ୍ରଦେଶର ଶ୍ରୀହରିକୋଟାରୁ NVS-02 ଉପଗ୍ରହକୁ ଜିଏସଏଲଭି-ଏଫ-୧୫ ରକେଟରେ ମହାକାଶକୁ ପଠାଯାଇଥିଲା । ଏହା ଇସ୍ରୋର ୧୦୦ତମ ଲଞ୍ଚ ଥିଲା ।ମହାକାଶକୁ ଯାଇଥିଲା ନାଭିଗେସନ ସାଟେଲାଇଟ ଏନଭିଏସ-୦୨ । ଜିଏସଏଲଭି-ଏଫ-୧୫ ରକେଟ ଯୋଗେ ଉଡାଣ ଭରିଥିଲା । ଭି. ନାରାୟଣନ ଇସ୍ରୋର ନୂଆ ଅଧ୍ୟକ୍ଷ ଭାବେ ଦାୟିତ୍ବ ନେବା ପରେ ଏହା ପ୍ରଥମ ଅଭିଯାନ ଥିଲା । ଏହି ମିଶନରେ ବର୍ତ୍ତମାନ ତ୍ରୁଟି ଦେଖା ଦେଇଛି ।
ଏନଭିଏସ-୦୨-ନାଭିଗେସନ ଉପଗ୍ରହ ଏନଭିଏସ୍-୦୨ ଭାରତୀୟ ଭୂପୃଷ୍ଠଠାରୁ ପ୍ରାୟ ୧୫୦୦ କିଲୋମିଟର ଦୂରରେ ଥିବା ଅଞ୍ଚଳରେ ଉପଭୋକ୍ତାଙ୍କୁ ସଠିକ୍ ସ୍ଥିତି,ବେଗ ଓ ସମୟ ପ୍ରଦାନ କରିବ । ଇସ୍ରୋ ଅନୁଯାୟୀ ଉପଗ୍ରହର ସେବା ସ୍ଥଳୀୟ, ଆକାଶମାର୍ଗ ଓ ସାମୁଦ୍ରିକ ନେଭିଗେସନ, ନିର୍ଦ୍ଦିଷ୍ଟ କୃଷି, ଫ୍ଲିଟ ମ୍ୟାନେଜମେଣ୍ଟ, ମୋବାଇଲ ଡିଭାଇସରେ ଅବସ୍ଥାନ ଭିତ୍ତିକ ସେବା, ଉପଗ୍ରହର କକ୍ଷପଥ ନିର୍ଦ୍ଧାରଣ, ଇଣ୍ଟରନେଟ ଅଫ୍ ଥିଙ୍ଗ୍ସ ଆଧାରିତ ଆପ୍ଲିକେସନ, ଜରୁରୀକାଳୀନ ଓ ସମୟଭିତ୍ତିକ ସେବା ପ୍ରଦାନରେ ବ୍ୟବହାର କରାଯିବ ।
