ନୂଆଦିଲ୍ଲୀ: ଲୋକସଭାରେ ବିରୋଧୀ ଦଳ ନେତା ଏବଂ କଂଗ୍ରେସ ସାଂସଦ ରାହୁଲ ଗାନ୍ଧୀ ସୋମାବର ବେରୋଜଗାରକୁ ନେଇ ସରକାରଙ୍କ ଉପରେ ବର୍ଷିଛନ୍ତି । ନିଯୁକ୍ତି ସଂପର୍କରେ ଯୁବଗୋଷ୍ଠୀଙ୍କୁ ସଠିକ୍ ତଥ୍ୟ କେନ୍ଦ୍ର ସରକାର ଦେଇପାରି ନାହାନ୍ତି ବୋଲି ସେ ଅଭିଯୋଗ କରିଛନ୍ତି । ରାହୁଲି ଗାନ୍ଧୀ କହିଛନ୍ତି, ରାଷ୍ଟ୍ରପତିଙ୍କ ଭାଷଣ ଶୁଣିଲି, କିନ୍ତୁ କିଛି ନୂଆ କଥା ଶୁଣିପାରିଲି ନାହିଁ । ପୂର୍ବରୁ ଯେଉଁ କଥା କୁହାଯାଇଥିଲା ଠିକ୍ ସେହି କଥାର ପୁନରାବୃତ୍ତି କରିଛନ୍ତି ରାଷ୍ଟ୍ରପତି । ରାହୁଲ ଗାନ୍ଧୀ କହିଛନ୍ତି ଯେ, କୌଣସି ଦେଶ ମୂଳତଃ ଦୁଇଟି ଦିଗକୁ ବ୍ୟବସ୍ଥିତ କରେ । ଆପଣ ପ୍ରଥମେ ଖର୍ଚ୍ଚକୁ ବ୍ୟବସ୍ଥିତ କରିପାରିବେ ଏବଂ ପରେ ଉତ୍ପାଦନକୁ ବ୍ୟବସ୍ଥିତ କରିପାରିବେ । ବର୍ତ୍ତମାନ ସମୟରେ ବ୍ୟବସ୍ଥିତ ଖର୍ଚ୍ଚ କହିଲେ ସେବାକୁ ବଝାଉଛି । ଉତ୍ପାଦନକୁ ବ୍ୟବସ୍ଥିତ କରିବାର ଆଧୁନିକ ଉପାୟ ହେଉଛି ବିନିର୍ମାଣ । କିନ୍ତୁ ବିନିର୍ମାଣ ବ୍ୟତୀତ ଅନେକ କିଛି ଉତ୍ପାଦନ କରିବାର ଅଛି । ଆମ ଦେଶ ବ୍ୟବସ୍ଥିତ ଉତ୍ପାଦନ କ୍ଷେତ୍ରରେ ବିଫଳ ହୋଇଛି ବୋଲି ରାହୁଲ କହିଛନ୍ତି ।
କଂଗ୍ରେସ ସାଂସଦ କହିଛନ୍ତି, ‘ଆମ ପାଖରେ ଉତ୍କୃଷ୍ଟ କମ୍ପାନୀ ଅଛନ୍ତି ଯେଉଁମାନେ ଉତ୍ପାଦନ ସଂଗଠିତ କରିବାକୁ ଚେଷ୍ଟା କରନ୍ତି । ହେଲେ ଆମେ ଯାହା କରିଛୁ ତାହାକୁ ଚୀନ୍ର କମ୍ପାନୀଗୁଡ଼ିକୁ ହସ୍ତାନ୍ତର କରିଦେଇଛୁ। ମୋବାଇଲ୍ ଫୋନ୍, ଯଦିଓ ଆମେ କହୁଛୁ ଯେ ଆମେ ମୋବାଇଲ୍ ଫୋନ୍ ଭାରତରେ ତିଆରି କରୁଛୁ, କିନ୍ତୁ ଏହା ସତ୍ୟ ନୁହେଁ । ଫୋନ୍ ଭାରତରେ ତିଆରି ହୋଇନାହିଁ । ଏହି ଫୋନ୍ ଭାରତରେ ଆସେମ୍ବଲ ହୋଇଛି । ଫୋନ୍ର ସମସ୍ତ ଉପାଦାନ ଚୀନ୍ରେ ତିଆରି ହୋଇଛି ଏବଂ ଆମେ ଚୀନ୍କୁ ଟିକସ ଦେଉଛୁ।’
ରାହୁଲ ଗାନ୍ଧୀ କହିଛନ୍ତି ଯେ, ‘ପ୍ରଧାନମନ୍ତ୍ରୀ ମୋଦୀ 'ମେକ୍ ଇନ୍ ଇଣ୍ଡିଆ' କାର୍ଯ୍ୟକ୍ରମ ଆରମ୍ଭ କରିଥିଲେ । ପରିଣାମ ଆପଣଙ୍କ ସାମ୍ନାରେ ଅଛି । ୨୦୧୪ରେ ଉତ୍ପାଦନ GDPର ୧୫.୩% ରୁ ହ୍ରାସ ପାଇ ଆଜି ୧୨.୬% ହୋଇଛି, ଯାହା ୬୦ ବର୍ଷ ମଧ୍ୟରେ ସର୍ବନିମ୍ନ ଉତ୍ପାଦନକୁ ଦର୍ଶାଉଛି । ମୁଁ ପ୍ରଧାନମନ୍ତ୍ରୀଙ୍କୁ ଦୋଷ ଦେଉନାହିଁ, ଏହା କହିବା ଠିକ୍ ହେବ ନାହିଁ ଯେ ସେ ଚେଷ୍ଟା କରିନଥିଲେ । ମୁଁ କହିପାରିବି ଯେ ପ୍ରଧାନମନ୍ତ୍ରୀ ଚେଷ୍ଟା କରିଥିଲେ, କିନ୍ତୁ ସେ ବିଫଳ ହୋଇଛନ୍ତି ।’
