ନୂଆଦିଲ୍ଲୀ,୦୩/୦୨: କାହାର ହେବ ଦିଲ୍ଲୀ । କିଏ ମାରିବ ବାଜି କାହାର ହେବ ହାର୍ । ଦିନକ ପରେ ଦିଲ୍ଲୀ ଫାଇଟ୍ । ମଝିରେ ଆଉ ଗୋଟିଏ ଦିନ । ଆସନ୍ତା ୫ ତାରିଖରେ ଦିଲ୍ଲୀ ବିଧାନସଭା ନିର୍ବାଚନ ଭୋଟ ଗ୍ରହଣ ହେବ । ଆଜି କ୍ୟାମ୍ପେନ ଶେଷ ଦିନ ଥିବାରୁ କମ୍ପୁଛି ରାଜଧାନୀ ଦିଲ୍ଲୀ । ସବୁ ରାଜନୈତିକ ଦଳ ଦିନରାତି ଏକ କରି ଭୋଟରଙ୍କୁ ମନାଇବାକୁ ଲାଗିଛନ୍ତି । ପ୍ରଚାରର ଶେଷ ଦିନରେ ଜୋରଦାର ପ୍ରଚାର କରିଛନ୍ତି ସବୁ ରାଜନୈତିକ ଦଳ ।
ବିଶେଷ କରି ଦିଲ୍ଲୀ ନିର୍ବାଚନରେ ଏକ ହାଇଭୋଲ୍ଟେଜ ତ୍ରିକୋଣୀୟ ଲଢେଇ ହେବ । ଶାସକ ଆପ୍, ବିଜେପ ଓ କଂଗ୍ରେସ ମଧ୍ୟରେ କଡ୍ଡା ଟକ୍କର ଦେଖିବାକୁ ମିଳିବ । ଆଜି ପ୍ରଚାର ଶେଷ ଦିନ ଥିବାକୁ ସବୁ ରାଜନୈତିକ ଦଳ ଜୋରଦାର କ୍ୟାମ୍ପେନ କରିଛନ୍ତି । ପରସ୍ପରକୁ ଟାର୍ଗେଟ କରିଛନ୍ତି । ଭୋଟରଙ୍କୁ ପ୍ରତିଶ୍ରୁତି ପରେ ପ୍ରତିଶ୍ରୁତି ଦେଇଛନ୍ତି । ଭୋଟରଙ୍କୁ ମନେଇବାକୁ ସବୁ ବଳ ଲଗାଇ ଦେଇଛନ୍ତି ।
ଗତକାଲି (ରବିବାର) ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦିଲ୍ଲୀ ଗସ୍ତ କରି ନିର୍ବାଚନ ରାଲିକୁ ସମ୍ବୋଧନ କରିବା ସହିତ ଶାସକ ଆପକୁ ଟାର୍ଗେଟ କରିଥିଲେ । ଆପ୍ ଗଡରେ ବିଜୟ ପାଇଁ ପ୍ରାଣମୂର୍ଚ୍ଛା ଉଦ୍ୟମ ଚଳାଇଛି ଭାରତୀୟ ଜନତା ପାର୍ଟି । ନିର୍ବାଚନ ତାରିଖ ଘୋଷଣା ପରେ ଦିଲ୍ଲୀ ଗସ୍ତ କରି ନିର୍ବାଚନୀ ରାଲିକୁ ସମ୍ବୋଧନ କରିବା ସହ ଆପକୁ ଟାର୍ଗେଟ କରିଥିଲେ । ଆପକୁ 'ଆପଦା' ନାମ ଦେଇଥିଲେ ପ୍ରଧାନମନ୍ତ୍ରୀ । ଦିଲ୍ଲୀରେ ଆପ୍ ଯିବ ବିଜେପି ଆସିବ ବୋଲି ରଣ ହୁଙ୍କାର ଦେଇଥିଲେ ପିଏମ ମୋଦି । ପିଇବା ପାଣି, ଶିକ୍ଷା, ସ୍ବାସ୍ଥ୍ୟ ଓ ମଦ ଦୁର୍ନୀତିକୁ ମୁଦ୍ଦା କରିଛି ଭାରତୀୟ ଜନତା ପାର୍ଟି ।
ତୃତୀୟ ଥର ଦିଲ୍ଲୀବାସୀଙ୍କ ବିଶ୍ବାସ ଜିତିବାକୁ ଜୋରଦାର ପ୍ରସ୍ତୁତି କରୁଛି ଆମ୍ ଆଦମୀ ପାର୍ଟି । ଲୋକଙ୍କୁ ମାଳମାଳ ପ୍ରତିଶ୍ରୁତି ଦେଇଛି ଦଳ । କ୍ୟାମ୍ପେନ ଶେଷ ଦିନରେ ଆପ୍ ସୁପ୍ରିମୋ ଅରବିନ୍ଦ କେଜ୍ରିୱାଲ ଛତରପୁର ଓ କାଲକାଜୀରେ ନର୍ବାଚନୀ ରାଲି କରିବେ । କାଲକାଜୀରୁ ମୁଖ୍ୟମନ୍ତ୍ରୀ ଆତିଶୀ ଦ୍ବିତୀୟ ଥର ପାଇଁ ପ୍ରାର୍ଥୀ ହୋଇଛନ୍ତି । ସେପଟେ ଏଥିରୁ ବାଦ ପଡିନି ପ୍ରମୁଖ ରାଜନୈତିକ ଦଳ କଂଗ୍ରେସ । ଶିଲ୍ଲା ଦୀକ୍ଷିତଙ୍କ ପରେ ଆଉ ବିଜୟ ସ୍ବାଦ ଚାଖିନାହିଁ କଂଗ୍ରେସ । ଏଥର କମବ୍ୟାକ କରିବ ବୋଲି ଆଶା ରଖିଛି କଂଗ୍ରେସ ।
ଏହା ବି ପଢନ୍ତୁ...୧୦ବର୍ଷରେ ପଛରେ ପଡିଯାଇଛି ଦିଲ୍ଲୀ; ମୋତେ ବିଦେଶରେ ଲାଜ ଲାଗୁଛି, କାହିଁକି ଏମିତି କହିଲେ ଜୟଶଙ୍କର
ଆସନ୍ତା ଫେବୃଆରୀ ୨୩ ତାରିଖରେ ଦିଲ୍ଲୀ ବିଧାନସଭା କାର୍ଯ୍ୟକାଳ ସରୁଛି । ୭୦ ଆସନ ବିଶିଷ୍ଟ ଦିଲ୍ଲୀ ବିଧାନସଭା ପାଇଁ ଆସନ୍ତା ଫେବୃଆରୀ ୫ ତାରିଖରେ ନିର୍ବାଚନ ଅନୁଷ୍ଠିତ ହେବ । ୮ ତାରିଖରେ ଫଳାଫଳ ପ୍ରକାଶ ପାଇବ । ତୃତୀୟ ଥର ଦିଲ୍ଲୀବାସୀଙ୍କ ବିଶ୍ବାସ ଜିତିବାକୁ କଳବଳ ଲଗାଇ ଦେଇଛି ଆମ୍ ଆଦମୀ ପାର୍ଟି । ମୋଟା ମୋଟି କହିବାକୁ ଗଲେ ଦିଲ୍ଲୀ ନିର୍ବାଚନ ପାଇଁ ଆପ୍, ବିଜେପି ଓ କଂଗ୍ରେସ ମଧ୍ୟରେ ଏକ ହାଇଭୋଲ୍ଟେଜ କ୍ୟାମ୍ପେନ ଦେଖିବାକୁ ମିଳିଛି । ଆଜି (ସୋମବାର) ସନ୍ଧ୍ୟା ୫ଟାରେ ପ୍ରଚାର ଶେଷ ହେବ । ଦିଲ୍ଲୀରେ ମୋଟ ୧.୫୫ କୋଟି ପଞ୍ଜୀକୃତ ଭୋଟର ରହିଛନ୍ତି । ସେମାନଙ୍କ ମଧ୍ୟରୁ ୮୩.୪୯ ଲକ୍ଷ ପୁରୁଷ ଭୋଟର ରହିଥିବା ବେଳେ ୭୧.୭୪ ଲକ୍ଷ ମହିଳା ଭୋଟର ରହିଛନ୍ତି । ପ୍ରଥମ କରି ୨.୦୮ ଲକ୍ଷ ଭୋଟର ମତଦାନ ସାବ୍ୟସ୍ତ କରିବେ । ୨୫.୮୯ ଲକ୍ଷ ଯୁବ ଭୋଟର ରହିଛନ୍ତି । ୧,୨୬୧ ତୃତୀୟ ଲିଙ୍ଗି ଭୋଟର ରହିଛନ୍ତି ।
