ପାଟନା: କଂଗ୍ରେସ ନେତା ଡକ୍ଟର ଶକିଲ ଅହମ୍ମଦ ଖାନଙ୍କ ପୁଅ ଆୟାନ ଜାହିଦ ଖାନ ଆହ୍ମହତ୍ୟା କରିଥିବା ଜଣାପଡ଼ିଛି । ବିହାରର ପାଟନାରେ ଥିବା ଘରେ ଆୟାନ ଜାହିଦଙ୍କ ମୃତଦେହ ଉଦ୍ଧାର ହୋଇଛି । ଏହି ଖବର ପ୍ରଚାରିତ ହେବା ପରେ କଂଗ୍ରେସ ନେତାଙ୍କ ପରିବାର ଏବଂ ବନ୍ଧୁମାନେ ଗର୍ଦ୍ଦାନିବାଗ ବାସଭବନରେ ପହଞ୍ଚିଛନ୍ତି । ଆୟାନଙ୍କ ବୟସ ୧୮ ବର୍ଷ ହୋଇଥିବା ବେଳେ ସେ ଗତ ରାତିରେ ତାଙ୍କ ରୁମ୍ରେ ଏକା ଶୋଇଥିଲେ । ସକାଳେ ସେ ନଉଠିବାରୁ ପରିବାର ଲୋକେ କବାଟ ଭାଙ୍ଗି ଭିତରେ ପଶିଥିଲେ । ଆୟାନ ସିଲିଂ ଫ୍ୟାନରେ ଝୁଲୁଥିବା ଦେଖିବାକୁ ପାଇଥିଲେ ପରିବାର ଲୋକେ । ଘଟଣା ସଂପର୍କରେ ସୂଚନା ପାଇବା ପରେ ବରିଷ୍ଠ ପୋଲିସ ଅଧିକାରୀ ଏବଂ ଏକ ଫରେନସିକ୍ ଦଳ ଘଟଣାସ୍ଥଳରେ ପହଞ୍ଚିଥିଲେ । ପୋଲିସ ମାମଲା ରୁଜୁ କରି ତଦନ୍ତ କରୁଥିବା ଜଣାପଡ଼ିଛି ।
ଶକିଲ ଅହମ୍ମଦ ଖାନ ମୂଳତଃ କଟିହାର ଜିଲ୍ଲାର କବରକୋଠି ଗ୍ରାମର ବେସିନ୍ଦା । ସେ ପାଟନା ବିଶ୍ୱବିଦ୍ୟାଳୟରୁ ସ୍ନାତକ ପାସ୍ କରିବା ପରେ ଦିଲ୍ଲୀର ଜେଏନୟୁରୁ ଏମଏ, ଏମଫିଲ୍ ଏବଂ ପିଏଚଡି କରିଛନ୍ତି । ପାଠପଢ଼ା ଶେଷ ହେବା ପରେ, ସେ ୧୯୯୯ରେ କଂଗ୍ରେସରେ ଯୋଗ ଦେଇଥିଲେ । ପରେ ସେ ଅନେକ ପଦ ବଦବୀରେ ରହି କାର୍ଯ୍ୟ କରିଛନ୍ତି । ଏବେ ସେ କଂଗ୍ରେସର ରାଷ୍ଟ୍ରୀୟ ସାଧାରଣ ସଂପାଦକ ଥିବା ବେଳେ ବିହାରରେ ବିଧାୟକ ମଧ୍ୟ ଅଛନ୍ତି ।
ଉଲ୍ଲେଖନୀୟ ଯେ, ଶକିଲ ଅହମ୍ମଦ ଖାନ ୨୦୧୫ ମସିହାରେ ପ୍ରଥମ ଥର ପାଇଁ କଂଗ୍ରେସ ଦଳରୁ କଟିହାରର କଡୱା ବିଧାନସଭା ନିର୍ବାଚନମଣ୍ଡଳୀରୁ ପ୍ରତିଦ୍ୱନ୍ଦ୍ୱିତା କରିଥିଲେ ଏବଂ ବିଜୟୀ ହୋଇ ବିଧାୟକ ହୋଇଥିଲେ । ୨୦୨୦ ମସିହାରେ ମଧ୍ୟ ଦ୍ୱିତୀୟ ଥର ପାଇଁ କଂଗ୍ରେସ ଦଳ ତାଙ୍କୁ ସୁଯୋଗ ଦେଇଥିଲା ଏବଂ ସେ ପୁଣି ଥରେ ଜିତିଥିଲେ । ଏହା ପରେ, ଦଳ ତାଙ୍କୁ ବିଧାୟକ ଦଳର ନେତା ଭାବରେ ନିର୍ବାଚିତ କରିଥିଲା । ଏବେ ବିହାରରେ କଂଗ୍ରେସର ୧୯ ଜଣ ବିଧାୟକ ଅଛନ୍ତି ।
