ନୂଆଦିଲ୍ଲୀ: ଦିଲ୍ଲୀ ନିର୍ବାଚନ ପ୍ରଚାରର ଆଜି ଶେଷ ଦିନ। ଦିନକ ପରେ ଅର୍ଥାତ ଆସନ୍ତା ଫ୍ରେବୃୟାରି 5 ତାରିଖରେ ହେବ ଭୋଟଗ୍ରହଣ। ଆଜିର ଶେଷ ନିର୍ବାଚନି ପ୍ରଚାରରେ ଭାଗ ନେଇ ଆପ୍(AAP) ମୁଖିଆ ଅରବିନ୍ଦ କେଜ୍ରିୱାଲ ପ୍ରଥମ ଥର ପାଇଁ ତାଙ୍କ ଦଳ ଦିଲ୍ଲୀରେ କେତେଟି ଆସନ ଜିତିବ ସେନେଇ ଦାବି କରିଛନ୍ତି। ଦିଲ୍ଲୀରେ ଥିବା ମୋଟ ୭୦ଟି ବିଧାନସଭା ଆସନରୁ ଆପ୍ ମୋଟ ୫୫ଟି ସିଟରେ ଜିତିବ ବୋଲି କେଜ୍ରିୱାଲ ଦାବି କରିଛନ୍ତି।
“ମୋ ଅନୁମାନ ଅନୁଯାୟି ଆମ୍ ଆଦମି ପାର୍ଟି ଚଳିତ ନିର୍ବାଚନରେ ମୋଟ ୫୫ଟି ସିଟ ହାତେଇବାକୁ ଯାଉଛି। କିନ୍ତୁ ଯଦି ମହିଳା ଭୋଟର ନିଜେ ଚାହାନ୍ତି କିମ୍ବା ତାଙ୍କ ଘର ଲୋକଙ୍କୁ ବୁଝାନ୍ତି ତେବେ ସିଟ ସଂଖ୍ୟା ୬୦ ଟପିବ” ବୋଲି କେଜ୍ରିୱାଲ କହିଛନ୍ତି। ତେବେ ସୂଚନା ମୁତାବକ ୨୦୧୫ ନିର୍ବାଚନରେ ଆପ୍ ମୋଟ ୬୭ଟି ସିଟ ଜିତିଥିବା ବେଳେ ୨୦୨୦ ନିର୍ବାଚନରେ ମୋଟ୍ ୬୨ଟି ସିଟ୍ ଜିତିଥିଲା।
ବିଜେପି ଦାବି କରୁଥିବା ନୂଆଦିଲ୍ଲୀ, କଲକାଜି ଓ ଜଙ୍ଗପୁରା ଆସନରେ ଆପ୍, ବିଜେପିକୁ ହାଇ ଭୋଲ୍ଟେଜ ଟକ୍କର ଦେବ। ନୂଆଦିଲ୍ଲୀ ଆସନରେ ଆପ୍ ବିପକ୍ଷ ଦଳମାନଙ୍କୁ ଏୈତିହାସିକ ବ୍ୟବଧାନରେ ପରାସ୍ତ କରିବ ବୋଲି କେଜ୍ରିୱାଲ କହିଛନ୍ତି। ତେବେ କେଜ୍ରିୱାଲ ନିଜେ ନୂଆଦିଲ୍ଲୀ ଆସନରୁ ପ୍ରତିଦ୍ୱନ୍ଦିତା କରୁଥିବା ବେଳେ ଏହି ଆସନ ପାଇଁ ବିଜେପିର ପାର୍ଥି ପରଭେଶ ସିଂ ବର୍ମା ଓ କଂଗ୍ରେସ ପାର୍ଥି ସନ୍ଦୀପ ଦିକ୍ଷୀତ ତାଙ୍କ ସହ ପ୍ରତିଦ୍ୱନ୍ଦିତା କରୁଛନ୍ତି।
ବର୍ତ୍ତମାନ ଦିଲ୍ଲୀର ମୁଖ୍ୟମନ୍ତ୍ରୀ ଥିବା ଅତୀଶି କଲକାଜି ଆସନରୁ ବିଜେପି ପାର୍ଥି ରମେଶ ବିଦୁରିଙ୍କ ବିପକ୍ଷରେ ଲଢୁଛନ୍ତି। ଅନ୍ୟପଟେ ଦିଲ୍ଲୀର ପୂର୍ବତନ ଉପ-ମୁଖ୍ୟମନ୍ତ୍ରୀ ମନିଷ ସିଶୋଦିଆ ଜଙ୍ଗପୁରା ଆସନରୁ ପୂର୍ବତନ ବିଧାୟକ ତଥା କଂଗ୍ରେସ ପାର୍ଥି ତରବିନ୍ଦର ସିଂ ମରୱାଙ୍କ ବିପକ୍ଷରେ ଲଢେଇ କରୁଛନ୍ତି। ଏହି ତିନୋଟି ଆସନ ଆପ୍ ପାଇଁ ସମ୍ମାନର ବିଷୟ ହୋଇଥିବା ବେଳେ ଆପ୍ ଏହି ତିନୋଟି ଆସନରେ ଜିତିବା ପାଇଁ ନିଜର ପ୍ରଚେଷ୍ଟା ଜାରି ରଖିଛି।
ଦିଲ୍ଲୀରେ ବର୍ତ୍ତମାନ ତ୍ରିମୁଖି ଲଢେଇ ଜାରି ରହିଛି। କେଜ୍ରିୱାଲଙ୍କ ଦଳ ଦିଲ୍ଲୀ ଆସନ ହାତେଇବା ପାଇଁ ସରକାର ବିରୋଧି ଲଢେଇ ଜାରି ରଖିଥିବା ବେଳେ, ବିଜେପି ଆପ୍ କୁ କ୍ଷମତାଚ୍ୟୁତ କରିବା ପାଇଁ ନିଜ ପ୍ରୟାଶ ଜାରି ରଖିଛି। ଅନ୍ୟପଟେ କଂଗ୍ରେସ ୧୫ ବର୍ଷ ଧରି ଶାସନ କରିଥିବା ନିଜ ପୁରୁଣା ଗଡକୁ ଫେରିପାଇବା ପାଇଁ ନିଜ ଉଦ୍ୟମ ଜାରି ରଖିଛି।
ତେବେ ଆସନ୍ତା ୫ ତାରିଖରେ ସଂପୂର୍ଣ୍ଣ ଦିଲ୍ଲୀରେ ବିଧାନ ସଭା ନିର୍ବାଚନ ହେବାକୁ ଯାଉଛି। ଯାହାର ଫଳ ଫ୍ରେବୃୟାରି ୮ ତାରିଖରେ ପ୍ରକାଶ ପାଇବ। ତେବେ ଦିଲ୍ଲୀ ନିର୍ବାଚନରେ ନିଜ ଦଳ ଜିତିବା ନେଇ କେଜ୍ରିୱାଲ ଦୃଢ ଆଶା ବ୍ୟକ୍ତ କରିଥିବା ବେଳେ ମହିଳା ଭୋଟର ମାନଙ୍କ ଭୋଟ ଦିଲ୍ଲୀରେ କିଏ ଶାସନ କରିବ ତାହା ନିର୍ଧାରଣ କରିବ ବୋଲି ରିପୋର୍ଟ ପ୍ରକାଶ ପାଇଛି।
