ପାରାଦୀପ, ୭।୩(ଭାଗିରଥୀ ମଲ୍ଲିକ): ସରକାରୀ ଚାକିରିରୁ ସେବା ନିବୃତ୍ତ ହୋଇଗଲେ । ହେଲେ ଅବସର ପରେ ବି ସେ ନିଃଶୁଳ୍କ ସେବା କାର୍ଯ୍ୟ ଜାରି ରଖିଛନ୍ତି । ଏପରି ଜଣେ ମହିୟସୀ ସେବିକା ହେଲେ ପାରାଦୀପ ଷଣ୍ଢକୁଦର ପ୍ରେମଲତା ବାରିକ(୬୨) । ୧୯୮୩ ସେପ୍ଟମ୍ବର ୨୩ରେ ଏରସମାରେ ସ୍ୱାସ୍ଥ୍ୟକର୍ମୀ ଭାବେ ଚାକିରି ଆରମ୍ଭ କରି ୨୦୨୩ ଏପ୍ରିଲ ୩୦ରେ ସ୍ୱାସ୍ଥ୍ୟ ପରିଦର୍ଶିକା ଭାବେ ଅବସର ନେଇଛନ୍ତି । ସେ ୧୯୯୭ରେ ରାଜ୍ୟପାଳଙ୍କଠାରୁ ମଦର ଟେରେସା ସମ୍ମାନ ଓ ୨୦୨୦ରେ ରାଷ୍ଟ୍ରପତିଙ୍କଠାରୁ ନାସନାଲ୍ ଫ୍ଲୋରେନ୍ସ ନାଇଟେଙ୍ଗଲ୍ ପୁରସ୍କାର ପାଇଛନ୍ତି । ଗଞ୍ଜାମ ଆଡପଡ଼ା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଥିବା ବେଳେ ଗୋଟିଏ ମାସରେ ୨୫୦ ମହିଳାଙ୍କର ପ୍ରସବ କରାଇଥିଲେ ପ୍ରେମଲତା ।
ନବେ ଦଶକରେ ପରିବାର ନିୟନ୍ତ୍ରଣ ଅସ୍ତ୍ରୋପଚାର ଉପରେ ଗୁରୁତ୍ୱ ଦିଆଯାଉଥିଲା । ସେତେବେଳେ ଅପରେସନ ପରେ ଜଣେ ସ୍ତ୍ରୀ ଲୋକଙ୍କୁ ସେ ଘରକୁ ନେଇଥିଲେ । ସେଥିପାଇଁ ସଂପୃକ୍ତ ମହିଳାଙ୍କ ସ୍ୱାମୀଙ୍କଠାରୁ ସେ ଗାଳି ଖାଇଥିବା ଦୁଃଖଦ ଘଟଣା ଥିଲା ବୋଲି କହିଛନ୍ତି ପ୍ରେମଲତା । ୨୦୨୪ ଜାନୁଆରୀ ୬ ତାରିଖ କଥା ମନେପକାଇ ସେ କହନ୍ତି, ସକାଳୁ ମୁଁ ଉଠି ମୁହଁ ଧୋଉଥିବାବେଳେ ହଠାତ ଖବର ଆସିଲା ନୂଆବଜାର ଛକରେ ଜଣେ ପ୍ରସୂତି କଷ୍ଟ ପାଉଛନ୍ତି । ଯାଇ ଦେଖିଲା ବେଳକୁ ସେ ଗରିବ ଲୋକଟି ତା’ ଗର୍ଭବତୀ ସ୍ତ୍ରୀଙ୍କୁ ଏକ ଟ୍ରଲିରେ ମେଡିକାଲ୍ ନେଉଛି କିନ୍ତୁ ଆଉ ଯାଇପାରୁନି । ଶିଶୁର ମୁଣ୍ଡ ବାହାରି ଆସିଲାଣି । ସଙ୍ଗେ ସଙ୍ଗେ ସ୍ଥାନୀୟ ଲୋକଙ୍କୁ କହି ଲୁଗା, ବେଡ୍ସିଟ୍ ଆଣି ତଳେ ପକାଇ ଚାରିକଡ ଘୋଡ଼ାଇ ପ୍ରସବ କରାଇଥିଲି ।’ ପ୍ରେମଲତାଙ୍କର ଏପର୍ଯ୍ୟନ୍ତ ୬ଟି ପୁସ୍ତକ ଭକ୍ତି ପ୍ରେମାଞ୍ଜଳି, ଦେହ ନିରୋଗ ଧରା ସରଗ ଆଦି ପ୍ରକାଶିତ ହୋଇଥିବା ବେଳେ ଅନ୍ୟ ଏକ ପୁସ୍ତକ ଶେଷ ସଳିତାର ନିଆଁ ପ୍ରକାଶ ଅପେକ୍ଷାରେ ।
