କରଞ୍ଜିଆ, ୧୦।୩: ଅଟୋ ଚାଳକଙ୍କ ମୃତ୍ୟୁ ଘଟଣାର ପର୍ଦ୍ଦାଫାଶ ହୋଇଛି । ପୋଲିସର ତଦନ୍ତ ପରେ ଗତ ବୁଧବାର ରରୁଆଁ ଥାନା ତେରଣ୍ଟୀ ଗାଁରେ ଥିବା ମା' ତାରିଣୀ ଷ୍ଟିଲ୍ ପ୍ଲାଣ୍ଟ ପଛରେ ଏକ ପରିତ୍ୟକ୍ତ କୂଅରୁ ଏକ ଅଖା ମିଳିଥିଲା । ଅଖା ଭିତରୁ ହାତ ଗୋଡ଼ ବନ୍ଧାହୋଇଥିବା ଜଣେ ବ୍ୟକ୍ତିଙ୍କ ମୃତଦେହ ମିଳିଥିଲା । ମୃତଦେହଟି କେନ୍ଦୁଝର ଜିଲ୍ଲା ତୁରୁମୁଙ୍ଗା ଥାନା ଅନ୍ତର୍ଗତ ତ୍ରିବିନ୍ଧା ଗ୍ରାମର ଅଟୋ ଚାଳକ ନିରଞ୍ଜନ ନାଏକଙ୍କର ବୋଲି ଜଣାପଡ଼ିଥିଲା । ପୋଲିସ ମୃତଦେହ ଉଦ୍ଧାର କରିବା ପରେ ଘଟଣାରେ ସମ୍ପୃକ୍ତ ଅଭିଯୁକ୍ତ ବିଷୟରେ ଖୋଳତାଡ଼ ଆରମ୍ଭ କରିଥିଲା ।
ପରକ୍ରୀୟା ପ୍ରୀତି ଯୋଗୁଁ ଏହି ହତ୍ୟାକାଣ୍ଡ ହୋଇଥିବା ପୋଲିସ ଜାଣିବାକୁ ପାଇଥିଲା । ହତ୍ୟାକାଣ୍ଡଟି ଅଟୋ ଚାଳକଙ୍କ ପ୍ରେମିକା ଘଟାଇଥିବା ପୋଲିସ ସୂଚନା ଦେଇଛି । ସ୍ଵାମୀ ସହ ମିଶି ଠେଙ୍ଗା ଓ ପଥର ସାହାଯ୍ୟରେ ମୁଣ୍ଡକୁ ବାଡ଼େଇ ବାଡ଼େଇ ହତ୍ୟା କରିଥିଲା ପ୍ରେମିକା । ଅଭିଯୁକ୍ତ ଦମ୍ପତିଙ୍କୁ ପୋଲିସ ଗିରଫ କରି କୋର୍ଟ ଚାଲାଣ କରିଛି । ଉଭୟ ଦମ୍ପତି ରରୁଆଁ ଥାନା ପାଣ୍ଡରଶିଳ ଗାଁର ବିଶ୍ୱନାଥ ବେହେରା ଓ ରଶ୍ମିତା ବେହେରା ବୋଲି ଜଣାପଡ଼ିଛି ।
