ଜଗତସିଂହପୁର,୧୦/୦୩: ଅଣଶୁଦ୍ଧିଆ ହୋଇଥିବାରୁ ଶ୍ରେଣୀଗୃହ ଭିତରକୁ ପୂରାଇ ଦିଆଗଲା ନାହିଁ । ଶ୍ରେଣୀ ବାହାରେ ବସି ପାଠ ପଢ଼ିଲେ ପିଲା । ପ୍ରଧାନଶିକ୍ଷକଙ୍କ ଛୁଆଁ ଅଛୁଆଁ ମନୋଭାବରୁ ଏଭଳି ମାନସିକ ଦଣ୍ଡ ମିଳିଛି ବାଲିକୁଦା ମଣ୍ଡଳ ଶିକ୍ଷା କାର୍ଯ୍ୟାଳୟ ନାଗପୁର କ୍ଲଷ୍ଟର ଠାକୁରପାଟଣା ପ୍ରାଥମିକ ବିଦ୍ୟାଳୟରେ ।
ପରିବାରରେ ଅଶୌଚ (ଅଣଶୁଦ୍ଧିଆ) ଚାଲିଥିବାରୁ ୩ ଜଣ ଛାତ୍ରଛାତ୍ରୀଙ୍କୁ ଏଭଳି ଦଣ୍ଡ ଭୋଗିବାକୁ ପଡ଼ିଛି । ନିଜ ସାଙ୍ଗ ସାଥୀଙ୍କଠାରୁ ଅଲଗା ରହି ଶ୍ରେଣୀଗୃହ ବାହାରେ ପାଠ ପଢ଼ୁଥିବାର ଦୃଶ୍ୟ ଦେଖିବାକୁ ମିଳିଛି । ଏହି ସମୟର ଭିଡିଓ ଏବେ ଭାଇରାଲ୍ ହେବା ସହିତ ଏହାକୁ ନେଇ ଚର୍ଚ୍ଚା ଲାଗି ରହିଛି । ଏହାକୁ ନେଇ ଅଭିଭାବକ ମହଲରେ ତୀବ୍ର ଅସନ୍ତୋଷ ଦେଖା ଦେଇଛି । ଯେଉଁଠି ଛୁଆଁ ଅଛୁଆଁ ଭେଦଭାଦ ଭୁଲି ମଣିଷ ଜାତି ଏକ ବୋଲି ନାରା ଦିଆଯାଉଛି ଓ ବିଶେଷ କରି ବିଦ୍ୟାଳୟ ଭଳି ମନ୍ଦିରରେ ଏହି ମନୋବୃତ୍ତି କାହାରି ମନରେ ନ ଆସିବା ପାଇଁ କାହିଁ ସରକାର ସଚେତନ କରି ଆସୁଛନ୍ତି ସେଠାରେ ଶିକ୍ଷକ, ଶିକ୍ଷୟିତ୍ରୀମାନେ ପିଲାଙ୍କ ମନରେ ଭେଦଭାବ ସୃଷ୍ଟି କରିବା କେତେ ଯଥାର୍ଥ ବୋଲି ପ୍ରଶ୍ନ ଉଠିଛି ।
ଏହି ଘଟଣା ଜିଲ୍ଲା ଶିକ୍ଷାଧିକାରୀଙ୍କଠାରୁ ଆରମ୍ଭ କରି ମଣ୍ଡଳ ଶିକ୍ଷାଧିକାରୀଙ୍କ ପର୍ଯ୍ୟନ୍ତ ସବୁଠି ଆଲୋଚନାର ବିଷୟ ପାଲଟିଛି । ଘଟଣାର ଆପୋସ ସମାଧାନ କରାଯାଇଥିବା କେତେକ ଅଭିଭାବକ ମତ ଦେଇଥିବା ବେଳେ ବିଇଓ ବିଜୟ ସ୍ୱାଇଁ ଘଟଣା ସମ୍ପର୍କରେ ଅବଗତ ଥିବା କହିଛନ୍ତି ।
