ଭୁବନେଶ୍ୱର,୦୯/୦୩:କର୍ଣାଟକରେ ଓଡ଼ିଆ ଯୁବକଙ୍କୁ ହତ୍ୟା ଘଟଣା । କର୍ଣାଟକରୁ କର୍ଗୋ ବିମାନ ଯୋଗେ ଭୁବନେଶ୍ୱର ବିମାନବନ୍ଦରରେ ପହଞ୍ଚିଲା ଓଡ଼ିଆ ଯୁବକ ବିଭାସଙ୍କ ମୃତଦେହ । ମୃତଦେହ ନେବାକୁ ବିଭାସ ନାୟକଙ୍କ ପରିବାର ଲୋକେ ପହଞ୍ଚିଥିବା ବେଳେ ତାଙ୍କ ମରଶରୀରକୁ ଆଜି ଆମ୍ବୁଲାନ୍ସ ଯୋଗେ ଗାଆଁକୁ ନିଆଯିବା ନେଇ ସୂଚନା ମିଳିଛି ।
ତେବେ କର୍ଣ୍ଣାଟକର ପ୍ରସିଦ୍ଧ ପର୍ଯ୍ୟଟନସ୍ଥଳୀ ହାମ୍ପିଠାରେ ଜଣେ ଇସ୍ରାଏଲୀ ଯୁବତୀଙ୍କ ସମେତ ଦୁଇଜଣଙ୍କୁ ଗଣଦୁଷ୍କର୍ମ କରାଯାଇଥିଲା। ଜଣେ ଓଡ଼ିଆ ଯୁବକଙ୍କୁ ହତ୍ୟା କରାଯାଇଛି । ଘଟଣାରେ ସମ୍ପୃକ୍ତ ୩ ଜଣଙ୍କ ମଧ୍ୟରୁ ୨ ଜଣ ଗିରଫ ହୋଇଥିବା ବେଳେ ଅନ୍ୟ ଜଣକୁ ଖୋଜିବା ପାଇଁ କର୍ଣ୍ଣାଟକ ପୁଲିସ ତନାଘନା ଚଳାଇଛି । ତୁଙ୍ଗଭଦ୍ରା ନଦୀକୂଳରେ ଗତ ୬ ତାରିଖ ରାତି ପ୍ରାୟ ସାଢ଼େ ୧୦ଟାରେ ଘଟିଥିବା ଏହି ଘଟଣା କର୍ଣ୍ଣାଟକରେ ଆଲୋଡ଼ନ ଖେଳାଇ ଦେଇଥିଲା । ପୁଲିସ ସୂଚନା ମୁତାବକ, ପୀଡ଼ିତା ଯୁବତୀଙ୍କ ସହ ୩ ଜଣ ଅନ୍ୟ ପୁରୁଷ ପର୍ଯ୍ୟଟକ ଥିଲେ । ଏମାନଙ୍କ ମଧ୍ୟରେ ଆମେରିକାର ଡାନିଏଲ୍, ମହାରାଷ୍ଟ୍ରର ପଙ୍କଜ ଏବଂ ଓଡ଼ିଶା କନ୍ଧମାଳ ଜିଲ୍ଲାର ବିଭାସ ନାୟକ ଥିଲେ । ଦୁର୍ବୃତ୍ତମାନେ ଯୁବତୀଦ୍ୱୟଙ୍କୁ ଗଣବଳାତ୍କାର କରିବା ପୂର୍ବରୁ ୩ ପୁରୁଷ ପର୍ଯ୍ୟଟକଙ୍କୁ ଧକ୍କା ମାରି ହ୍ରଦ ମଧ୍ୟକୁ ଠେଲିଦେଇଥିଲେ । ଡାନିଏଲ୍ ଓ ପଙ୍କଜ ପହଁରି ବାହାରି ଯାଇଥିଲେ । କିନ୍ତୁ ବିଭାସ ପାଣିରେ ବୁଡ଼ି ପ୍ରାଣ ହରାଇଥିଲେ ।
କର୍ଣ୍ଣାଟକ ପୁଲିସ ଓଡ଼ିଶାର ବିଭାସଙ୍କୁ ଖୋଜିବା ଲାଗି ମାର୍ଚ୍ଚ ୭ରେ ଉଦ୍ଧାର ଅଭିଯାନ ଆରମ୍ଭ କରିଥିଲା । ଅଗ୍ନିଶମ କର୍ମଚାରୀଙ୍କ ବ୍ୟତୀତ ପୁଲିସ ଓ ସନ୍ଧାନୀ କୁକୁର ଅଭିଯାନରେ ସାମିଲ ହୋଇଥିଲେ । ମାର୍ଚ୍ଚ ୮ ଅର୍ଥାତ ଶନିବାର ସକାଳେ ବିଭାସଙ୍କ ମୃତଦେହ ଘଟଣାସ୍ଥଳଠାରୁ ପ୍ରାୟ ୨ କିଲୋମିଟର ଦୂର ହ୍ରଦ ନିକଟବର୍ତ୍ତୀ ପାୱାର ହାଉସ୍ ପାଖରୁ ମିଳିଛି । ଗଣଦୁଷ୍କର୍ମ ଶିକାର ହୋଇଥିବା ଦୁଇ ଯୁବତୀଙ୍କ ମଧ୍ୟରୁ ଜଣେ ଇସ୍ରାଏଲୀ ନାଗରିକ ଥିବା ବେଳେ ଅନ୍ୟ ଜଣକ ହୋମ୍ଷ୍ଟେ ମାଲିକାଣୀ ।ପ୍ରକାଶ ଥାଉକି, ମୃତକ ବିଭାସ ଦାରିଙ୍ଗବାଡ଼ି ଥାନା ଅନ୍ତର୍ଗତ ତେରାବାଡ଼ି ଗ୍ରାମର ମୂଳ ବାସିନ୍ଦା । ବିଭାସଙ୍କ ବାପା ବିଜୟ ନାୟକ ପୂର୍ବରୁ ଫୁଲବାଣୀରେ ବିଶପ ଥିଲେ । ବର୍ଷେ ତଳେ ତାଙ୍କର ଉତ୍ତର ଭାରତ ମଣ୍ଡଳୀର ଆଗ୍ରାର ବିଶପ ତଥା ଦିଲ୍ଲୀ ସିନଦର ମଡ୍ରେଟର ଭାବେ ବଦଳି ହୋଇଥିଲା । ସେ ଏବେ ଆଗ୍ରାରେ ସପରିବାର ରହୁଛନ୍ତି । ବିଭାସ ଇଟାଲୀ, ଜାପାନ ଇସ୍ରାଏଲ୍, ଜର୍ମାନ, ନେପାଳ ଆଦି ଦେଶ ଭ୍ରମଣ କରିଛନ୍ତି । ସେ କିଛିଦିନ ପୂର୍ବରୁ ଇସ୍ରାଏଲରୁ ଫେରି ବିଦେଶୀ ସାଙ୍ଗଙ୍କ ସହ କର୍ଣ୍ଣାଟକ ବୁଲିବାକୁ ଯାଇଥିଲେ । ପୁଅର ମୃତ୍ୟୁ ଖବର ପାଇ ବାପା ବିଜୟ ବେଙ୍ଗାଲୁରୁ ଠାରେ ପହଞ୍ଚି କର୍ଣ୍ଣାଟକ ଉପ ମୁଖ୍ୟମନ୍ତ୍ରୀଙ୍କୁ ଭେଟି ଦୋଷୀ ବିରୋଧରେ କାର୍ଯ୍ୟାନୁଷ୍ଠାନ ଦାବି କରିଛନ୍ତି ।
