ନୂଆଦିଲ୍ଲୀ: ଜିମ୍ବାଓ୍ବେ ଗସ୍ତରେ ଯିବାକୁ ଥିବା ଟିମ୍ ଇଣ୍ଡିଆରେ ବଡ଼ ପରିବର୍ତ୍ତନ ହୋଇଛି । ବିସିସିଆଇ ପକ୍ଷରୁ ମିଳିଥିବା ସୂଚନା ଅନୁସାରେ, ଶିବମ ଦୁବେ ଓ୍ବେଷ୍ଟ ଇଣ୍ଡିଜ୍ରେ ଜାରି ଟି-୨୦ ବିଶ୍ବକପ୍ ପରେ ଜିମ୍ବାଓ୍ବେ ଯିବେ । ଶିବମ ଦୁବେଙ୍କୁ ଜିମ୍ବାଓ୍ବେ ପାଇଁ ଟିମ୍ ଇଣ୍ଡିଆରେ ଏଥିପାଇଁ ସ୍ଥାନ ଦିଆଯାଇଛି କାରଣ ଅଲରାଉଣ୍ଡର ନୀତୀଷ ରେଡ୍ଡି ଆହତ ହୋଇଥିବାରୁ ଦଳରୁ ବାଦ ପଡ଼ିଛନ୍ତି ।
ନୀତୀଶ ରେଡ୍ଡିଙ୍କ ଶରୀରରେ କେଉଁଠି ଆଘାତ ଲାଗିଛି ସେନେଇ ସ୍ପଷ୍ଟ ସୂଚନା ମିଳିନାହିଁ । ଜିମ୍ବାଓ୍ବେ ବିପକ୍ଷରେ ଟି-୨୦ ସିରିଜ୍ ଜୁଲାଇ ୬ରୁ ଆରମ୍ଭ ହେବ । ଏହି ସିରିଜ୍ରେ ଟିମ୍ ଇଣ୍ଡିଆର ନେତୃତ୍ବ ନେବେ ଶୁଭମନ ଗିଲ୍ । ସନରାଇଜର୍ସ ହାଇଦ୍ରବାଦ ପାଇଁ ଆଇପିଏଲରେ ଦମଦାର ପ୍ରଦର୍ଶନ କରିଥିବା ନୀତୀଷ ରେଡ୍ଡିଙ୍କୁ ପ୍ରଥମ ଥର ଟିମ୍ ଇଣ୍ଡିଆରେ ଖେଳିବାକୁ ସୁଯୋଗ ମିଳିଥିଲା । ବ୍ୟାଟିଂ ସହ ସେ ଭଲ ବୋଲିଂ କରିପାରୁଛନ୍ତି । ତାଙ୍କର ବୋଲିଂ ସ୍ପିଡ୍ ମଧ୍ୟ ୧୪୦ କିଲୋମିଟର ପ୍ରତି ଘଣ୍ଟା । ଜିମ୍ବାଓ୍ବେ ବିପକ୍ଷ ସିରିଜ୍ରେ ତାଙ୍କର ଅନ୍ତର୍ଜାତୀୟ ଡେବ୍ୟୁ ଏକ ପ୍ରକାର ନିଶ୍ଚିତ ଥିଲା କିନ୍ତୁ ସେ ଆହତ କାରଣରୁ ବଡ଼ ସୁଯୋଗରୁ ବଞ୍ଚିତ ହୋଇଛନ୍ତି ।
ଶିବମ ଦୁବେଙ୍କୁ ଟି-୨୦ ବିଶ୍ବକପରେ ଖେଳିବାକୁ ସୁଯୋଗ ମିଳିଛି । ତାଙ୍କୁ ମଧ୍ୟକ୍ରମରେ ବଡ଼ ଶଟ୍ ଖେଳିବାକୁ ସୁଯୋଗ ଦେଇଛି ଟିମ୍ ଇଣ୍ଡିଆ । ସେ ଏହି ବିଶ୍ବକପରେ ୨୬.୫୦ ଆଭରେଜ୍ରେ ୧୦୬ ରନ୍ କରିଛନ୍ତି । ତାଙ୍କର ଷ୍ଟ୍ରାଇକ୍ ରେଟ୍ ୧୦୭.୭ ରହିଛି । ଏବେ ତାଙ୍କୁ ଜିମ୍ବାଓ୍ବେ ଗସ୍ତରେ ପଠାଇବାକୁ ନିଷ୍ପତ୍ତି ନେଇଛି ବିସିସିଆଇ । ଏହି ସମୟରେ ସେ ନିଜକୁ ପ୍ରମାଣିତ କରିବାକୁ ଚେଷ୍ଟା କରିବେ ।
ଜିମ୍ବାଓ୍ବେ ବିପକ୍ଷରେ ଭାରତୀୟ ଟିମ୍
ଜିମ୍ବାଓ୍ବେ ଗସ୍ତରେ ଏକାଧିକ ଯୁବ ଖେଳାଳି ଡେବ୍ୟୁ କରିପାରନ୍ତି । ଅଭିଷେକ ଶର୍ମା, ଧ୍ରୁବ ଜୁରେଲ୍, ରିୟାନ ପରାଗ, ତୁଷାର ଦେଶପାଣ୍ଡେଙ୍କୁ ପ୍ରଥମ ଥର ଟି-୨ ଟିମ୍ରେ ସ୍ଥାନ ମିଳିଛି । ଋତୁରାଜ ଗାଏକ୍ବାଡ୍, ଓ୍ବାଶିଂଟନ ସୁନ୍ଦର, ରବି ବିଷ୍ଣୋଇ, ଖଲିଲ ଅହମ୍ମଦଙ୍କ ପ୍ରତ୍ୟାବର୍ତ୍ତନ ହୋଇଛି ।
ଟିମ୍ ଇଣ୍ଡିଆ ସ୍କ୍ବାଡ୍: ଶୁଭମନ ଗିଲ୍ (ଅଧିନାୟକ), ଯଶସ୍ବୀ ଜୟସ୍ବାଲ, ଅଭିଷେକ ଶର୍ମା, ଋତୁରାଜ ଗାଏକ୍ବାଡ୍, ରିଙ୍କୁ ସିଂହ, ସଞ୍ଜୁ ସାମସନ, ଧ୍ରୁବ ଜୁରେଲ୍, ଶିବମ ଦୁବେ, ଓ୍ବାଶିଂଟନ୍ ସୁନ୍ଦର, ରବି ବିଷ୍ଣୋଇ, ଆଭେଶ ଖାନ, ଖଲିଲ ଅହମ୍ମଦ, ମୁକେଶ କୁମାର ଏବଂ ତୁଷାର ଦେଶପାଣ୍ଡେ ।