ବ୍ରିଜ୍ଟାଉନ,୨୯/୦୬: ଆଜି ଭାରତ ଓ ଦକ୍ଷିଣ ଆଫ୍ରିକା ମଧ୍ୟରେ ଟି-ଟ୍ୱେଣ୍ଟି ବିଶ୍ୱକପ୍ ଫାଇନାଲ୍ ଖେଳାଯିବ । ଏହି ମ୍ୟାଚ୍ ଶେଷ ହେବା ପରେ ଟିମ୍ ଇଣ୍ଡିଆ ମୁଖ୍ୟ କୋଚ୍ ରାହୁଲ ଦ୍ରାବିଡ଼ଙ୍କ କାର୍ଯ୍ୟକାଳ ସମାପ୍ତ ହେବ । ରୋହିତ ବାହିନୀ ବିଶ୍ୱକପ୍ ଟ୍ରଫି ଜିତି ଦ୍ରାବିଡ଼ଙ୍କୁ ବିଦାୟ ଦେବାକୁ ଲକ୍ଷ୍ୟ ରଖିଛି । ୨୦୨୧ ଟି-ଟ୍ୱେଣ୍ଟି ବିଶ୍ୱକପ୍ ପରେ ସେ ପୂର୍ବତନ କୋଚ୍ ରବି ଶାସ୍ତ୍ରୀଙ୍କ ସ୍ଥାନରେ ମୁଖ୍ୟ କୋଚ୍ ନିଯୁକ୍ତ ହୋଇଥିଲେ।
କୋଚ୍ ଭାବେ ଶେଷ ମ୍ୟାଚ୍ ପୂର୍ବରୁ ଦ୍ରାବିଡ଼ କହିଛନ୍ତି, ଭାରତୀୟ ଦଳକୁ କୋଚିଂ ଦେବା ମୋ’ ପାଇଁ ଶିକ୍ଷଣୀୟ ରହିଥିଲା । ଖେଳାଳିମାନଙ୍କ ସହ ମୁଁ ଭଲ ସମ୍ପର୍କ ସ୍ଥାପନ କରିଥିଲି । ଏହା ସବୁବେଳେ ମନେ ପଡ଼ିବ । ଚଳିତ ଟୁର୍ଣ୍ଣାମେଣ୍ଟରେ ଦଳୀୟ ପ୍ରଦର୍ଶନକୁ ନେଇ ମୁଁ ବହୁତ ଖୁସିି। ଶନିବାର ଦଳ ଶ୍ରେଷ୍ଠ ପ୍ରଦର୍ଶନ ଦେବ ବୋଲି ଆଶା କରୁଛି । ଫାଇନାଲ୍ ଭେନ୍ୟୁରେ ଆମେ ପୂର୍ବରୁ ଏକ ମ୍ୟାଚ୍ ଖେଳିସାରିଛୁ । ପିଚ୍କୁ ନେଇ ଖେଳାଳିମାନ ଅବଗତ ଅଛନ୍ତି ।
ସେ ଆହୁରି କହିଛନ୍ତି, ବର୍ଷକ ମଧ୍ୟରେ ଆମ ଦଳ ଚତୁର୍ଥ ଆଇସିସି ଟୁର୍ଣ୍ଣାମେଣ୍ଟର ଫାଇନାଲ୍ ଖେଳିବାକୁ ଯାଉଛି । ଦଳୀୟ ପ୍ରଦର୍ଶନ ବଳରେ ଆମେ ଏଠାରେ ପହଞ୍ଚି ପାରିଛୁ । ସବୁ ଖେଳାଳି ଦଳ ବିଜୟରେ ଯୋଗଦାନ ଦେଇଛନ୍ତି । ଦକ୍ଷିଣ ଆଫ୍ରିକାକୁ ହରାଇବାକୁ ହେଲେ ଆମକୁ ସବୁ ବିଭାଗରେ ଦୃଢ଼ ପ୍ରଦର୍ଶନ କରିବାକୁ ପଡ଼ିବ । ଏଥର ଭାଗ୍ୟ ଆମ ସାଥ୍ ଦେବ ମୋର ଆଶା ।
