ବ୍ରିଜଟାଉନ୍,୨୯/୦୬: ଆଉ ମାତ୍ର କିଛି ଘଣ୍ଟାର ଅପେକ୍ଷା । ଚଳିତ ଟି-ଟ୍ୱେଣ୍ଟି ବିଶ୍ୱକପ୍ର ଟାଇଟଲ ଲଢ଼େଇରେ ଅବତ୍ତୀର୍ଣ୍ଣ ହେବେ ଦୁଇ ସଫଳ ଦଳ ଭାରତ ଓ ଦକ୍ଷିଣ ଆଫ୍ରିକା । ଭାରତ ୭ମାସର ବ୍ୟବଧାନ ପରେ ପୁଣି ଥରେ ଏକ ବିଶ୍ୱକପ୍ର ଫାଇନାଲ୍ ଖେଳିବାକୁ ଯାଉଛି । ମାତ୍ର ଦକ୍ଷିଣ ଆଫ୍ରିକା ପାଇଁ ସମ୍ପୂର୍ଣ୍ଣ ନୂଆ ଏହି ଟାଇଟଲ ମୁକାବିଲା । ପୂର୍ବରୁ ଦକ୍ଷିଣ ଆଫ୍ରିକା କେବେ ବି କୌଣସି ବିଶ୍ୱକପ ଫାଇନାଲ୍ ଖେଳିପାରି ନାହିଁ । ସେଥିପାଇଁ ଦକ୍ଷିଣ ଆଫ୍ରିକାକୁ ‘ଚୋକର୍ସ’ ଆଖ୍ୟା ମିଳିଛି । ମାତ୍ର ଏଥର ସବୁ ଆଲୋଚନା ଓ ସମାଲୋଚନାର ଅନ୍ତ ଘଟାଇ ଦକ୍ଷିଣ ଆଫ୍ରିକା ଚାମ୍ପିଅନ୍ ହେବାକୁ ଅଣ୍ଟା ଭିଡ଼ିଛି । ବାରମ୍ବାର ବହୁ ଶକ୍ତିଶାଳୀ ଦଳକୁ ଏକତରଫା ଭାବେ ହରାଇ ସାରିଥିବା ଭାରତ ମଧ୍ୟ ଏକ ଆଇସିସି ଟ୍ରଫି ପାଇଁ ଅପେକ୍ଷା କରି ରହିଛି । ତେଣୁ ଦକ୍ଷିଣ ଅଫ୍ରିକାକୁ ଏତେ ସହଜରେ ସ୍ୱପ୍ନ ପୂରଣ କରିବାକୁ ଭାରତ ସୁଯୋଗ ଦେବ ନାହିଁ ।
ୱାଣ୍ଡରର୍ସରୁ ବ୍ରିଜଟାଉନ୍
୧୭ ବର୍ଷ ଧରି ଭାରତ ଅପେକ୍ଷା କରି ରହିଛି । ୨୦୦୭ରେ ଅନୁଷ୍ଠିତ ପ୍ରଥମ ଟି-ଟ୍ୱେଣ୍ଟି ବିଶ୍ୱକପ୍ରେ ପାକିସ୍ତାନକୁ ହରାଇ ଭାରତ ଚାମ୍ପିଅନ୍ ହୋଇଥିଲା । ଜୋହାନ୍ସବର୍ଗର ୱାଣ୍ଡରର୍ସ ଷ୍ଟାଡ଼ିୟମ୍ରେ ଖେଳା ଯାଇଥିଲା ଫାଇନାଲ୍ ମୁକାବିଲା । ଦୀର୍ଘ ବର୍ଷ ପରେ ଭାରତ ପୁନର୍ବାର ଫାଇନାଲ୍ରେ ପ୍ରବେଶ କରିଛି । ଏଥର ଏକ ଭିନ୍ନ ଷ୍ଟାଡ଼ିୟମ୍ । ବାର୍ବାଡସ୍ର ବ୍ରିଜଟାଉନ୍ ସ୍ଥିତ କେନସିଙ୍ଗଟନ ଓଭାଲ୍ ଗ୍ରାଉଣ୍ଡରେ ଆଉ ଏକ ସଫଳ ଫର୍ଦ୍ଦ ଯୋଡିବାକୁ ଭାରତ ଅପେକ୍ଷା କରି ରହିଛି ।
ଭାରତ ୪-୨ ଦକ୍ଷିଣ ଆଫ୍ରିକା
ଟି-ଟ୍ୱେଣ୍ଟି ବିଶ୍ୱକପ୍ରେ ଉଭୟ ଦଳ ପୂର୍ବରୁ ପରସ୍ପରକୁ ୬ଥର ଭେଟିଛନ୍ତି । ଏଥିରୁ ଭାରତ ୪ଟି ମ୍ୟାଚ୍ ଜିତିଛି ଓ ଦକ୍ଷିଣ ଆଫ୍ରିକା ୨ଟି ମ୍ୟାଚ୍ରେ ବିଜୟୀ ହୋଇଛି । ୨୦୦୭ ସଂସ୍କରଣରେ ଭାରତ ୩୭ ରନ୍ରେ ଦକ୍ଷିଣ ଆଫ୍ରିକାକୁ ହରାଇଥିଲା । ୨୦୦୯ରେ ଦକ୍ଷିଣ ଆଫ୍ରିକା ୧୨ ରନ୍ରେ ବିଜୟୀ ହୋଇଥିଲା । ଏହାପରେ ଭାରତ ୨୦୧୦ରେ ୧୪ରନ୍, ୨୦୧୨ରେ ୧ରନ୍ ଓ ୨୦୧୪ରେ ୬ ୱିକେଟ୍ରେ ବିଜୟ ହାସଲ କରିଥିଲା । ୨୦୨୨ ସଂସ୍କରଣରେ ଉଭୟ ଦଳ ପରସ୍ପରକୁ ପୁନର୍ବାର ଭେଟିଥିଲେ ଓ ଦକ୍ଷିଣ ଆଫ୍ରିକା ୫ୱିକେଟ୍ରେ ବିଜୟ ହାସଲ କରିଥିଲା ।
ପେସ୍ -ସ୍ପିନ ଲଢ଼େଇ
ପୂର୍ବ ରେକର୍ଡକୁ ଦେଖିଲେ ଭାରତର ପଲା ଭାରି ଜଣା ପଡ଼ୁଛି । ମାତ୍ର ଦକ୍ଷିଣ ଆଫ୍ରିକା କଠିନ ପରିଶ୍ରମ କରି ଫାଇନାଲ୍ରେ ପହଞ୍ଚିଛି । ତେଣୁ ଭାରତକୁ ଏତେ ସହଜରେ ଜିତିବାକୁ ଦଳ ସୁଯୋଗ ଦେବ ନାହିଁ । ଟାଇଟଲ୍ ସ୍ୱପ୍ନକୁ ଏଥର ସଫଳ କରିବାକୁ ଦକ୍ଷିଣ ଆଫ୍ରିକା ଜୋରଦାର ପ୍ରୟାସ କରିବ । ଅସଲରେ ଦେଖିବାକୁ ଗଲେ ବୋଲରମାନେ ବିଜୟରେ ନିର୍ଣ୍ଣାୟକ ଭୂମିକା ଗ୍ରହଣ କରିବେ । ପେସ୍ ବାହିନୀଙ୍କ ପ୍ରଦର୍ଶନ ବଳରେ ଦକ୍ଷିଣ ଆଫ୍ରିକା ଲିଗ୍ ପର୍ଯ୍ୟାୟରୁ ସେମି ଫାଇନାଲ୍ ପର୍ଯ୍ୟନ୍ତ ଆସିଛି । କାଗିସୋ ରାବାଡା, ମାର୍କୋ ଜାନସେନ ଓ ଆନରିଚ ନର୍ଜଙ୍କୁ ନେଇ ଗଠିତ ପେସ୍ ବିଭାଗ ଶୁଖିଲା ପିଚ୍ରେ ମଧ୍ୟ ଘାତକ ବୋଲିଂ କରିଛନ୍ତି । କିନ୍ତୁ ଭାରତ ସ୍ପିନରଙ୍କ ପ୍ରଦର୍ଶନ ବଳରେ ଆଧିପତ୍ୟ ଜାରି ରଖିଛି । ତଥାପି ଦଳ ନିକଟରେ ଯଥେଷ୍ଟ ପେସ୍ ପାୱାର ରହିଛି । ଅର୍ଶଦୀପ ସିଂହ ୧୫ଟି ଓ ଯଶପ୍ରୀତ ବୁମରା ୧୩ଟି ୱିକେଟ୍ ନେଇ ସାରିଛନ୍ତି । କୁଲଦୀପ ଯାଦବ ୧୦ଟି ଓ ଅକ୍ଷର ପଟେଲ ୮ଟି ୱିକେଟ୍ ଅକ୍ତିଆର କରିଛନ୍ତି ।
ଫାଇନାଲ୍ରେ ରିଜର୍ଭ ଡେ’
ୱେଷ୍ଟ ଇଣ୍ଡିଜ୍ରେ ବର୍ଷା ଅନେକ ମ୍ୟାଚ୍ରେ ବାଧା ଉପୁଯାଇଛି । ମାତ୍ର ଫାଇନାଲ ମ୍ୟାଚ୍କୁ ନେଇ ଚିନ୍ତା ନାହିଁ । ଆସନ୍ତା କାଲି ବର୍ଷା ହେଲେ ୩୦ ତାରିଖରେ ବାକି ଖେଳ ହେବ । ବର୍ଷା ଯୋଗୁଁ ଅତି କମ୍ରେ ୧୦ ଓଭର ଖେଳ ସମ୍ଭବ ହୋଇ ନପାରିଲେ ପରଦିନ ବାକି ଭାଗ ଖେଳାଯିବ । ୨ଦିନ ଯାକ ବର୍ଷା ଯୋଗୁଁ ଖେଳ ସମ୍ପୂର୍ଣ୍ଣ ହୋଇ ନପାରିଲେ ଉଭୟ ଦଳ ଯୁଗ୍ମ ବିଜେତା ଘୋଷିତ ହେବେ ।
ଟସ୍ ଜିତିଲେ ବ୍ୟାଟିଂ
କେନସିଙ୍ଗଟନ ଓଭାଲ ଗ୍ରାଉଣ୍ଡରେ ଚଳତି ଟୁର୍ଣ୍ଣାମେଣ୍ଟର ନବମ ମ୍ୟାଚ୍ ଖେଳାଯିବ । ଦକ୍ଷିଣ ଆଫ୍ରିକା ଏହି ଗ୍ରାଉଣ୍ଡରେ ପ୍ରଥମ ମ୍ୟାଚ୍ ଖେଳିବାକୁ ଯାଉଛି । ଭାରତ ପୂର୍ବରୁ ଗୋଟିଏ ମ୍ୟାଚ୍ ଖେଳି ସାରିଛି । ସୁପର-୮ ରାଉଣ୍ଡ୍ରେ ଭାରତ ଏହି ଗ୍ରାଉଣ୍ଡ୍ରେ ଆଫଗାନିସ୍ତାନକୁ ଭେଟିଥିଲା ଓ ୪୭ ରନ୍ରେ ବିଜୟୀ ହୋଇଥିଲା । ପିଚ୍ ବ୍ୟାଟିଂ ଅନୁକୂଳ ଥିଲେ ହେଁ ସ୍ପିନରମାନେ ଉପଯୁକ୍ତ ଫାଇଦା ଉଠାଇ ପାରିବେ । ପିଚ୍ ସାମାନ୍ୟ ମନ୍ଥର ରହିବା ଅନୁମାନ କରାଯାଉଛି । ଟସ ବିଜୟୀ ଦଳ ବ୍ୟାଟିଂ ନିଷ୍ପତ୍ତି ନେବା ଏକ ପ୍ରକାର ନିଶ୍ଚିତ ।
ସମ୍ଭାବ୍ୟ ଏକାଦଶ
ଭାରତ: ରୋହିତ ଶର୍ମା(ଅଧିନାୟକ), ବିରାଟ କୋହଲି, ରିଷଭ ପନ୍ତ, ସୂର୍ଯ୍ୟକୁମାର ଯାଦବ, ଶିବମ ଦୁବେ, ହାର୍ଦ୍ଦିକ ପାଣ୍ଡ୍ୟା, ରବିନ୍ଦ୍ର ଜାଡେଜା, ଅକ୍ଷର ପଟେଲ, କୁଲଦୀପ ଯାଦବ, ଅର୍ଶଦୀପ ସିଂହ, ଯଶପ୍ରୀତ ବୁମରା ।
ଦକ୍ଷିଣ ଆଫ୍ରିକା: କ୍ୱିଣ୍ଟନ ଡି କକ୍, ରିଜା ହେଣ୍ଡରିକ୍ସ, ଆଡେନ ମାରକ୍ରମ(ଅଧିନାୟକ), ଟ୍ରିଷ୍ଟନ ଷ୍ଟବ୍ସ, ହେନରିକ କ୍ଲାସେନ, ଡେଭିଡ୍ ମିଲର, ମାର୍କୋ ଜାନସେନ, କେଶବ ମହାରାଜ, କାଗିସୋ ରାବାଡା, ଆନରିଚ ନର୍ଜ, ତାବ୍ରେଜ ସାମସି