କଟକ,୫/୭ :   ସାମାନ୍ୟ ବର୍ଷାରେ ଭାଙ୍ଗିଲା ନେତାଜୀ ସେବା ସଦନର ପାଚେରୀ । ନେତାଜୀ ସଂଗ୍ରହାଳୟକୁ ଲାଗିକି ଥିବା ନେତାଜୀ ସେବା ସଦନ କଟକର ଏକ ଐତିହ୍ୟ ସମ୍ପନ୍ନ ଡାକ୍ତରଖାନା । ଗତ ୪ବର୍ଷ ତଳେ ଏହି ଡାକ୍ତରଖାନାର ନବୀକରଣ ସହ ନୂଆ ପାଚେରୀ ନିର୍ମାଣ କରାଯାଇଥିଲା । ନିର୍ମାଣ ସମୟରେ ସ୍ଥାନୀୟ ବାସିନ୍ଦାମାନେ ନିମ୍ନ ମାନର କାମ ହେଉଥିବା ନେଇ ଅଭିଯୋଗ କରିଥିଲେ ମଧ୍ୟ ସମ୍ପୃକ୍ତ ଠିକାଦାର କିମ୍ବା ପ୍ରଶାସନିକ ଅଧିକାରୀ ଏଥିପ୍ରତି କର୍ଣ୍ଣପାତ କରିନଥିଲେ । 

ଗତକାଲି ବିଳମ୍ବିତ ରାତିରେ ଏହି ପାଚେରୀଟି ଭୁଶୁଡି ପଡିଛି, ଫଳରେ ପାଚେରୀ କଡ଼ରେ ଥିବା ଦୁଇଟି କାର ଓ ଗୋଟିଏ ବୋଲେରୋ ଗାଡି କ୍ଷତିଗ୍ରସ୍ତ ହୋଇଛି । ପାଚେରୀ ନିର୍ମାଣରେ ନାମକୁ ମାତ୍ର ସିମେଣ୍ଟ ବ୍ୟବହାର କରାଯାଇଥିବା ଓ ମଝିରେ କୌଣସି ଢଳେଇ ଖୁଣ୍ଟ ନ ଥିବାରୁ ପାଚେରୀଟି ଭୁଶୁଡି ପଡ଼ିଲା ବୋଲି ସ୍ଥାନୀୟ ବାସିନ୍ଦା କହିଛନ୍ତି । ଏଭଳି ନିମ୍ନ ମାନର କାମ ପାଇଁ ସମ୍ପୃକ୍ତ ଠିକାଦାର ଓ ଅଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ସ୍ଥାନୀୟ ଲୋକେ ଦାବି କରିଛନ୍ତି । ସେପଟେ ସିଏମସି କମିଶନର କହିଛନ୍ତି ଘଟଣାର ଅନୁସନ୍ଧାନ କରି ଦୋଷୀଙ୍କ ବିରୁଦ୍ଧରେ କାର୍ଯ୍ୟନୁଷ୍ଠାନ ଗ୍ରହଣ କରାଯିବ।