ନୀଳଗିରି, ୭/୭: କଥାରେ ଅଛି ରଖେ ହରି ତ ମାରେ କିଏ । ହସ୍ପିଟାଲରେ ଫିଡ୍ସରେ ହାତ ଗୋଡ଼ ବଙ୍କା ହୋଇ ଚେତାଶୂନ୍ୟରେ ଜୀବନ ମରଣ ସହିତ ସଂଗ୍ରାମ କରୁଥିଲେ ଜଣେ ଛାତ୍ର । ବାପା, ମାଆ ଏକମାତ୍ର ପୁଅର ଆଶା ମଧ୍ୟ ଛାଡ଼ି ଦେଇଥିଲେ । ହେଲେ ତୃତୀୟ ଶ୍ରୀକ୍ଷେତ୍ର ନୀଳଗିରିରେ ମହାପ୍ରଭୁଙ୍କ ଧଣ୍ଡା ଶରୀର ସ୍ପର୍ଶ ଜଣେ ଛାତ୍ରଙ୍କୁ ନୂଆ ଜୀବନ ଦେଇଛି । ମାନସିକ ପୂରଣ ପାଇଁ ଛାତ୍ର ଜଣକ ରଥଦାଣ୍ଡରେ ଦଣ୍ଡ ମାରି ମହାପ୍ରଭୁଙ୍କ ସରଣ ପଶିଛନ୍ତି ।
ମୟୁରଭଞ୍ଜ ଜିଲ୍ଲା କପ୍ତିପଦା କାଲାଡାହି ଗ୍ରାମର ହରିଶ୍ଚନ୍ଦ୍ର ମହାନ୍ତି ଓ ସୁସଂଗୀତାଙ୍କର ଏକମାତ୍ର ପୁଅ ଉଦିତ୍ ନାରାୟଣ । ଉଦିତ୍ ୮ ବର୍ଷର ହୋଇଥିବା ବେଳେ ଫିଡ୍ସ ଓ ଜ୍ଵରରେ ପୀଡ଼ିତ ହୋଇ ବାଲେଶ୍ଵର ମୁଖ୍ୟ ଡାକ୍ତରଖାନାରେ ଭର୍ତ୍ତି ହୋଇଥିଲେ । ବହୁ ଦିନଧରି ତାଙ୍କର ଚେତା ଆସିନଥିଲା । ପୁଅର ବଞ୍ଚିବାର ସମ୍ଭାବନା କମ୍ ଥିବା ଡାକ୍ତରଙ୍କଠାରୁ ଏଭଳି କଥା ଶୁଣି ପୁଅ ପାଇଁ ଆଶା ଛାଡ଼ି ଦେଇଥିଲେ ବାପା ମାଆ । ହେଲେ ନୀଳଗିରି ଅଞ୍ଚଳର ଉଦିତ୍ର ଆଇ ରାଧାମଣି ନୀଳଗିରି ଜଗନ୍ନାଥ ମନ୍ଦିରକୁ ଯାଇ ମାନସିକ କରିବା ସହ ମହାପ୍ରଭୁଙ୍କ ଧଣ୍ଡାନେଇ ଶଯ୍ୟାରେ ଶୋଇଥିବା ଉଦିତ୍ଙ୍କ ଉପରେ ରଖିଥିଲେ । କିଛି ସମୟ ପରେ ଉଦିତ୍ ଡୋଳା ଓଲଟାଇ ହାତଗୋଡ଼ ହଲାଇବା ପରେ ଏହା ଦେଖି ଡାକ୍ତର ମଧ୍ୟ ଅବାକ୍ ହୋଇଯାଇଥିଲେ । ପରେ ଉଦିତ ସମ୍ପୂର୍ଣ୍ଣ ସୁସ୍ଥ ହୋଇଥିବା ବେଳେ ତାଙ୍କ ଗୋଡ଼ ସାମାନ୍ୟ ବଙ୍କା ହୋଇଯାଇଥିଲା । ବର୍ତ୍ତମାନ ସେ ଡିପ୍ଲୋମା କରୁଛନ୍ତି ।
ଆଜି ପବିତ୍ର ରଥଯାତ୍ରା ପାଇଁ ନୀଳଗିରି ଚଳଚଞ୍ଚଳ ହୋଇ ଉଠିଥିଲା । ଉଦିତ୍ ଶିବ ମନ୍ଦିରଠାରୁ ଜଗନ୍ନାଥ ମନ୍ଦିର ପର୍ଯ୍ୟନ୍ତ ଦଣ୍ଡ ମାରି ମହାପ୍ରଭୁଙ୍କ ଶରଣରେ ଆଶିଷ କାମନା କରିଛନ୍ତି । ତେବେ ପୁଅ ସମ୍ପୂର୍ଣ୍ଣ ସୁସ୍ଥ ହୋଇ ଏବେ ପାଠ ପଢ଼ୁଥିବା ବେଳେ ମହାପ୍ରଭୁ ତାଙ୍କ ପୁଅକୁ ନୂଆ ଜୀବନ ଦେଇଥିବା କହିଛନ୍ତି ଉଦିତ୍ର ବାପା ମାଆ ।
