ନୂଆଦିଲ୍ଲୀ: ଜମ୍ମୁକାଶ୍ମୀର ଓ ହରିୟାଣା ବିଧାନସଭା ନିର୍ବାଚନକୁ ନେଇ ଏକଜିଟ୍ ପୋଲ୍ ସାମ୍ନାକୁ ଆସିଛି । ବିଭିନ୍ନ ଏଜେନ୍ସି ଦ୍ଵାରା କରାଯାଇଥିବା ଏକଜିଟ୍ ପୋଲରେ କଂଗ୍ରେସ ପାଇଁ ଆସିଛି ଖୁସିର ଖବର। ଏକଜିଟ୍ ପୋଲ୍ ଅନୁସାରେ ବିଜେପିକୁ ଜମ୍ମୁକାଶ୍ମୀରରେ ନିରାଶ ହେବାକୁ ପଡ଼ିପାରେ। ଅନ୍ୟପଟେ ଇଣ୍ଡିଆ ମେଣ୍ଟ ସଂଖ୍ୟା ଗରିଷ୍ଠତା ସହ ସରକାର ଗଢିପାରେ ।
ପବ୍ଲିକ ଟିଭି ମ୍ୟାଟ୍ରିଜ- ଏହି ଏକଜିଟ୍ ପୋଲ୍ ଅନୁସାରେ ବିଜେପିକୁ ୨୮ରୁ ୩୦ ସିଟ୍ ମିଳିପାରେ । ଅନ୍ୟପଟେ କଂଗ୍ରେସ ଓ ଏନସି ମେଣ୍ଟ ସଂଖ୍ୟା ଗରିଷ୍ଠତା ହାସଲ କରିପାରେ । ଏଥିରୁ ଏକାକୀ ନ୍ୟାସନାଲ କନଫରେନ୍ସକୁ ୩୦ରୁ ଅଧିକ ଆସନ ମିଳୁଥିବା ବେଳେ କଂଗ୍ରେସ ଖାତାକୁ ୩ରୁ ୬ ଆସନ ମିଳିପାରେ । ସେପଟେ ଏକାକୀ ନିର୍ବାଚନ ଲଢିଥିବା ମେହବୁବା ମୁଫତିଙ୍କ ଦଳ ପିଡିପି ୫ରୁ ୭ ସିଟ୍ ଆସନରେ ବିଜୟୀ ହୋଇପାରେ ।
ଦୈନିକ ଭାସ୍କର ଏକଜିଟ୍ ପୋଲ୍- ଜମ୍ମୁକାଶ୍ମୀରରେ ଝୁଲା ସରକାର ଦେଖିବାକୁ ମିଳିପାରେ । ବିଜେପିକୁ ୨୦ରୁ ୨୫ ଆସନ ମିଳିବ ବୋଲି ପୂର୍ବାନୁମାନ କରାଯାଇଛି । ଇଣ୍ଡିଆ ମେଣ୍ଟକୁ ୩୫ରୁ ୪୦ ଆସନ, ପିଡିପିକୁ ୪ରୁ ୭ ଓ ଅନ୍ୟ ଖାତାକୁ ୧୨ରୁ ୧୬ ଆସନ ଯାଇପାରେ ।
ଆଜତକ ସି ଭୋଟର- ଏହି ଏକଜିଟ୍ ପୋଲ୍ ଅନୁସାରେ, ବିଜେପି ୨୭ରୁ ୩୨ ଆସନ ଜିତିପାରେ । ଇଣ୍ଡିଆ ମେଣ୍ଟରେ ଥିବା କଂଗ୍ରେସ ଓ ନ୍ୟାସନାଲ କନଫରେନ୍ସକୁ ୪୦ରୁ ୪୮ ସିଟ୍ ମିଳିପାରେ । ଫଳରେ ଜମ୍ମୁକାଶ୍ମୀରରେ ଏନସି-କଂଗ୍ରେସ ମେଣ୍ଟ ସରକାର ଦେଖିବାକୁ ମିଳିପାରେ । ପିଡିପି ୬ରୁ ୧୨ ଓ ଅନ୍ୟ ଖାତାକୁ ୬ ରୁ ୧୧ ସିଟ୍ ମିଳିପାରେ ବୋଲି ଆଜତକ ସି-ଭୋଟର ଏକଜିଟ୍ ପୋଲ୍ରୁ ଜଣାପଡ଼ିଛି ।
ସେପଟେ ୯୦ ଆସନ ବିଶିଷ୍ଟ ଜମ୍ମୁକାଶ୍ମୀରରେ ଶେଷ ଥର ଲାଗି ୨୦୧୪ରେ ବିଧାନସଭା ନିର୍ବାଚନ ହୋଇଥିଲା । ପରେ ଧାରା ୩୭୦ ଏବଂ ୩୫-ଏ ହଟିବା ପରେ ଏଠାରେ ୨୦୨୪ରେ ପ୍ରଥମ ଥର ବିଧାନସଭା ନିର୍ବାଚନ ହୋଇଛି । ଅକ୍ଟୋବର ୮ରେ ନିର୍ବାଚନୀ ଫଳାଫଳ ଆସିବା ପରେ ଏକଜିଟ୍ ପୋଲ୍ର ତଥ୍ୟ ସଠିକ୍ ସାବ୍ୟସ୍ତ ହେବ କି ନାହିଁ ତାହା ସ୍ପଷ୍ଟ ହୋଇଯିବ ।
ଅନ୍ୟପକ୍ଷରେ ଏକଜିଟ ପୋଲ୍ ଆସିବା ପରେ ପିଡିପି ମୁଖ୍ୟ ମେହବୁବା ମୁଫତିଙ୍କ ପ୍ରତିକ୍ରିୟା ସାମ୍ନାକୁ ଆସିଛି । ବିଜେପିକୁ ମାତ ଦେବାକୁ ଯଦି ଦରକାର ପଡ଼େ ତେବେ ପିଡିପି, ଏନସି ଓ କଂଗ୍ରେସ ମେଣ୍ଟକୁ ସମର୍ଥନ ଦେଇପାରେ ବୋଲି ମେହବୁବା ମୁଫତି କହିଛନ୍ତି ।
