ନୂଆଦିଲ୍ଲୀ: ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମମତା ବାନାର୍ଜୀ ସୋମବାର ସନ୍ଦେଶଖାଲୀ ଗସ୍ତ କରିବାକୁ ଯାଉଛନ୍ତି। ସ୍ଥାନୀୟ ତ୍ରୃଣମୁଳ କଂଗ୍ରେସ(ଟିଏମସି)ର ନେତାଙ୍କ ଉପରେ ଯୌନ ଉତ୍ପୀଡ଼ନ ଏବଂ ଜମି କୋଲେଙ୍କାରି ଅଭିଯୋଗ ଆସିବା ପରେ ସନ୍ଦେଶଖାଲୀକୁ ଏହା ତାଙ୍କର ପ୍ରଥମ ଗସ୍ତ ରହିବ। 

ଗତ ସପ୍ତାହରେ ରାଜ୍ୟ ସଚିବାଳୟରେ ସାମ୍ବାଦିକମାନଙ୍କ ସହ କଥାବାର୍ତ୍ତା କରି ଟିଏମସି ସୁପ୍ରିମୋ କହିଛନ୍ତି ଯେ, ନିର୍ବାଚନ ପରେ ଅଞ୍ଚଳକୁ ଏହା ତାଙ୍କର ପ୍ରଥମ ଗସ୍ତ ରହିବ। ରାଜ୍ୟ ସରକାରଙ୍କ ଯୋଜନା ଅଧୀନରେ ଲାଭ ବଣ୍ଟନ ଓ ସ୍ଥାନୀୟ ଲୋକଙ୍କ ସମସ୍ୟା ଜାଣିବା ପାଇଁ ଏହି ଗସ୍ତ କରାଯାଉଛି ବୋଲି ମମତା ବାନାର୍ଜୀ ସୁଚନା ଦେଇଛନ୍ତି।

ଏହା ଏକ ସରକାରି କାର୍ଯ୍ୟକ୍ରମ। ଆମେ ଲକ୍ଷ୍ମୀର ଭଣ୍ଡାର ଓ ବାଙ୍ଗଲାର ବାରି ଯୋଜନା ଅଧିନରେ ଏହି ଅଞ୍ଚଳରେ ଅନେକ କାମ କରିଛୁ। ରାଜ୍ୟ ସରକାରଙ୍କ ଦ୍ୱାରା ପରିଚାଳିତ ଏହି ଯୋଜନା ଅଧିନରେ ପାଖାପାଖି ୨୦,୦୦୦ରୁ ଅଧିକ ଲୋକ ଉପକୃତ ହୋଇପାରିଛନ୍ତି। ବିଭିନ୍ନ ଯୋଜନା ଅଧିନରେ ଉପକୃତ ହୋଇଥିବା ୧୦୦ରୁ ଅଧିକ ହିତାଧିକାରୀଙ୍କୁ ମୁଁ ପ୍ରମାଣପତ୍ର ଦବାପାଇଁ ଏହି ଅଞ୍ଚଳକୁ ଯାଉଛି ବୋଲି ମମତା ବାନାର୍ଜୀ ସୁଚନା ଦେଇଛନ୍ତି।  

ଲୋକସଭା ନିର୍ବାଚନ ପୂର୍ବରୁ ଦିଆଯାଇଥିବା ପ୍ରତିଶ୍ରୁତିର ଅଂଶ ଭାବେ ଏହି ଗସ୍ତ ହେବାକୁ ଯାଉଛି ବୋଲି ମମତା ବାନାର୍ଜୀ ସ୍ପଷ୍ଟ କରିଛନ୍ତି। ନିର୍ବାଚନ ପୂର୍ବରୁ ଲୋକମାନେ ମତେ ସନ୍ଦେଶଖାଲୀ ଯିବାନେଇ ପ୍ରଶ୍ନ ପଚାରିଥିଲେ। ଏହାର ଉତ୍ତରରେ ମୁଁ ପରେ ଯିବା ବୋଲି ସେମାନଙ୍କୁ ଉତ୍ତର ଦେଇଥିଲି। ବାସ ମୁଁ ଦେଇଥିବା କଥା ରଖୁଛି ବୋଲି ସେ କହିଛନ୍ତି। 

ଅନ୍ୟପଟେ, ପଶ୍ଚିମବଙ୍ଗର ବିରୋଧି ଦଳର ବିଜେପି ନେତା ଶୁଭେନ୍ଦୁ ଅଧିକାରି ସମାନ ଅଞ୍ଚଳରେ ଆଉ ଏକ କାର୍ଯ୍ୟକ୍ରମ ଆୟୋଜନ କରିବାକୁ ଯାଉଛନ୍ତି। ତେବେ ସନ୍ଦେଶଖାଲୀ ଅଞ୍ଚଳରେ ହୋଇଥିବା ଯୌନ ଉତ୍ପୀଡ଼ନ ଏବଂ ଜମି କୋଲେଙ୍କାରିକୁ ନେଇ ଉଭୟ ବିଜେପି ଓ ଶାସକ ଦଳ ଟିଏମସି ମଧ୍ୟରେ ଛକାପଞ୍ଝା ଲାଗିରହିଛି। 

ମମତା ବାନାର୍ଜୀଙ୍କ ଗସ୍ତର ପରଦିନ ଶୁଭେନ୍ଦୁ ନିଜ କାର୍ଯ୍ୟକ୍ରମ ଆୟୋଜନ କରିବାକୁ ଯାଉଛନ୍ତି। ସୁଚନା ମୁତାବକ ବିଜେପିର ଆଭିମୁଖ୍ୟକୁ ନେଇ ସ୍ଥାନିୟ ଲୋକମାନଙ୍କ ସହ ଜନ ସଂଯୋଗ ଯାତ୍ରାର ଆୟୋଜନ କରିବାକୁ ଯାଉଛନ୍ତି ଶୁଭେନ୍ଦୁ ଅଧିକାରି।

ଖବର ମୁତାବକ, ଚଳିତ ବର୍ଷ ଜାନୁଆରି ମାସରେ କୋଟିକୋଟି ଟଙ୍କାର ରାସନ ହଡ଼ପ ଅଭିଯୋଗରେ ପ୍ରବର୍ତ୍ତନ ନିର୍ଦ୍ଦେଶାଳୟ(ଇଡ଼ି) ସନ୍ଦେଶଖାଲୀ ଅଞ୍ଚଳର ଟିଏମସି ନେତା ଶେଖ ସାହାଜାହାନ ଉପରେ ଚଢାଉ କରିଥିଲା। ଏହି ଚଢଉ ବେଳେ ନେତାଙ୍କ ଲୋକମାନେ ଇଡ଼ି ଅଧିକାରିମାନଙ୍କୁ ମାଡ ମାରିବା ସହ ସେମାନଙ୍କ ଯାନବାହାନ ଗୁଡିକୁ ନଷ୍ଟ କରିଦେଇଥିଲେ। 

ଏହି ଘଟଣା ପରେ ଉକ୍ତ ଅଞ୍ଚଳର ଅନେକ ମହିଳା ଶାହାଜାହାନ ଓ ତାଙ୍କ ସହଯୋଗୀ ମାନଙ୍କ ଉପରେ ଯୈନଉତ୍ପୀଡ଼ନ ସହ ଜମି ହଡ଼ପର ଅଭିଯୋଗ ଆଣିଥିଲେ। ଏହି ଅଭିଯୋଗ ଆସିବା ପରେ ବିଜେପି, ସିପିଆଇ ଓ କଂଗ୍ରେସ ଭଳି ବିରୋଧି ଦଳ ଶାହାଜାହାନଙ୍କୁ ଗିରଫ କରିବା ପାଇଁ ଦାବି କରିଥିଲେ। 

ଏହି ଘଟଣାରେ ବିଜେପି, ଇଡି ଏବଂ ଗଣମାଧ୍ୟମର ଷଡଯନ୍ତ୍ର ରହିଛି ବୋଲି ମମତା ପ୍ରଥମେ ଦାବି କରିଥିଲେ। ମାମଲା ରୁଜୁ ହେବାର ଦୀର୍ଘ 55 ଦିନ ପରେ ଶାହାଜାହାନଙ୍କୁ ଗିରଫ କରାଯିବା ସହ ଟିଏମସିରୁ ନିଲମ୍ବିତ କରାଯାଇଥିଲା।