ନୂଆଦିଲ୍ଲୀ,୦୨/୦୧:ଭୋପାଳ ଗ୍ୟାସ ଟ୍ରାଜେଡିକୁ ପୂରିଛି ୪୦ ବର୍ଷ । ଯେଉଁଥିରେ ଚାଲିଯାଇଥିଲା ପ୍ରାୟ ୫ ହଜାରରୁ ଉର୍ଦ୍ଧ୍ବ ଜୀବନ । ତେବେ ଅଘଟଣର ୪ ଦଶନ୍ଧି ପରେ ଫ୍ୟାକ୍ଟ୍ରିରେ ଥିବା ବିଷାକ୍ତ ବର୍ଜ୍ୟବସ୍ତୁକୁ କରାଯାଇଛି ନିଷ୍କାସନ। ଗତ ଡିସେମ୍ବର ୩ ତାରିଖରେ ମଧ୍ୟପ୍ରଦେଶ ହାଇକୋର୍ଟ ଏହି ବର୍ଜ୍ୟବସ୍ତୁକୁ ତୁରନ୍ତ ନିଷ୍କାସନ କରିବାକୁ ୪ ସପ୍ତାହର ଡେଡଲାଇନ ଦେଇଥିଲେ । ଏହାସହ ରାଜ୍ୟ ସରକାରଙ୍କୁ ଜାନୁଆରୀ ୩ ରେ ରିପୋର୍ଟ ଦେବାକୁ ଉଚ୍ଚ ନ୍ୟାୟାଳୟଙ୍କ ନିର୍ଦ୍ଦେଶ ରହିଥିଲା । ତେବେ ୪୦ ବର୍ଷ ପରେ ଶେଷରେ ନିଷ୍କାସନ ହୋଇଛି ଏହି ବିଷାକ୍ତ ପଦାର୍ଥ । ପରିବେଶ ପ୍ରଦୂଷଣ ଯେପରି ନହେବ ସେଥିପାଇଁ ଏହି ବିଷାକ୍ତ ବର୍ଜ୍ୟବସ୍ତୁକୁ ଏକ ୪ ସ୍ତର ବିଶିଷ୍ଟ କଣ୍ଟେନର ମଧ୍ୟରେ ଭର୍ତ୍ତି କରାଯାଇ ନିଆଯାଇଛି ।
ଏନେଇ ଗ୍ୟାସ ଟ୍ରାଜେଡି ରିଲିଫ ଏବଂ ରିହାବିଲିଟେସନ ବିଭାଗ ନିର୍ଦ୍ଦେଶକ ସ୍ବତନ୍ତ୍ର କୁମାର ସିଂ କହିଛନ୍ତି, "୧୨ଟି କଣ୍ଟେନରରେ ସମସ୍ତ ବର୍ଜ୍ୟବସ୍ତୁକୁ ବାହାର କରାଯାଇଛି। ଏଥିପାଇଁ ଏକ ଗ୍ରୀନ କରିଡ଼ର ହୋଇଥିଲା ଗଠନ । ତେବେ ଏସବୁକୁ ଆସନ୍ତା ୯ ମାସ ମଧ୍ୟରେ ଜାଳି ନଷ୍ଟ କରାଯିବା ନେଇ ସେ କହିଛନ୍ତି । ଏହି କାମରେ ପାଖାପାଖି ୧୦୦ ଜଣ ନିୟୋଜିତ ଥିଲେ । ଏଥିସହ ୪୦୦ ଅଫିସରଙ୍କ ସମେତ ୧୦୦ ଜଣ ପୋଲିସ ଏବଂ ଜିଲ୍ଲା ପ୍ରଶାସନ ମଧ୍ୟ ଏହାର ତଦାରଖ କରିଛନ୍ତି । ପ୍ରକାଶ ଥାଉକି, ୧୯୮୪ ମସିହାରେ ମଧ୍ୟପ୍ରଦେଶ ଭୋପାଳରେ ୟୁନିଅନ କାର୍ବାଇଡ୍ ଫ୍ୟାକ୍ଟ୍ରିରେ ବିଷାକ୍ତ ମିଥାଇଲ ଆଇସୋସିଆନେଟ୍ ଲିକ୍ ହୋଇଥିଲା । ଫଳରେ ୫ ହଜାରରୁ ଉର୍ଦ୍ଧ୍ବ ଲୋକଙ୍କ ଜୀବନ ଯାଇଥିବାବେଳେ ୫ ଲକ୍ଷ ଲୋକ ଏହା ସଂସ୍ପର୍ଶରେ ଆସିଥିଲେ ।
