ଗୋପାଳପୁର,୦୬/୧୦: ବ୍ରହ୍ମପୁର ବିଶ୍ୱବିଦ୍ୟାଳୟ (ଭଞ୍ଜବିହାର)ରେ ଗତ ମାସ ୨୧ ତାରିଖ ରାତିରେ ନୂତନ ହଷ୍ଟେଲ୍ରେ ରହୁଥିବା ପ୍ରଥମ ବର୍ଷ ଛାତ୍ରଙ୍କୁ ରାଗିଂ ଘଟଣାରେ ୧୭ ଜଣ ବରିଷ୍ଠ ଛାତ୍ରଙ୍କ ବିରୋଧରେ କାର୍ଯ୍ୟାନୁଷ୍ଠାନ ହୋଇଛି । ଆଣ୍ଟି ରାଗିଂ କମିଟି ଓ ଶୃଙ୍ଖଳା କମିଟି ନିଷ୍ପତ୍ତି ପ୍ରକାରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଥିବା କହିଛନ୍ତି କୁଳପତି ପ୍ରଫେସର ଗୀତାଞ୍ଜଳି ଦାଶ । ଆଇଆର୍ ଏଣ୍ଡ ପିଏମ୍, ସାମ୍ବାଦିକତା ଓ ଗଣଯୋଗାଯୋଗ ବିଭାଗ, ଇଂରାଜୀ ଏବଂ ଏମ୍ବିଏ ବିଭାଗର ଜଣେ ଲେଖାଏଁ ଦ୍ୱିତୀୟ ବର୍ଷର ଛାତ୍ରଙ୍କୁ ସେମାନେରହୁଥିବା ନାଗାବଳୀ, ଋଷିକୁଲ୍ୟା, ବଂଶଧାରା ହଷ୍ଟେଲ ସପ୍ତାହକ ମଧ୍ୟରେ ଛାଡ଼ିବାକୁ ବା ଖାଲି କରିବାକୁ ନିର୍ଦ୍ଦେଶ ହୋଇଛି । ସେହିପରି ଅନ୍ୟ ୧୩ ଜଣ ଛାତ୍ରଙ୍କୁ ୧ ହଜାର ଟଙ୍କା ଲେଖାଏଁ ଜରିମାନା ଦେବା ସହ ଭବିଷ୍ୟତରେ ରାଗିଂରେ ସମ୍ପୃକ୍ତ ରହିବେ ନାହିଁ ବୋଲି ଅଣ୍ଡର୍ଟେକିଂ(ସ୍ୱୀକାରନାମା) ଦେବାକୁ ବିଜ୍ଞପ୍ତି ଜାରି ହୋଇଛି ।
ଗତ ୨୧ ତାରିଖରେ ଦ୍ୱିତୀୟ ବର୍ଷର ଛାତ୍ରମାନେ ପ୍ରଥମ ବର୍ଷର କିଛି ଛାତ୍ରଙ୍କୁ ରାଗିଂ କରି ମାନସିକ ଯନ୍ତ୍ରଣା ଦେଇଥିବା ଅଭିଯୋଗ ହୋଇଥିଲା । ଏ ନେଇ ଛାତ୍ରମାନେ ସିଧାସଳଖ ୟୁଜିସି ଆଣ୍ଟି ରାଗିଂ ସେଲ୍କୁ ଅଭିଯୋଗ କରିଥିଲେ । ରାଗିଂର ସମ୍ମୁଖୀନ ହୋଇଥିବା ଛାତ୍ରଙ୍କ ଅଭିଯୋଗ ଆଧାରରେ ୟୁଜିସ ପକ୍ଷରୁ ଗତ ୨୨ ତାରିଖରେ ବ୍ରହ୍ମପୁର ବିଶ୍ୱବିଦ୍ୟାଳୟକୁ ତଦନ୍ତ ପାଇଁ ଚିଠି ହୋଇଥିଲା । ସେହିଦିନ ହଷ୍ଟେଲ ଦାୟିତ୍ୱରେ ଥିବା ଅଧୀକ୍ଷକ, ଉପଅଧୀକ୍ଷକମାନେ ଛାତ୍ରାବାସ ଯାଇ ପ୍ରାଥମିକ ତଦନ୍ତ ସହ ବୁଝାସୁଝା କରି ଶାନ୍ତିଶୃଙ୍ଖଳା ରକ୍ଷା କରିଥିଲେ ।
୨୩ ତାରିଖରେ କୁଳପତିଙ୍କ ନିର୍ଦ୍ଦେଶକ୍ରମେ ପିଜି କାଉନ୍ସିଲ୍ ଅଧ୍ୟକ୍ଷ ପ୍ରଫେସର ସୁକାନ୍ତ କୁମାର ତ୍ରିପାଠୀଙ୍କ ପୌରୋହିତ୍ୟରେ ଶୃଙ୍ଖଳା କମିଟି ଏବଂ ଆଣ୍ଟି ରାଗିଂ କମିଟି ସଦସ୍ୟଙ୍କ ସହ ଆଲୋଚନା ହୋଇଥିଲା । ଅଭିଯୋଗର ତଦନ୍ତ ପାଇଁ ୧୨ ଜଣିଆ ଆଣ୍ଟି ରାଗିଂ ଦଳ ସମେତ ବିଶ୍ୱବିଦ୍ୟାଳୟ ନିରାପତ୍ତା ଅଧିକାରୀ ବା ଡିଏସ୍ପି ଦୀପ୍ତିକାନ୍ତ ପ୍ରଧାନଙ୍କୁ ମିଳିତ ତଦନ୍ତ କରି ରିପୋର୍ଟ ଦାଖଲ କରିବାକୁ ନିର୍ଦ୍ଦେଶ ହୋଇଥିଲା । ସିସିଟିଭି ଫୁଟେଜକୁ ଆଧାର କରି ରାଗିଂ କରିଥିବା ଛାତ୍ରଙ୍କୁ ଚିହ୍ନଟ କରି ଜଣ ଜଣ କରି ମୌଖିକ ଭାବେ ପଚରାଉଚରା କରାଯାଇଥିଲା । ୧୭ ଜଣ ଛାତ୍ରଙ୍କ ସମ୍ପୃକ୍ତି ନେଇ ତଦନ୍ତ ରିପୋର୍ଟ ଶୁକ୍ରବାର ରାତିରେ କୁଳପତିଙ୍କୁ ପ୍ରଦାନ କରାଯାଇଥିଲା । ଏହାରି ଆଧାରରେ ଶନିବାର କାର୍ଯ୍ୟାନୁଷ୍ଠାନ ନିଷ୍ପତ୍ତି ନିଆଯାଇଛି।
ପିଜି କାଉନ୍ସିଲ୍ ଅଧ୍ୟକ୍ଷ କହିଛନ୍ତି ଯେ- ରାଗିଂ ଯାଞ୍ଚ କମିଟି, ଡିଏସ୍ପିଙ୍କ ମିଳିତ ତଦନ୍ତ ରିପୋର୍ଟ ଶୁକ୍ରବାର କୁଳପତିଙ୍କୁ ହସ୍ତାନ୍ତର କରାଯାଇଥିଲା । ସେହିପରି କୁଳପତି ପ୍ରଫେସର ଦାଶ କହିଛନ୍ତି ଯେ- ତଦନ୍ତ ରିପୋର୍ଟ ଆଧାରରେ ଶୃଙ୍ଖଳା କମିଟି ନିଷ୍ପତ୍ତିକ୍ରମେ ୩ଟି ହଷ୍ଟେଲରେ ରହୁଥିବା ଦ୍ୱିତୀୟ ବର୍ଷର ୪ ଜଣ ଛାତ୍ରଙ୍କୁ ସପ୍ତାହ ଭିତରେ ହଷ୍ଟେଲ ଛାଡ଼ିବା ଏବଂ ଅନ୍ୟ ୧୩ ଜଣ ଛାତ୍ରଙ୍କୁ ୧ ହଜାର ଟଙ୍କା ଜରିମାନା ପ୍ରଦାନ ସହ ଅଣ୍ଡରଟେକିଂ ଲିଖିତ ଆକାରରେ ପ୍ରଦାନ କରିବାକୁ କୁହାଯାଇଛି । ଯାଞ୍ଚ ରିପୋର୍ଟକୁ ୟୁଜିସି ମାଗିଥିବାରୁ ସମ୍ପୃକ୍ତ କର୍ତ୍ତୃପକ୍ଷଙ୍କୁ ମଧ୍ୟ ପ୍ରଦାନ କରାଯାଇଛି । ଭଞ୍ଜବିହାରରେ ଆଗାମୀ ଦିନରେ ବିଶୃଙ୍ଖଳା କଲେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ।
