ଭୁବନେଶ୍ୱର/ଭବାନୀପାଟଣା,୦୬/୧୦: ରାୟଗଡ଼ା ଫରେଷ୍ଟ ଡିଭିଜନ ଦ୍ୱାରା ପରିଚାଳିତ କଳାହାଣ୍ଡି ଜିଲ୍ଲା ଜାରିଂ ହାଇଟେକ୍ ନର୍ସରୀ ସେଲ୍ଭି କଲ୍ଚର ରିସର୍ଚ୍ଚ ୱିଙ୍ଗ୍ ଫରେଷ୍ଟର ସଞ୍ଜୟ ନାୟକଙ୍କ ଆତ୍ମହତ୍ୟା ମାମଲାରେ ଡିଏଫ୍ଓ ଦେବେନ୍ଦ୍ର ବେହେରାଙ୍କୁ ନିଲମ୍ବନ କରାଯାଇଛି । ଏନେଇ ବିଭାଗ ପକ୍ଷରୁ ନିର୍ଦ୍ଦେଶନାମା ଜାରି କରାଯାଇଛି । ବିଭାଗୀୟ ତଦନ୍ତ ଜାରି ରହିଥିବାରୁ ଡିଏଫ୍ଓ ଶ୍ରୀ ବେହେରା ରାଜ୍ୟ ମୁଖ୍ୟାଳୟ ଛାଡ଼ି ବିନା ଅନୁମତିରେ କେଉଁଆଡ଼େ ଯାଇପାରିବେ ନାହିଁ ବୋଲି ନିର୍ଦ୍ଦେଶନାମାରେ ଉଲ୍ଲେଖ ରହିଛି ।
ସଞ୍ଜୟଙ୍କ ଆତ୍ମହତ୍ୟା ପଛରେ ଡିଏଫ୍ଓ ଶ୍ରୀ ବେହେରାଙ୍କ ସଂପୃକ୍ତି ଅଭିଯୋଗ ଆସିବା ପରେ ବିଭାଗୀୟ ତଦନ୍ତ ଆରମ୍ଭ ହୋଇଥିଲା । ମୃତ୍ୟୁ ପୂର୍ବରୁ ସଞ୍ଜୟ ଛାଡ଼ି ଯାଇଥିବା ସୁଇସାଇଡାଲ ନୋଟରେ ପିସି ପାଇଁ ଡିଏଫ୍ଓ ତାଙ୍କୁ ନିର୍ଯାତନା ଦେବାରୁ ସେ ମାନସିକ ଦୁଶ୍ଚିନ୍ତାରେ ଆତ୍ମହତ୍ୟା କରୁଥିବା ଉଲ୍ଲେଖ କରିଥିଲେ । ତେଣୁ ବିଭାଗ ପକ୍ଷରୁ ଡିଏଫ୍ଓ ଶ୍ରୀ ବେହେରାଙ୍କୁ ନିଲମ୍ବନ କରାଯାଇଛି ।
ଅନ୍ୟପକ୍ଷରେ ଶନିବାର ଦ୍ୱିତୀୟ ଦିନରେ ଡିଏଫ୍ଓ ଦେବେନ୍ଦ୍ର ବେହେରାଙ୍କୁ ଜେରା କରିଛି ଭବାନୀପାଟଣା ପୁଲିସ୍ । ସଦର ଏସ୍ଡିପିଓ ସୁନାରାମ ହେମ୍ରମ୍ ତାଙ୍କୁ ଗୁଡ଼େଇତୁଡ଼େଇ ଜେରା କରିଥିଲେ । ପୂର୍ବାହ୍ଣ ୧୧ଟାରୁ ଅପରାହ୍ଣ ୫ଟା ଯାଏ ଦୀର୍ଘ ୭ଘଣ୍ଟା ଧରି ଚାଲିଥିବା ମାରାଥନ୍ ଜେରାବେଳେ ଚାରା ଉତ୍ପାଦନ ପ୍ରକ୍ରିୟାରେ ବର୍ଷ ବର୍ଷ ଧରି ଲାଗିରହିଥିବା ଅବ୍ୟବସ୍ଥାର ସୁରାକ୍ ମିଳିଛି । ଖୋଦ୍ ଡିଏଫ୍ଓ ଏହା ସ୍ୱୀକାର କରିଛନ୍ତି । ଏହା ବି ମାନିଛନ୍ତି ଚାରା ଉତ୍ପାଦନ, ଏଥିରେ ନିୟୋଜିତ ଶ୍ରମିକଙ୍କ ମଜୁରି ଏବଂ ଅନ୍ୟାନ୍ୟ ଆନୁସଙ୍ଗିକ ଉପକରଣ ବାବଦ ଲକ୍ଷାଧିକ ଟଙ୍କା ସଞ୍ଜୟ ନିଜ ହାତରୁ ଖର୍ଚ୍ଚ କରିଥିଲେ । ଶ୍ରମିକମାନେ ପ୍ରତିମାସରେ ପାରିଶ୍ରମିକ ନେଉଥିଲେ । ହେଲେ ବିଭାଗ ପକ୍ଷରୁ ୩-୪ ମାସରେ ଟଙ୍କା ମଞ୍ଜୁର ହେଉଥିଲା । ତେଣୁ ଫରେଷ୍ଟର ନିଜ ହାତରୁ ଟଙ୍କା ଖର୍ଚ୍ଚ କରୁଥିଲେ । ହେଲେ ଚାରାରୋପଣରେ ଦୁର୍ନୀତି ସମ୍ପୃକ୍ତି ଏବଂ ପିସି କାରବାରକୁ ନେଇ ଯେଉଁ ଅଭିଯୋଗ ଆସିଥିଲା, ତାହାକୁ ଡିଏଫ୍ଓ ଖଣ୍ଡନ କରିଛନ୍ତି ।
ଅନ୍ୟପଟେ ଶ୍ରମିକଙ୍କୁ ମଜୁରି ପ୍ରଦାନ ସମ୍ପର୍କିତ ସବିଶେଷ ତଥ୍ୟ ସଂଗ୍ରହ କରିବାକୁ ସେଲ୍ଭି କଲଚର ଡିପାର୍ଟମେଣ୍ଟର ଆକାଉଣ୍ଟାଣ୍ଟଙ୍କୁ ତଦନ୍ତ ପରିସରଭୁକ୍ତ କରିଛି ପୁଲିସ୍ । ଏ ନେଇ ଆକାଉଣ୍ଟସ୍ ବିଭାଗର ଅଫିସିଆଲ୍ ମେଲ୍ ଜରିଆରେ ନୋଟିସ୍ କରାଯାଇଛି । ଯଥାଶୀଘ୍ର ଥାନାରେ ହାଜର ହେବାକୁ କୁହାଯାଇଛି । ହେଲେ ଦାୟିତ୍ୱରେ ଥିବା ଅଧିକାରୀ ପୁଲିସ୍କୁ ସହଯୋଗ କରୁନାହାନ୍ତି । ସ୍ୱାସ୍ଥ୍ୟଗତ ସମସ୍ୟା ଦର୍ଶାଇ ଆସୁ ନ ଥିବା ଏସ୍ଡିପିଓ ଶ୍ରୀ ହେମ୍ବ୍ରମ୍ ସୂଚନା ଦେଇଛନ୍ତି ।
ଶନିବାର ଜେରା ପରେ ସେ ପ୍ରଥମ ଥର ଗଣମାଧ୍ୟମ ସମ୍ମୁଖରେ ମୁହଁ ଖୋଲିଛନ୍ତି । ସଞ୍ଜୟ ସୁଇସାଇଡ୍ ନୋଟ୍ରେ ଲେଖିଥିବା ସମସ୍ତ ଅଭିଯୋଗ ଭିତ୍ତିହୀନ ବୋଲି ସେ କହିଛନ୍ତି । ଫରେଷ୍ଟର ସଞ୍ଜୟ ଜାରିଂ ହାଇଟେକ୍ ନର୍ସରୀରେ ରହିବାକୁ ଚାହୁଁଥିଲେ । ତାଙ୍କୁ ରିଲିଭ୍ କରିଦେବାରୁ ସେ ଆତ୍ମହତ୍ୟା କରିଛନ୍ତି ବୋଲି ଡିଏଫ୍ଓ କହିଛନ୍ତି ।
ଉଲ୍ଲେଖଯୋଗ୍ୟ, ଗତ ସେପ୍ଟେମ୍ବର ୧୮ ତାରିଖରେ ଫରେଷ୍ଟର ସଞ୍ଜୟ ନାୟକ ନିଜ କ୍ୱାର୍ଟର୍ସରେ ଆତ୍ମହତ୍ୟା କରିଥିଲେ । ପୁଲିସ ମୃତଦେହ ଉଦ୍ଧାର କଲାବେଳେ ସୁଇସାଇଡ୍ ନୋଟ୍ ଜବତ କରିଥିଲା । ସଞ୍ଜୟ ସୁଇସାଇଡ୍ ନୋଟ୍ରେ ଡିଏଫଓ ଦେବେନ୍ଦ୍ର ବେହେରା ପଦୋନ୍ନତି ରୋକିବା ଓ ବଦଳି ଧମକ ଦେଇ ପିସି ମାଗୁଥିବା ଉଲ୍ଲେଖ କରିଥିଲେ । ସଞ୍ଜୟଙ୍କ ପତ୍ନୀ ପ୍ରିୟଙ୍କା ସୁବୁଦ୍ଧି ସମାନ ଅଭିଯୋଗ ଆଣିଥିଲେ । ଡିଏଫ୍ଓ ଶ୍ରୀ ବେହେରା ୭ ଲକ୍ଷ ଟଙ୍କା ପିସି ମାଗି ମାନସିକ ଚାପ ପକାଇବାରୁ ସଞ୍ଜୟ ଆତ୍ମହତ୍ୟା କଲେ ବୋଲି ପ୍ରିୟଙ୍କା ଅଭିଯୋଗ କରିଥିଲେ ।
ସଞ୍ଜୟଙ୍କ ପତ୍ନୀଙ୍କ ଅଭିଯୋଗ ପରେ ପିସିସିଏଫ୍ ଦେବିଦତ୍ତ ବିଶ୍ୱାଳ ବିଭାଗୀୟ ତଦନ୍ତ ନିର୍ଦ୍ଦେଶ ଦେଇଥିଲେ । ଜଣେ ସିସିଏଫ୍ ଏହି ଘଟଣାର ତଦନ୍ତ କରୁଥିଲେ । ସେପଟେ ଭବାନୀପାଟଣା ଟାଉନ୍ ଥାନାରେ କେସ୍ ନଂ-୩୬୮/୨୪, ୧୦୮ ବିଏନ୍ଏସ୍ରେ ଏକ ମାମଲା ରୁଜୁ ହୋଇଥିବା ବେଳେ ଡିଏଫ୍ଓ ଶ୍ରୀ ବେହେରା ଫେରାର୍ ହୋଇ ଯାଇଥିଲେ । ସେ ଆଗୁଆ ଜାମିନ ପାଇଁ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ । ହାଇକୋର୍ଟ ତାଙ୍କର ଜାମିନ୍ ଖାରଜ କରି ଅକ୍ଟୋବର ୧୯ ସୁଦ୍ଧା କଳାହାଣ୍ଡି ପୁଲିସ୍ ନିକଟରେ ଉପସ୍ଥିତ ରହି ତଦନ୍ତରେ ସହଯୋଗ କରିବାକୁ ନିର୍ଦ୍ଦେଶ ଦେଇଥିଲେ । ଏଥିସହ ଡିଏଫ୍ଓଙ୍କୁ ମଧ୍ୟବର୍ତ୍ତୀକାଳୀନ ସୁରକ୍ଷା ଦେଇଥିଲେ ହାଇକୋର୍ଟ । କୋର୍ଟଙ୍କ ନିର୍ଦ୍ଦେଶ ପରେ ଡିଏଫ୍ଓ ଶ୍ରୀ ବେହେରା ଶୁକ୍ରବାର ପୁଲିସ ନିକଟରେ ହାଜର ହୋଇଥିଲେ । ତାଙ୍କୁ ପୁଲିସ ୬ ଘଣ୍ଟା ଜେରା କରିଥିଲା ।
