ଟିଟିଲାଗଡ଼, ୦୮/୦୭ : ପୋଖରୀରୁ ଯୁବକଙ୍କ ମୃତଦେହ ଉଦ୍ଧାର। ସୋମବାର ସକାଳୁ ଟିଟିଲାଗଡ଼ ସହର ମଝିରେ ଥିବା ପୋଖରୀ ମହାରାଜ ସାଗର ଭିତରୁ ଏହି ଶବ ଉଦ୍ଧାର କରାଯାଇଛି। ଘଟଣାସ୍ଥଳରେ ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି। ଯୁବକଙ୍କ ପରିଚୟ ଅସ୍ପଷ୍ଟ ରହିଛି।
ସୂଚନାନୁଯାୟୀ, ସୋମବାର ସକାଳୁ ଆଇ ଲଭ୍ ଟିଟିଲାଗଡ଼ ପାର୍କ ନିକଟରେ ଥିବା ମହାରାଜ ସାଗର ପୋଖରୀରେ ଏକ ମୃତଦେହ ଭାସୁଥିବା ସ୍ଥାନୀୟ ଲୋକେ ଦେଖିବାକୁ ପାଇଥିଲେ। ଏନେଇ ପୋଲିସକୁ ଖବର ଦେଇଥିଲେ। ଖବର ପାଇ ଘଟଣାସ୍ଥଳରେ ପୋଲିସ ପହଞ୍ଚି ଅଗ୍ନିଶମ ବାହିନୀ ସହାୟତାରେ ମୃତଦେହକୁ ଉଦ୍ଧାର କରିଛି। ମୃତଦେହଟି ଜଣେ ଯୁବକଙ୍କର ହୋଇଥିବା ବେଳେ ତାଙ୍କର ପରିଚୟ ଅସ୍ପଷ୍ଟ ରହିଛି। ଯୁବକଙ୍କ ବୟସ ପାଖାପାଖି ୩୫ ରୁ ୪୦ ହେବ ବୋଲି ଅନୁମାନ କରାଯାଉଛି। ସେ ଏକ ବ୍ଲୁ ରଙ୍ଗର ଜିନ୍ସ ପ୍ୟାଣ୍ଡ ଏବଂ ଧୂସର ରଙ୍ଗର ଟି ସାର୍ଟ ପିନ୍ଧିଥିବା ଦେଖିବାକୁ ମିଳିଛି। ତାଙ୍କର ମୁହଁ ସମ୍ପୂର୍ଣ୍ଣ ଭାବରେ ବିକୃତ ହୋଇଯାଇଥିବା ଯୋଗୁଁ ଯୁବକଙ୍କୁ ଚିହ୍ନିବା କଷ୍ଟକର ହୋଇପଡିଛି। ତେବେ ଏହା ହତ୍ୟା ନା ଦୁର୍ଘଟଣା ତାହା ଅସ୍ପଷ୍ଟ ରହିଛି। ଟିଟିଲାଗଡ଼ ପୋଲିସ ଏନେଇ ତଦନ୍ତ ଚଳାଇଛି।