ଛତ୍ରପୁର,୦୬/୧୦: ଜାତୀୟ ରାଜପଥରେ ରୁଟି ବ୍ୟବସାୟୀଙ୍କୁ ପଛ ପଟୁ ଧକ୍କା ଦେଲା ଅଜଣା ଗାଡି । ଦୁର୍ଘଟଣା ଘଟାଇ ଘଟଣାସ୍ଥଳରୁ ଗାଡି ଫେରାର ହୋଇଯାଇଛି । ଗୁରୁତର ବ୍ୟକ୍ତି ଜଣକ ବେଳଗୁଣ୍ଠା ଥାନା ଅଧୀନସ୍ଥ ଗୋଠୱାରି ଗ୍ରାମର ସନ୍ନ୍ୟାସୀ ବିଷୋୟୀ ବୋଲି ଜଣାପଡ଼ିଛି । ଗଞ୍ଜାମ ଜିଲ୍ଲା ଛତ୍ରପୁର ଥାନା ଅନ୍ତର୍ଗତ ହୁମ୍ବର ପଦରମାଳ ସ୍ଥିତ ଇଣ୍ଡିଆନ୍ ଅଏଲ ପେଟ୍ରୋଲ ପମ୍ପ ସାମ୍ନା ଜାତୀୟ ରାଜପଥରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ସନ୍ନ୍ୟାସୀ ବିଷୋୟୀ ଜଣେ ରୁଟି ବ୍ୟବସାୟୀ ଥିବାବେଳେ ରବିବାର ଭୋର ସମୟରେ ନିଜ ସାଇକେଲ ଯୋଗେ ଯାଉଥିଲେ । ଏହି ସମୟରେ ହୁମ୍ବର ପଦରମାଳ ସ୍ଥିତ ଇଣ୍ଡିଆନ୍ ଅଏଲ ପେଟ୍ରୋଲ ପମ୍ପ ସାମ୍ନା ଜାତୀୟ ରାଜପଥରେ ଏକ ଅଜଣା ଗାଡି ସନ୍ନ୍ୟାସୀଙ୍କୁ ପଛପଟୁ ଧକ୍କା ଦେଇଥିଲା । ଫଳରେ ସାଇକେଲରେ ନେଇଥିବା ରୁଟି ଗୁଡିକ ରାସ୍ତାରେ ଏଣେତେଣେ ପଡ଼ି ଯାଇଥିଲା । ଏହା ସହ ସାଇକେଲ ଆରୋହୀ ଗୁରୁତର ହୋଇ ରାସ୍ତାରେ ଛଟପଟ ହୋଇଥିଲେ । ଉକ୍ତ ସମୟରେ ଅନ୍ଧାର ଥିବାରୁ ରାସ୍ତାରେ ଯାଉଥିବା କେହି ଜଣେ ବ୍ୟକ୍ତି ୧୦୮ ଆମ୍ବୁଲାନ୍ସକୁ ଡାକି ଛତ୍ରପୁର ମେଡ଼ିକାଲକୁ ନେଇଥିଲେ । ସେଠାରେ ଅବସ୍ଥା ଗୁରୁତର ହେବାରୁ ତାଙ୍କୁ ବ୍ରହ୍ମପୁର ଏସକେସିଜିକୁ ସ୍ଥାନାନ୍ତର କରାଯାଇଛି । ଏନେଇ ପୋଲିସକୁ ଖବର ଦେଇଥିଲେ ସ୍ଥାନୀୟଲୋକେ । ଖବର ପାଇ ଘଟଣାସ୍ଥଳରେ ପୋଲିସ ପହଞ୍ଚି ଘଟଣାର ତଦନ୍ତ ଚଳାଇଛି ।
