ନୂଆଦିଲ୍ଲୀ ୦୮/୦୭: ଶିଳ୍ପପତି ମୁକେଶ ଅମ୍ବାନିଙ୍କ ପୁଅ ଅନନ୍ତ ଅମ୍ବାନି ଓ ରାଧିକା ମର୍ଚ୍ଚାଣ୍ଟଙ୍କର ସଙ୍ଗୀତ ଉତ୍ସବ ଜୁଲାଇ ୫ ତାରିଖରେ ଅନୁଷ୍ଠିତ ହୋଇଥିଲା । ସେହି ଉତ୍ସବର ଅନେକ ଫଟୋ ଓ ଭିଡିଓ ଏବେ ସୋସିଆଲ୍ ମିଡିଆରେ ଭାଇରାଲ୍ ହେଉଛି । ସେଥିମଧ୍ୟରୁ ଗୋଟିଏ ଭିଡିଓରେ ବଲିଉଡ୍ ଅଭିନେତ୍ରୀ ମାନୁଷୀ ଛିଲ୍ଲରଙ୍କୁ ବୀର ପହରିୟାଙ୍କ ସହିତ ନୃତ୍ୟ କରୁଥିବା ଦେଖିବାକୁ ମିଳୁଛି । ଏହାପରେ ସେ ବୀରଙ୍କୁ ଡେଟିଂ କରୁଥିବା ଚର୍ଚ୍ଚା ଚାଲିଛି । ଭିଡିଓରେ ମାନୁଷୀ ଏକ ସିଲଭର ରଙ୍ଗର ପୋଷାକ ପିନ୍ଧିଛନ୍ତି । ବୀରଙ୍କୁ ସିଲଭର ରଙ୍ଗର କୁର୍ତ୍ତା, କଳା ପ୍ୟାଣ୍ଟରେ ଦେଖିବାକୁ ମିଳୁଛି । ଉଭୟ ଏକ ବଲିଉଡ୍ ଗୀତର ତାଳେ ତାଳେ ନାଚୁଥିବା ନଜର ଆସୁଛନ୍ତି ।
ବୀର ପହରିୟା ହେଉଛନ୍ତି ଅଭିନେତ୍ରୀ ଜାହ୍ନବୀ କପୁରଙ୍କ ବୟଫ୍ରେଣ୍ଡ ଶିଖର ପହରିୟାଙ୍କର ଭାଇ । ଅନନ୍ତ-ରାଧିକାଙ୍କ ସଙ୍ଗୀତ ଉତ୍ସବ ପୂର୍ବରୁ ମାନୁଷୀ-ବୀର କିଛି ଦିନ ହେଲା ସଂପର୍କରେ ଥିବା କୁହାଯାଉଛି । ଅଭିନେତା ଅକ୍ଷୟ କୁମାରଙ୍କ ସହିତ ‘ସମ୍ରାଟ ପୃଥ୍ୱୀରାଜ’ ମାଧ୍ୟମରେ ବଲିଉଡ୍ ଡେବ୍ୟୁ କରିଥିଲେ ମାନୁଷୀ ଛିଲ୍ଲର । ପରେ ତାଙ୍କୁ ‘ଦ ଗ୍ରେଟ୍ ଇଣ୍ଡିଆନ୍ ଫ୍ୟାମିଲି’, ‘ଅପରେସନ୍ ଭାଲେଣ୍ଟାଇନ୍’, ‘ବଡ଼େ ମିୟାଁ ଛୋଟେ ମିୟାଁ’ରେ ଦେଖିବାକୁ ମିଳିଥିଲା । ଆଗକୁ ଜନ୍ ଆବ୍ରାହମ୍ଙ୍କ ସହ ‘ତେହରାନ୍’ରେ ନଜର ଆସିବେ ସେ । ସେପଟେ ବୀର ଚଳିତବର୍ଷ ଅକ୍ଷୟ କୁମାରଙ୍କର ଥ୍ରିଲର ‘ସ୍ପାଏ ଫୋର୍ସ’ ମାଧ୍ୟମରେ ବଲିଉଡ୍ ଡେବ୍ୟୁ କରିବେ । ପୂର୍ବରୁ ସେ ‘ଭେଡ଼ିୟା’ରେ ସହଯୋଗୀ ନିର୍ଦ୍ଦେଶକ ଭାବେ କାମ କରିସାରିଛନ୍ତି ।
