ଭୁବନେଶ୍ୱର,୦୮/୦୭: ଚଳିତ ବର୍ଷ ପୁରୀ ରଥଯାତ୍ରାରେ ବିକ୍ରି ହେଉଛି ଟଙ୍କ ତୋରାଣି । ଏଥିପାଇଁ ପୁରୀ ବଡ଼ ଦାଣ୍ଡରେ ଲାଗିଛି ୩୦ଟା ଷ୍ଟଲ୍। କଟକ ଜିଲ୍ଲା ମାହାଙ୍ଗା ବ୍କ୍ କୁହାଣ୍ଡା ଗାଁର ୫୫ ଜଣ ମହିଳା ପ୍ରସ୍ତୁତ କରୁଛନ୍ତି ଏହି ତୋରାଣି । ‘ବୋଉ’ ବ୍ରାଣ୍ଡ୍ରେ ବିକ୍ରି ହେଉଥିବା ଏହି ତୋରାଣି ପାଣି ଅରୁଆ ଚାଉଳରେ ପ୍ରସ୍ତୁତ କରାଯାଉଛି । ଏହା ଶରୀରକୁ ଥଣ୍ଡା ରଖିବା ସହ ଓଡ଼ିଶାର ଏହି ପାରମ୍ପରିକ ପାନୀୟକୁ ଏକ ନୂଆ ପରିଚୟ ଦେଇଛି ।
ଉପକୂଳ ଓଡ଼ିଶାର ଘରେ ଘରେ ପଖାଳ ସହ ତୋରାଣି ବନ୍ଧା । ମାତ୍ର ଶାନ୍ତି ମହିଳା ଉତ୍ପାଦକ ଗୋଷ୍ଠୀ ଏହାକୁ ପ୍ୟାକେଜିଂ କରି ବଜାରକୁ ଆଣିବା ସହ ଏକ ନୂଆ ଇତିହାସ ସୃଷ୍ଟି କରିଛି । ଏଥିପାଇଁ ମା’ମାନେ ଓର୍ମାସ୍ ସହାୟତାରେ ଏକ ପ୍ଲାଣ୍ଟ ତିଆରି କରି ଏହାକୁ ପ୍ରସ୍ତୁତ କରୁଛନ୍ତି । ଗତ ୬ ମାସ ହେବ ‘ଶାନ୍ତି ମହିଳା ଉଦ୍ୟୋଗ’ ଦ୍ୱାରା ରାଜ୍ୟର କଟକ, ଜଗତସିଂହପୁର, କେନ୍ଦ୍ରାପଡ଼ାରେ ୮୦ରୁ ଅଧିକ ବିତରକ ସୃଷ୍ଟି କରାଯାଇ ଏହାର ବିକ୍ରିବଟା ହେଉଛି । ରଥଯାତ୍ରାରେ ଏହା ଭିନ୍ନ ପରିଚୟ ସୃଷ୍ଟି କରି ପାରିଛି । ଏ ବାବଦରେ କଟକ ଓର୍ମାସର କାର୍ଯ୍ୟନିର୍ବାହୀ ଅଧିକାରୀ ଡକ୍ଟର ଶ୍ରୀକାନ୍ତ ପରିଜା କହନ୍ତି³ ୨୦୨୩ କଟକ ବାଲିଯାତ୍ରା ପାଇଁ ଆୟୋଜିତ ପଲ୍ଲୀଶ୍ରୀ ମେଳାରେ ପ୍ରଥମଥର ପାଇଁ ମହିଳା ଗୋଷ୍ଠୀ ତାଙ୍କ ଦ୍ୱାରା ପ୍ରସ୍ତୁତ ଟଙ୍କ ତୋରାଣିର ବିକ୍ରିବଟା ଆରମ୍ଭ କରିଥିଲେ । ପ୍ରତିଦିନ ସେମାନେ ୩୦ରୁ ୪୦ ହଜାର ଲିଟର ଟଙ୍କ ତୋରାଣି ପ୍ୟାକେଜିଂ କରି ବିକ୍ରି କରିଥାନ୍ତି ।
ଏ ବାବଦରେ ଶାନ୍ତି ମହିଳା ଉଦ୍ୟୋଗର କାର୍ଯ୍ୟନିର୍ବାହୀ ନିର୍ଦ୍ଦେଶକ ରୀତାଞ୍ଜଳି ବିଶ୍ୱାଳ କହନ୍ତି³ ଏଥର ରଥଯାତ୍ରାରେ ଆମେ ୫୦ ଲକ୍ଷ ଲିଟର ଟଙ୍କ ତୋରାଣି ବିକ୍ରି ଲକ୍ଷ୍ୟ ରଖିଛୁ । ଏଥିପାଇଁ ୩୦ ଷ୍ଟଲ ପ୍ରସ୍ତୁତ କରାଯାଉଛି । ଓର୍ମାସ୍ର ଯୁଗ୍ମ କାର୍ଯ୍ୟନିର୍ବାହୀ ଅଧିକାରୀ ବିପିନ୍ ବିହାରୀ ରାଉତ କହନ୍ତି³ କରୋନା ମହାମାରୀ ବେଳେ ଭୁବନେଶ୍ୱରସ୍ଥିତ ଅଲ୍ ଇଣ୍ଡିଆ ମେଡିକାଲ ସାଇନ୍ସ (ଏମ୍ସ) ପଖାଳରେ ଆଣ୍ଟିଅକ୍ସିଡାଣ୍ଟ ଏବଂ ପୋଷକତତ୍ତ୍ୱ ଥିବାର ରିପୋର୍ଟ ପ୍ରକାଶ କଲାପରେ ଆମେ ମହିଳା ଉତ୍ପାଦକ ଗୋଷ୍ଠୀଙ୍କୁ ଟଙ୍କ ତୋରାଣି ପ୍ରସ୍ତୁତ କରିବା ଦିଗରେ ତାଲିମ ଦେଲୁ । ପୁଣି ଏହାକୁ କିପରି ପ୍ୟାକେଜିଂ କରି ବିକ୍ରି କରାଯାଇ ପାରିବ ସେ ଦିଗରେ ମଧ୍ୟ ସାହାଯ୍ୟ କଲୁ । ଏଥିପାଇଁ ଓର୍ମାସ ପ୍ରଥମ ପର୍ଯ୍ୟାୟରେ ୨.୪ ଲକ୍ଷ ଟଙ୍କାର ଆର୍ଥିକ ସହାୟତା ପ୍ରଦାନ କରିଛି । ଦ୍ୱିତୀୟ ପର୍ଯ୍ୟାୟରେ ବି ଓର୍ମାସ୍ ସହାୟତାରେ ଗୋଷ୍ଠୀଙ୍କୁ ଅଧିକ ଏକ ଲକ୍ଷ ଟଙ୍କା ମିଳିଛି । ଏହା ବାଦ୍ ଗୋଷ୍ଠୀର ପ୍ରତିଟି ମହିଳା ୫୦୦୦ ଟଙ୍କା ଲେଖାଏଁ ଦେଇଛନ୍ତି ।
ଏ ବାବଦରେ ଶାନ୍ତି ମହିଳା ଉତ୍ପାଦକ ଗୋଷ୍ଠୀର ସମ୍ପାଦକ ସ୍ମୃତିଶ୍ରୀ ବେହୁରିଆ କହନ୍ତି³ ଅରୁଆ ଚାଉଳରୁ ଏହାକୁ ପ୍ରସ୍ତୁତ କରାଯାଉଛି । ବିକ୍ରି ପାଇଁ ଯିବା ପୂର୍ବରୁ ଏହାକୁ ସବୁଥର ଭୁବନେଶ୍ୱର ସ୍ଥିତ କ୍ୱାଲିଟି ଲାବ୍କୁ ପରୀକ୍ଷା ପାଇଁ ଯାଉଛି । ଯେଉଁଥିରେ ପଖାଳରେ ଥିବା ସମସ୍ତ ଉପାଦାନ ଯେପରିକି ଶର୍କରା, ପ୍ରୋଟିନ୍,ଏନର୍ଜି, ସୁଗର, ଭିଟାମିନ୍ ବି୨, ଭିଟାମିନ୍ ବି ୧୨ ଇତ୍ୟାଦିର ପରୀକ୍ଷଣ କରାଯାଉଛି । ଯେହେତୁ ଟଙ୍କପାଣି ଅଧିକ ଦିନ ରହିଲେ ଏହ ମଦରେ ପରିଣତ ହୁଏ ତେଣୁ ଏହାକୁ ସୁରକ୍ଷିତ ରଖିବା ପାଇଁ ଆମେ ଏଥିରେ ଷ୍ଟାବିଲାଇଜର ବ୍ୟବହାର କରୁ ।
ପୂର୍ବରୁ ୧୫ ଲକ୍ଷ ଟଙ୍କା ବ୍ୟୟରେ ଚାଉଳକୁ ସିଝାଇବା ପାଇଁ କେବଳ ଏକ ବଏଲର କିଣାଯାଇଥିଲା । ବାକି ସମସ୍ତ କାମ ହାତରେ କରାଯାଉଥିଲା । ପରେ ଶାନ୍ତି ମହିଳା ଉଦ୍ୟୋଗ ଅଟୋମେଟିକ୍ ମେସିନ୍ ଆଣିଲା । ଏ ବାବଦ ୬୦ ଲକ୍ଷ ଟଙ୍କା ଖର୍ଚ୍ଚ କରାଗଲା । ଏଥିରେ ସଫଳତା ପାଇବା ପରେ ଦେଢ଼ କୋଟି ଟଙ୍କା ଖର୍ଚ୍ଚ କରାଯାଇ ଏହା ଜରିଆରେ ଉତ୍ପାଦନ ବୃଦ୍ଧି କରାଯାଇଛି । ଯେଉଁଥିରେ ଏବେ ପ୍ରତିଦିନ ୨୦ ହଜାର ଲିଟର ଟଙ୍କ ତୋରାଣି ବାହାରୁଛି । ୧୮୦ ମିଲି ଟଙ୍କ ତୋରାଣିର ଦାମ୍ ୧୫ ଟଙ୍କା ଥିବାବେଳେ ୨୫୦ ମିଲି ତୋରାଣିର ଦାମ୍ ୨୦ ଟଙ୍କା ରଖାଯାଇଛି । ଟଙ୍କ ତୋରାଣିର ସଫଳତା ପରେ ଏବେ ମା’ମାନେ କୋଳଥ ପାଣି ବିକ୍ରି କରିବାକୁ ଯୋଜନା ଆରମ୍ଭ କରିଛନ୍ତି ।