କେନ୍ଦୁଝର ସଦର,୫/୭ : ସ୍ୱଳ୍ପ ବୃଷ୍ଟିପାତ ଯୋଗୁଁ ସଦର ବ୍ଲକର ବିଭିନ୍ନ ସ୍ଥାନରେ ଚାଷ କାମ ଆଗେଇ ପାରୁନଥିବା ଦେଖାଯାଉଥିବାବେଳେ କେତକ ସ୍ଥାନରେ ବିଲରେ ଧାନ ତଳି ଗୁଡିକ ପାଣି ଅଭାବରୁ ମାଟିରୁ ଉଠିପାରୁ ନାହିଁ । ତଳି ବିଲ ଗୁଡିକ ଫାଟି ଆଁ କରି ରହିଛି । ସମୟ ଗଡି ଗଡି ଯାଉଥିବାରୁ ଚାଷୀ ହଜାର ହଜାର ଟଙ୍କା ଦେଇ ବିହନ ଆଣି ବିଲରେ ତଳି ପକାଇଛନ୍ତି ମାତ୍ର ସେ ସବୁ ମାଟିରୁ ଉଠିପାରୁ ନାହିଁ । 

ତଥାପି ଚାଷୀ ହାଣ୍ଡି ବାଲ୍ଟି, ଗରିଆ ସାହାଯ୍ୟରେ ଏଣୁ ତେଣୁ ପାଣି ଯୋଗାଡ଼ କରି ତଳି ବିଲରେ ପାଣି ଢାଳୁଛି । ଏ ନେଇ କେତେକ ସ୍ଥାନର ଚାଷୀଙ୍କୁ ପଚାରିବାରୁ କୁହନ୍ତି ଦିନ ଥିଲା ଯାତ୍ରା ପୂର୍ବରୁ ବେଶ କିଛି ଧାନ ରୁଆ କାମ ଚାଲିଥାଏ । ଏ ବର୍ଷ ବର୍ଷା ନାହିଁ ବିଲରେ ଧାନ ତଳି କରିବାକୁ କଷ୍ଟ ହେଉଛି । ବର୍ଷା ଆମର ଚିନ୍ତା ବଢ଼ାଉଛି ଆଷାଢ଼ ସରିବାକୁ ବସିଲାଣି ସେଥିପାଇଁ ଦିନ ରାତି ଆମେ ମୁଣ୍ଡରେ ହାତ ଦେଇ ବସୁଛୁ । ଆମ ଅଞ୍ଚଳରେ ଜଳ ସେଚନ ସୁବିଧା ନାହିଁ । ଯାହା ଦୈବ ଉପରେ ଭରଷା ବୋଲି ଚାଷୀ କହିଛନ୍ତି। ତଳା ତକ ପଡ଼ିବାର ୨୦-୨୫ଦିନ ମଧ୍ୟରେ ରୁଆ ହେବା କଥା ତାହା ବର୍ତ୍ତମାନ ସୁଦ୍ଧା ୧୫ଦିନ ହେଲାଣି ମାଟିରୁ ଉଠି ପାରୁନଥିବାରୁ ଚାଷୀ ମନରେ ଛନକା ଦେଖା ଦେଲାଣି ।