ଖଲ୍ଲିକୋଟ, ୯।୬ ଶ୍ରୀକୃଷ୍ଣ ଶରଣପୁର ଗ୍ରାମରେ ରାଜନୈତିକ ହିଂସାରୁ ଗତ ମାସ ୧୫ ତାରିଖରେ ଘଟିଥିବା ଦିଲ୍ଲୀପ ପାହାନ ହତ୍ୟା ଘଟଣାରେ ପୂର୍ବରୁ ୧୯ ଜଣ ଅଭିଯୁକ୍ତଙ୍କୁ ଗିରଫ କରାଯାଇଛି। ଆଜି ସମିତି ସଭ୍ୟ ରାଜୁ ତରେଇ ଙ୍କୁ ନୟାଗଡ଼ ଜିଲ୍ଲା ଚାନ୍ଦପୁର ନିକଟସ୍ଥ ଏକ ଉପାନ୍ତ ଅଞ୍ଚଳ ରୁ ଗିରଫ କରାଯାଇଥିବା ସୂଚନା ଦେଇଛନ୍ତି ଖଲ୍ଲିକୋଟ ଥାନା ଅଧିକାରୀ ନରେଶ କୁମାର ସାହୁ।

 ଶ୍ରୀ କୃଷ୍ଣ ଶରଣପୁର ସମିତି ସଭ୍ୟ ରାଜୁ ତରେଇଙ୍କୁ ମିଶାଇ ଦିଲ୍ଲୀପ ହତ୍ୟାକାଣ୍ଡ ଘଟଣାରେ ଏ ପର୍ଯ୍ୟନ୍ତ ପୋଲିସ ୨୦ ଜଣଙ୍କୁ ଗିରଫ କରି ସାରିଲାଣି।ଏହି ରାଜନୈତିକ ହତ୍ୟା ଘଟଣାରେ ଆଉ ଦୁଇ ତିନି ଜଣ ଅଭିଯୁକ୍ତଙ୍କୁ ଗିରଫ କରାଯିବ ବୋଲି ଆଇଆଇସି ସୂଚନା ଦେଇଛନ୍ତି। ସମିତି ସଭ୍ୟ ରାଜୁ ତରେଇଙ୍କୁ ଧରିବା ପାଇଁ ଏସଡିପିଓ ଗୌରହରୀ ସାହୁଙ୍କ ନେତୃତ୍ୱରେ ଖଲ୍ଲିକୋଟ ଆଇଆଇସି ନରେଶ କୁମାର ସାହୁ ଙ୍କ ତତ୍ତ୍ଵବଧାନ ରେ ରମ୍ଭା ଆଇଆଇସି ସତ୍ୟବ୍ରତ ଭୂତିଆ ଓ ଏସଆଈଟି ଟିମ ଏବଂ ଅନ୍ୟାନ୍ୟ କର୍ମଚାରୀଙ୍କୁ ନେଇ ଏକ ୧୫ ଜଣିଆ ପୋଲିସ ଟିମ ଗଠନ କରାଯାଇଥିଲା। 

 ଚାନ୍ଦପୁର ନିକଟସ୍ଥ ଏକ ଉପାନ୍ତ ଅଞ୍ଚଳରେ ରାଜୁ ତରେଇ ଥିବା ଖବର ପାଇ ଶନିବାର ବିଳମ୍ବିତ ରାତି ରେ ପୋଲିସ ଟିମ ଚଢ଼ାଉ କରି ରାଜୁକୁ ଗିରଫ କରିଥିଲେ। ଆଜି ସନ୍ଧ୍ୟାରେ ରାଜୁକୁ ଡାକ୍ତରୀ ପରୀକ୍ଷା ପରେ କୋର୍ଟ ଚାଲାଣ କରାଯାଇଥିଲା। ଏସଆଇଟି ଟିମ ଏହି ହାଇ ପ୍ରୋଫାଇଲ ହତ୍ୟା ଘଟଣା ର ତଦନ୍ତ ଜାରି ରଖିଛି।