ମୁମ୍ବାଇ,୨୧/୬:  ଖୁବଶୀଘ୍ର ମୁକ୍ତିଲାଭ କରିବାକୁ ଯାଉଛି  ବହୁ ପ୍ରତିକ୍ଷୀତ ଫିଲ୍ମ 'କଲ୍କି 2898AD' ଏହି ଫିଲ୍ମ ଘୋଷଣା ହେବାଦିନ ଠାରୁ ଫ୍ୟାନ୍ସ ଏହାକୁ ନେଇ ଉତ୍ସାହର ସହ ଅପେକ୍ଷା କରିଛନ୍ତି । ଏଥିରେ ସାଉଥ ସୁପରଷ୍ଟାର ପ୍ରଭାସ, କମଲ ହାସନ, ବଲିଉଡ ସୁପରଷ୍ଟାର ଅମିତାଭ ବଚ୍ଚନ ଏବଂ ଦୀପିକା ପାଦୁକୋନ, ଦିଶା ପାଟାନୀଙ୍କୁ ଦେଖିବାକୁ ମିଳିବ । ନିକଟରେ ଫିଲ୍ମର ଟ୍ରେଲର ରିଲିଜ ହୋଇଥିଲା । ଯାହାକୁ ଫ୍ୟାନ୍ସ ବେଶ ପସନ୍ଦ କରିଥିଲେ । ଏହାରି ମଧ୍ୟରେ ବର୍ତ୍ତମାନ ଫିଲ୍ମ ରିଲିଜକୁ ଆଉ ମାତ୍ର ଏକ ସପ୍ତାହ ବାକି ଥିବା ବେଳେ ନିର୍ମାତା ଫିଲ୍ମର ଏକ ପ୍ରିରିଲିଜ ଇଭେଣ୍ଟ ଆୟୋଜନ କରିଥିଲେ । ଯେଉଁଥିରେ ଫିଲ୍ମର ନିର୍ଦ୍ଦେଶକଙ୍କ ଠାରୁ ଆରମ୍ଭ କରି ଫିଲ୍ମର ସମସ୍ତ କାଷ୍ଟ ଯୋଗ ଦେଇଥିଲେ । ଏହି ସମୟରେ ଦୀପିକା ପାଦୁକୋନଙ୍କୁ ବେବି ବମ୍ପ ଲୁକରେ ଦେଖିବାକୁ ମିଳିଥିବା ବେଳେ ଅମିତାଭ ବଚ୍ଚନ ଫିଲ୍ମର ପ୍ରଥମ ଟିକେଟ କିଣୁଥିବାର ଦେଖିବାକୁ ମିଳିଛି ।

ଖୁବଶୀଘ୍ର ମା' ହେବାକୁ ଯାଉଛନ୍ତି ଦୀପିକା ପାଦୁକୋନ । ତେବେ ଚଳିତ ସେପ୍ଟେମ୍ୱରରେ ଦୀପିକା ସନ୍ତାନ ପ୍ରସବ କରିବେ । ଏନେଇ ସେ ପୂର୍ବରୁ ସୂଚନା ଦେଇଥିବା ବେଳେ ବର୍ତ୍ତମାନ ତାଙ୍କୁ ବେବି ବମ୍ପ ଲୁକ ସହ ଦେଖିବାକୁ ମିଳିଛି । 'କଲ୍କି 2898AD' ର ପ୍ରି-ରିଲିଜ ଇଭେଣ୍ଟରେ ଦୀପିକା ବ୍ଲାକ ରଙ୍ଗର ଆଉଟଫିଟରେ ନଜର ଆସିଥିବା ବେଳେ ବେବି ବମ୍ପ ଲୁକ ଦେଖିବାକୁ ମିଳିଛି । ଏହି ସମୟରେ ପ୍ରବାସଙ୍କ ଠାରୁ ବିଗ ବି ସମସ୍ତ କାଷ୍ଟ ତାଙ୍କର ବିଶେଷ ଯତ୍ନ ନେଇଥିବାର ମଧ୍ୟ ଦେଖିବାକୁ ମିଳିଛି । ଏଥିସହ ଦୀପିକା ନିଜ ଇନଷ୍ଟାଗ୍ରାମରେ ମଧ୍ୟ ବେବି ବମ୍ପ ଲୁକର ଫଟୋ ସେୟାର କରିଛନ୍ତି । ଯାହାକୁ ଦେଖି ଫ୍ୟାନ୍ସ ଦିୱାନା ହେବା ସହ ଦୀପିକାଙ୍କ ପ୍ରଶଂସା କରିଛନ୍ତି । ତେବେ ଗତକାଲି ମୁମ୍ୱାଇରେ 'କଲ୍କି 2898AD'ର ପ୍ରି-ରିଲିଜ ଇଭେଣ୍ଟ ଆୟୋଜିତ ହୋଇଥିଲା । ଏହି ସମୟରେ ଫିଲ୍ମର ପ୍ରଡକ୍ସନ୍ ହାଉସ୍ ବୈଜୟନ୍ତୀ ଚଳଚ୍ଚିତ୍ରର ମୁଖ୍ୟ ଅଶ୍ୱିନ ଦତ୍ତ ମଧ୍ୟ 'କାଲ୍କି 2898 AD'କାର୍ଯ୍ୟକ୍ରମରେ ଯୋଗ ଦେଇଥିଲେ ।