ଖଲ୍ଲିକୋଟ , ୧୬/୦୬ :ଖଲ୍ଲିକୋଟ ନିକଟସ୍ଥ ନିର୍ମଳଝର ଠାରେ କାର ଓ ବାଇକ ମଧ୍ୟରେ ମୁହାଁମୁହିଁ ଧକ୍କା ହେବା ଯୋଗୁଁ ୨ ସାଙ୍ଗଙ୍କ ମୃତ୍ୟୁ ହୋଇଛି। ମୃତକ ୨ ଜଣ ହେଲେ ନିରାକାର ଗୌଡ଼ ଓ ଆଲୋକ ଗୌଡ଼ ।

ଭରସା ଗ୍ରାମ ର ଦୁଇ ସାଙ୍ଗ ନିରାକାର ଗୌଡ଼ ଓ ଆଲୋକ ଗୌଡ଼ ଗୁହାରିଆପାଟ ରୁ ନିଜ ଗ୍ରାମ ଭରସା ଅଭିମୁଖେ ଏକ ବାଇକ ( ନଂ ଓଡି୦୭ଏକେ୭୩୬୭) ଯୋଗେ ଆସୁଥିବା ସମୟରେ ହଠାତ ନିର୍ମଳଝର ମନ୍ଦିର ସମ୍ମୁଖରେ ଏକ କାର (ନଂ. ଓଡି୦୨ଏକ୍ସ୨୨୪୭) ସହିତ ମୁହାଁମୁହିଁ ଧକ୍କା ହୋଇଥିଲା । ଯାହା ଫଳରେ ବାଇକରେ ଥିବା ଦୁଇ ସାଙ୍ଗ ତଳେ ପଡ଼ି ଗୁରୁତର ଆହତ ହୋଇଥିଲେ । ତୁରନ୍ତ ସ୍ଥାନୀୟ ଲୋକେ ଦୁହିଁଙ୍କୁ ଉଦ୍ଧାର କରି ଚିକିତ୍ସା ପାଇଁ ଆମ୍ବୁଲାନ୍ସ ଯୋଗେ ଖଲ୍ଲିକୋଟ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର କୁ ପଠାଇଥିଲେ । କିନ୍ତୁ ମେଡିକାଲରେ ଡାକ୍ତର ଦୁହିଁଙ୍କୁ ମୃତ ଘୋଷଣା କରିଥିଲେ ।ଖବର ପାଇ ପରିବାର ଲୋକେ ମେଡ଼ିକାଲ ରେ ପହଞ୍ଚିବାରୁ ସେଠାରେ ଏକ ଶୋକାକୁଳ ପରିସ୍ଥିତି ସୃଷ୍ଠି ହୋଇଥିଲା । ଅନ୍ୟପଟେ ଖବର ପାଇ ଖଲ୍ଲିକୋଟ ଥାନା ଅଧିକାରୀ ନରେଶ କୁମାର ସାହୁ, ଥାନା ଏସ ଆଇ ପାର୍ଥ ପ୍ରତିମ ଦେବତା, ଏ ଏସ ଆଇ ହରେକୃଷ୍ଣ ସାମଲ ମେଡ଼ିକାଲରେ ପହଞ୍ଚି ଶବକୁ ଜବତ କରିବା ସହ ଦୁର୍ଘଟଣା ସ୍ଥଳରେ ପହଂଚି କାର ଓ ବାଇକ କୁ ଜବତ କରି ଘଟଣାର ତଦନ୍ତ ଚଳାଇଥିବା ଦେଖିବାକୁ ମିଳିଛି ।