ବ୍ରହ୍ମପୁର,୨୦/୦୬: ଏମ୍କେସିଜି ମେଡିକାଲ କଲେଜ ଓ ହସ୍ପିଟାଲରେ ଚିକିତ୍ସାଧୀନ ଆଉ ଜଣେ ଡିପ୍ଥେରିଆ (କଣ୍ଠ ଆଳତି) ଶିଶୁ ରୋଗୀଙ୍କ ମୃତ୍ୟୁ ହୋଇଛି । ମୃତକ ଦୀପୁନ୍ ମେଲେକା(୧୦) । ଘର କୋରାପୁଟ ଜିଲ୍ଲା ବନ୍ଧୁଗାଁ ବ୍ଲକ୍ କୁମ୍ଭାରୀପୁଟ ଅଞ୍ଚଳର ବୋଲି ଡାକ୍ତରଖାନା ପକ୍ଷରୁ ସୂଚନା ମିଳିଛି ।
ଶିଶୁ ବିଭାଗରେ ଅଧୀନରେ ଥିବା ଏଚ୍ଡିୟୁ(ହାଇ ଡିପେଡେନ୍ସି ୟୁନିଟ୍)ରେ ଦୀପୁନ୍ ଚିକିତ୍ସିତ ହେଉଥିଲେ । ସେ ଗୁରୁତର ଥିବାବେଳେ କୋରାପୁଟରୁ ତାଙ୍କୁ ରାୟଗଡ଼ା ଅଣାଯାଇଥିଲା । ଏହାପରେ ସେଠାରୁ ଏମ୍କେସିଜି ସ୍ଥାନାନ୍ତର କରାଯାଇଥିଲା । ପ୍ରଥମେ ପ୍ରତିଶେଧକ ଇଞ୍ଜେକସନ୍ ସହ ଟିକା (ଜୀବାଣୁ ନାଶକ) ଦେଇ ଚିକିତ୍ସା ଚାଲିଥିଲା ।
ଏମ୍କେସିଜି ଶିଶୁ ବିଭାଗରେ ମୋଟ ୪ ଜଣ ଡିପେ୍ଥରିଆ ଆକ୍ରାନ୍ତ ଶିଶୁ ଭର୍ତ୍ତି ହୋଇଥିଲେ । ସେମାନଙ୍କ ମଧ୍ୟରୁ ୩ ଜଣଙ୍କ ସ୍ଥାସ୍ଥ୍ୟ ଅବସ୍ଥା ଧୀରେଧୀରେ ସୁଧୁରୁଥିବା ଡାକ୍ତର କହିଛନ୍ତି । ଆକ୍ରନ୍ତଙ୍କ ମଧ୍ୟରୁ ଶିଶୁ ବିଭାଗରେ ଅଧୀନରେ ଏଚ୍ଡିୟୁରେ ଚିକିତ୍ସିତ ଦୀପୁନଙ୍କ ମୃତ୍ୟୁ ହୋଇଛି । ଦୀପୁନଙ୍କ ମୃତ୍ୟୁ ପରେ ଡିପ୍ଥେରିଆରେ ମୃତ୍ୟୁ ସଂଖ୍ୟା ୬କୁ ବୃଦ୍ଧି ପାଇଛି ।
ଗତ ୧୨ ତାରିଖରୁ ୧୭ ତାରିଖ ମଧ୍ୟରେ ରାୟଗଡ଼ା ଓ କୋରାପୁଟ ଜିଲ୍ଲା ମୁଖ୍ୟ ଚିକିତ୍ସାଳୟରୁ ଏମ୍କେସିଜିକୁ ୫ ଜଣ ଶିଶୁ ରେଫର୍ ହୋଇଥିଲେ । ଆକ୍ରାନ୍ତଙ୍କ ବୟସ ୪ରୁ ୧୨ ବର୍ଷ ମଧ୍ୟରେ ରହିଛି । ଡିପେ୍ଥରିଆ ରୋଗୀଙ୍କ ଚିକିତ୍ସା ପାଇଁ ଶିଶୁ ରୋଗ ବିଭାଗ ଅଧୀନରେ ସ୍ୱତନ୍ତ୍ର ସଙ୍ଗରୋଧ କକ୍ଷ କରାଯାଇଛି । ସେଠାରେ ୩ ଜଣ ଆକ୍ରାନ୍ତ ଶିଶୁ ଚିକିତ୍ସାଧୀନ ଅଛନ୍ତି ।
ସୂଚନାଯୋଗ୍ୟ, ସପ୍ତାହକ ମଧ୍ୟରେ ଏମ୍କେସିଜିରେ ଶିଶୁ ଦୀପୁନଙ୍କୁ ମିଶାଇ ଦୁଇ ଜଣଙ୍କ ମୃତ୍ୟୁ ହେଲାଣି । ଗତ ୧୨ ତାରିଖରେ ରାୟଗଡ଼ା ଜିଲ୍ଲାରୁ ଜଣେ ଡିପ୍ଥେରିଆ ରୋଗୀଙ୍କ ମଧ୍ୟ ମୃତ୍ୟୁ ହୋଇଥିଲା । ଏବେ ଆଉ ୩ ଜଣ ରୋଗୀ ଏଠାରେ ଚିକିତ୍ସାଧୀନ ଥିବା ଶିଶୁ ବିଭାଗ ମୁଖ୍ୟ ନରେନ୍ଦ୍ର ବେହେରା କହିଛନ୍ତି ।