ଛତ୍ରପୁର, ୨୦/୦୬ : ଛତ୍ରପୁର ବ୍ଲକ ଆର୍ଯ୍ୟପଲ୍ଲୀ ସମୁଦ୍ରରେ ବୁଡି ଡିପ୍ଲୋମା ଛାତ୍ର ନିଖୋଜ ଘଟଣା। ଉଦ୍ଧାର କାର୍ଯ୍ୟରେ ତଟରକ୍ଷା ବାହିନୀର ହେଲିକପ୍ଟର ନିୟୋଜିତ। ଆକାଶମାର୍ଗରୁ ହେଲିକପ୍ଟର ନିୟୋଜିତ ହୋଇଥିବା ବେଳେ ସମୁଦ୍ର ମଧ୍ୟରେ ଏକ ଲଞ୍ଚ୍ କାର୍ଯ୍ୟରେ ଲାଗିଛି। ବର୍ତ୍ତମାନ ସୁଦ୍ଧା ଉକ୍ତ ଛାତ୍ରର ପତ୍ତା ମିଳିନାହିଁ।
ସୂଚନାନୁଯାୟୀ, କେ. ଆର୍ଯ୍ୟପଲ୍ଲୀ ଗ୍ରାମର ଡିପ୍ଲୋମା ଛାତ୍ର ହେମନ ସେନ ବେହେରା (୨୨ ବର୍ଷ) ବୁଧବାର ଅପରାହ୍ନରେ ୪ ରୁ ୫ ଜଣ ସାଙ୍ଗଙ୍କ ସହ ଆର୍ଯ୍ୟପଲ୍ଲୀ ସମୁଦ୍ରକୁ ଗାଧୋଇବାକୁ ଆସିଥିଲେ। ଉଚ୍ଚ ଜୁଆର ହେଉଥିବାରୁ ଗାଧୋଇବା ବେଳେ ହେମନ ପାଣିରେ ଭାସି ଯାଇଥିଲେ। ତେବେ ତାଙ୍କର ଅନ୍ୟ ସାଙ୍ଗମାନେ ଏଥିରୁ ବର୍ତ୍ତ ଯାଇଥିଲେ। ଘଟଣାର ଖବରପାଇ ଜ଼ିଲ୍ଲାପାଳ ଦିବ୍ୟ ଜ୍ୟୋତି ପରିଡା ଅତିରିକ୍ତ ଜ଼ିଲ୍ଲାପାଳ ରାଜସ୍ୱ ଦେବବ୍ରତ ସାହୁ, ଉପଜିଲ୍ଲାପାଳ, ଛତ୍ରପୁର ତହସିଲଦାର, ଛତ୍ରପୁର ଏସଡିପିଓ ଗୌରହରି ସାହୁ ପହଞ୍ଚି ସ୍ଥିତି ଉପରେ ନଜର ରଖିଛନ୍ତି। ଘଟଣାସ୍ଥଳରେ ଆର୍ଯ୍ୟପଲ୍ଲୀ ଥାନା ଅଧିକାରୀ ବିଦ୍ୟା ଭାରତୀ ନାୟକଙ୍କ ସମେତ ଅଗ୍ନିଶମ ବାହିନୀ, ଓଡ୍ରାଫ୍, ପୁଲିସ, ଓ ତଟସୁରକ୍ଷା ବାହିନୀ ପହଞ୍ଚି ଉଦ୍ଧାର କାର୍ଯ୍ୟ ଜାରି ରଖିଛନ୍ତି। ଗ୍ରାମବାସୀମାନେ ମଧ୍ୟ ଉପସ୍ଥିତ ରହି ସନ୍ଧାନ ଜାରି ରଖିଛନ୍ତି। ସୂଚନାଯୋଗ୍ୟ, କିଛି ମାସ ତଳେ ଏଠାରେ ଦୁଇ ଝିଅ ବୁଡିଯାଇ ପ୍ରାଣ ହରାଇଥିଲେ।