କଟକ,୨୭/୦୬: ମାଟ୍ରିକ୍ ପରୀକ୍ଷାରେ କୃତକାର୍ଯ୍ୟ ହୋଇଥିବା ଛାତ୍ରଛାତ୍ରୀମାନେ ପୂର୍ବରୁ ଅନ୍ଲାଇନ୍ ସାର୍ଟିଫିକେଟ୍ ପାଇସାରିଛନ୍ତି । ଏବେ ମାଧ୍ୟମିକ ଶିକ୍ଷା ପରିଷଦ ତରଫରୁ ସାର୍ଟିଫିକେଟ୍ କପି ଛାତ୍ରଛାତ୍ରୀଙ୍କୁ ପ୍ରଦାନ କରାଯିବ । ଆସନ୍ତା ଜୁଲାଇ ୯ରେ ବିଭିନ୍ନ ଜିଲ୍ଲାରେ ବୋର୍ଡ ତରଫରୁ ନିର୍ଦ୍ଦେଶିତ ସ୍ଥାନରେ ସାର୍ଟିଫିକେଟ୍ ଦିଆଯିବାକୁ ବ୍ୟବସ୍ଥା କରାଯାଇଛି । ଜିଲ୍ଲା ଶିକ୍ଷା ଅଧିକାରୀ (ଡିଇଓ)ମାନେ ଜିଲ୍ଲା ସ୍ତରରେ ଏହି ବ୍ୟବସ୍ଥାର ନିରୀକ୍ଷଣ କରିବେ ।
ଛାତ୍ରଛାତ୍ରୀମାନେ କିଭଳି ଶୃଙ୍ଖଳିତ ଢଙ୍ଗରେ ସାର୍ଟିଫିକେଟ୍ ପାଇପାରିବେ ସେଥିପାଇଁ ଡିଇଓ ନିଜେ ଉପସ୍ଥିତ ରହି ବଣ୍ଟନ କାର୍ଯ୍ୟ ପରିଚାଳନା କରିବେ ବୋଲି ବୋର୍ଡ ତରଫରୁ କୁହାଯାଇଛି । ଏଥିଲାଗି ଜିଲ୍ଲାସ୍ତରରୁ ଆସନ୍ତା ଜୁଲାଇ ୨ ଓ ୩ ତାରିଖ ଦୁଇଦିନ ମଧ୍ୟରେ ସାର୍ଟିଫିକେଟ୍ ଗ୍ରହଣ ପରେ ୯ ତାରିଖ ବଣ୍ଟନ କରିବେ । ଯଦି ୯ ତାରିଖ ସାର୍ଟିଫିକେଟ୍ ବଳକା ରହିଯାଏ, ୧୦ ତାରିଖ ସମସ୍ତ ସାର୍ଟିଫିକେଟ୍କୁ ବଣ୍ଟନ କରିବାକୁ ନିର୍ଦ୍ଦେଶ ଦିଆଯାଇଛି ।
ଯଦି ସାର୍ଟିଫିକେଟ୍ରେ କୌଣସି ତ୍ରୁଟି ରହିଥାଏ, ସଂଶୋଧନ ଲାଗି ଜୁଲାଇ ୧୨ ରୁ ୨୨ ତାରିଖ ପର୍ଯ୍ୟନ୍ତ ଆବେଦନ କରାଯିବ । ଏସ୍ଥିତିରେ ପୁନର୍ବାର ପ୍ରିଣ୍ଟ୍ ଖର୍ଚ୍ଚ ଆବେଦନକାରୀ ଛାତ୍ରଛାତ୍ରୀଙ୍କ ସ୍କୁଲ୍ ବହନ କରିବ ବୋଲି ବୋର୍ଡ ତରଫରୁ ସ୍ପଷ୍ଟ କରାଯାଇଛି ।