ଭୁବନେଶ୍ଵର, ୨୯/୦୬ : ରାଜ୍ୟରେ ଦୁର୍ନୀତି ରୋକିବାକୁ ଆକ୍ସନ ମୋଡ୍ରେ ମୋହନ ସରକାର। ଏଣିକି ଧାନ ମଣ୍ଡିରେ ଲାଗିବ ସିସିଟିଭି। ସେହିପରି ମଣ୍ଡିରୁ ଧାନ ନେଇ ଯାଉଥିବା ଗାଡିରେ ଲାଗିବ ଜିପିଏସ୍। ଏହାଦ୍ଵାରା ଧାନ ମିଲର ପାଖକୁ ଯାଉଛି ନା ବାଟମାରଣା ହେଉଛି ତାହା ଜଣାପଡ଼ିବ। ସେହିପରି ସିସିଟିଭି ମାଧ୍ୟମରେ ମଣ୍ଡିରେ ଚାଲିଥିବା କାର୍ଯ୍ୟକୁ ତଦାରଖ କରାଯିବ। ଏନେଇ ବିଭାଗୀୟ ଅଧିକାରୀଙ୍କୁ ନିର୍ଦ୍ଦେଶ ଦିଆଯାଇଛି। ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ମନ୍ତ୍ରୀ କୃଷ୍ଣଚନ୍ଦ୍ର ପାତ୍ର ଏନେଇ ସୂଚନା ଦେଇଛନ୍ତି।
ଖାଉଟି କଲ୍ୟାଣ ମନ୍ତ୍ରୀ କହିଛନ୍ତି ଯେ, ଆସନ୍ତା ୨ ମାସ ମଧ୍ୟରେ ଏହି ପ୍ଲାନ କାର୍ଯ୍ୟକାରୀ ହେବ। ଲିଫ୍ଟିଂ ତ୍ଵରାନ୍ଵିତ ହେବ। ଯାହାଫଳରେ ମଣ୍ଡିରେ କୃଷକମାନେ ଦୀର୍ଘ ସମୟ ପର୍ଯ୍ୟନ୍ତ ଅପେକ୍ଷା କରିବେ ନାହିଁ। କଟନୀ ଛଟନୀ ନକରିବାକୁ ବନ୍ଦୋବସ୍ତ କରାଯିବ। କାର୍ଯ୍ୟରେ ଅବହେଳା କଲେ ତୁରନ୍ତ କାର୍ଯ୍ୟାନୁଷ୍ଠାନ ନିଆଯିବ।