କୋରାପୁଟ, ୨୯/୦୬ : ପିଲାଙ୍କ ଭବିଷ୍ୟତ ସହ ଖେଳ। ସ୍କୁଲରେ ପିଲାଙ୍କୁ ଶ୍ରମିକ ଭଳି କାମ କରାଇଲେ ଶିକ୍ଷକ। କୋରାପୁଟ ଜିଲ୍ଲା ପଟାଙ୍ଗୀ ବ୍ଲକ ରାଲେଗଡ଼ା ସରକାରୀ ଉଚ୍ଚ ବିଦ୍ୟାଳୟରେ ଦେଖିବାକୁ ମିଳିଛି ଏଭଳି ଚିତ୍ର। ସ୍କୁଲରେ ଶିକ୍ଷକ ପିଲାମାନଙ୍କୁ କାମ କରାଉଥିବା ବେଳର ଏକ ଭିଡିଓ ଏବେ ଭାଇରାଲ୍ ହେବାରେ ଲାଗିଛି। ଘଟଣାର ତଦନ୍ତ ପାଇଁ ଜିଲ୍ଲାପାଳ ଭି କିର୍ତ୍ତି ଭାସନ ଜିଲ୍ଲା ଶିକ୍ଷା ବିଭାଗକୁ ଚିଠି ଲେଖିଛନ୍ତି।
ସୂଚନାନୁଯାୟୀ, ରାଲେଗଡ଼ା ସରକାରୀ ଉଚ୍ଚ ବିଦ୍ୟାଳୟ ପରିସରରେ କିଛି ଛାତ୍ର ୟୁନିଫର୍ମରେ କାମ କରୁଥିବା ଦେଖିବାକୁ ମିଳିଛି। ଶିକ୍ଷକ ଶିକ୍ଷୟିତ୍ରୀଙ୍କ ଉପସ୍ଥିତିରେ ପିଲାମାନେ ହାତରେ କୋଦାଳ, କୁରାଢୀ ଧରି କାମ କରୁଛନ୍ତି। ତେବେ ପାଠ ପଢା ସମୟରେ ସାର୍ମାନେ ଏହି ଛାତ୍ରମାନଙ୍କୁ କାହିଁକି କାମ କରାଉଛନ୍ତି ତାହାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଏହି ଭିଡିଓ ଭାଇରାଲ୍ ହେବାପରେ ଜିଲ୍ଲାପାଳ ଭି କିର୍ତ୍ତି ଭାସନ ଜିଲ୍ଲା ଶିକ୍ଷା ବିଭାଗକୁ ଚିଠି ଲେଖିଛନ୍ତି। ତଦନ୍ତ ପରେ ଦୃଢ଼ କାର୍ଯ୍ୟନୁଷ୍ଠାନ ଗ୍ରହଣ କରାଯିବ ଜିଲ୍ଲା ଅତିରିକ୍ତ ଶିକ୍ଷା ଅଧିକାରୀ ଅର୍ପିତା ପ୍ରଧାନ କହିଛନ୍ତି।