ସମ୍ବଲପୁର,୦୧/୦୭: ମାତୃତ୍ୱ । ଆବେଗ, ଆଦର ଓ ଆତୁରତାର ଆଶୀର୍ବାଦଟିଏ । ଛୁଆ ପାଇଁ ସାରା ଦୁନିଆ ସହ ଲଢ଼ିପାରୁଥିବା ଆୟୁଧଟିଏ । ନିଜଠୁ ବେଶୀ ସନ୍ତାନ କଥା ଭାବୁଥିବା ମୂର୍ତ୍ତିମନ୍ତ ପ୍ରତୀକଟିଏ । ମଣିଷ ହେଉ କି ପଶୁ ସବୁଠି ମା’ ମନରୁ ଝରିପଡ଼େ ମମତା । ଯେଉଁଠି ମଣିଷ ହାରି ଯାଏ ସେଠି ମମତା ଜିତେ । ଯେଉଁଠି ବାହୁବଳକାଟୁ କରେନି ସେଠି ମମତା ଡୋରି ଟାଣିନିଏ । ମାତୃତ୍ୱ ମମତା ଓ ମାନବିକତାର ଏଭଳି ଏକ ମହାର୍ଘ୍ୟ ସଙ୍ଗମ ଦେଖିବାକୁ ମିଳିଥିଲା ସମ୍ବଲପୁର ସହରର ଅଶୋକା ଟକିଜ୍ଠାରେ ।
ରବିବାର । ସମୟ ଅପରାହ୍ନ ସାଢ଼େ ୧ । ସଦ୍ୟ ପ୍ରସବା ଗାଈଟିଏ ନବଜାତ ବାଛୁରି ପଛରେ ଧାଉଁଥିଲା । ବାଛୁରିକୁ ଧରି ୨ ଜଣ ବାଇକ୍ରେ ବୋହି ନେଉଥିଲେ ।ବାଇକ୍ ବେଗ ସହ ଖୁରାମିଶାଇ ଦୌଡୁଥିଲା ଅସୁସ୍ଥ ଗାଈ । ମମତାର ଅଦୃଶ୍ୟ ଡୋରି ବାନ୍ଧି ଗାଈକୁ ଚିକିତ୍ସାଳୟ ପର୍ଯ୍ୟନ୍ତ ନେବାକୁ ବିଛା ଯାଇଥିବା ମିଠା ମାୟାଜାଲ ଫସିଯାଇଥିଲା ମା’ । ଚିକିତ୍ସା ପାଇଁ ଧରା ଛୁଆଁ ଦେଉନଥିବା ଅବୋଲକରା ଗାଈ ଶେଷରେ ମା’ ହେବା ପରେ ଛୁଆକୁ ଅନୁସରଣ କରିକରି ଅଜାଣତରେ ଚିକିତ୍ସାଳୟ ପର୍ଯ୍ୟନ୍ତ ପହଞ୍ଚିଯାଇଥିଲା ।
ଅଶୋକା ଟକିଜ ନିକଟରେ ଏହି ଗାଈର ମାଲିକଙ୍କ ଘର । କିଛି ଦିନ ହେଲା ଗାଈଟି ମାଲିକଙ୍କୁ ଧରାଛୁଆଁ ଦେଉନଥିଲା । ଗାଈର ଶରୀର ଅସୁସ୍ଥ ଥିବା ଜାଣି ତାକୁ ପଶୁ ଡାକ୍ତରଙ୍କୁ ଦେଖାଇବାକୁ ମାଲିକ ଶତ ଚେଷ୍ଟା କରିଥିଲେ । ହେଲେ ଗାଈର ଜିଦ୍ ଆଗରେ ମାଲିକଙ୍କର ଶତ ଚେଷ୍ଟା ବିଫଳ ହୋଇଥିଲା । ଯେତେ ବାହୁବଳ ଓ ବୁଦ୍ଧିବଳ ଲଗାଇଲେ ବି ଗାଈକୁ ନେଇ ଡାକ୍ତରଖାନା ପର୍ଯ୍ୟନ୍ତ ପହଞ୍ଚିପାରିନଥିଲେ । ଅମାନିଆ ଅନ୍ତସ୍ୱତ୍ତ୍ୱା ଗାଈ ସେମିତି ବାହାରେ ବୁଲୁଥିଲା । ମାଲିକ ନିରାଶ ହୋଇ ଘରକୁ ଫେରିଥିଲେ ।
କିନ୍ତୁ ଗତ ୨ ଦିନ ତଳେ ଗାଈଟି ଏକ ବାଛୁରି ଜନ୍ମ କରିଥିବା ଜାଣିବାକୁ ପାଇଥିଲେ । ଗାଈକୁ ଡାକ୍ତରଖାନା ପର୍ଯ୍ୟନ୍ତ ପହଞ୍ଚାଇବାକୁ କଅଁଳା ବାଛୁରିକୁ ସେ ଅସ୍ତ୍ର କରିଥିଲେ । ମା’ ଗାଈକୁ ସିନା ଟେକି ଡାକ୍ତରଖାନା ପର୍ଯ୍ୟନ୍ତ ନେଇ ପାରିଲେନି । ହେଲେ ନବଜାତ ବାଛୁରିକୁ ତ ଟେକି ପାରିବେ । ଛୁଆକୁ ଛାଡ଼ି ମା’ ରହିପାରିବନି, ପିଛା କରି ଆପେ ଚାଲି ଆସିବ । ଏହା ଚିନ୍ତା କରି ସେ ବାଛୁରିଟିକୁ ବାଇକ୍ରେ ଧରି ଉଠାଇ ନେଇଥିଲେ । ଛୁଆକୁ ବାଇକ୍ରେ କିଏ ନେଉଯାଉଥିବାର ଦେଖି ମା’ ମଧ୍ୟ ପଛରେ ଦଉଡ଼ିଥିଲା । ଆଗପଛ ଭଲମନ୍ଦ ବାଛବିଚାର ନ କରି ଛୁଆକୁ ଫେରାଇ ଆଣିବାକୁ ଆପ୍ରାଣ ଉଦ୍ୟମ କରିଥିଲା । ‘ମୋ ଛୁଆକୁ କୁଆଡ଼େ ନେଉଛ? ଏଇ ଦୁଇ ଦିନ ହେଲା ସେ ଜନ୍ମ ହୋଇଛି । ମୋ କ୍ଷୀର ନ ଖାଇଲେ ସେ ବଞ୍ଚିବନି । ଭାରି କଷ୍ଟରେ ତାକୁ ମୁଁ ଜନ୍ମ କରିଛି । ତାକୁ ମୋ ପାଖରୁ ଦୂରେଇ ନିଅନି’ ଏମିତି ଅନେକ ଅକୁହା କଥା ବୋଧେ ମା’ ଗାଈ କହୁଥିଲା । ଏସବୁ ଶବ୍ଦକୁ ମଣିଷ ଶୁଣି ପାରୁନଥିଲା, ହେଲେ ବାଛୁରି ପଛରେ ବିକଳରେ ଦୌଡ଼ୁଥିବା ମା ମୁହଁରୁ ଏହି ସବୁ ଅକୁହା ବେଦନାକୁ ସ୍ପଷ୍ଟ ବାରି ହେଉଥିଲା । ସେଠାରେ ଉପସ୍ଥିତ ଥିବା ପ୍ରତ୍ୟେକ ଲୋକଙ୍କ ନଜର ଏହି ମା’-ଛୁଆଙ୍କ ନିକଟରେ ଅଟକି ରହିଥିଲା ।
ମଣିଷ ବିଛେଇଥିବା ଏହି ମିଠା ମାୟାଜାଲରେ ମାତୃତ୍ୱ କେତେବେଳେ ଫସି ସାରିଥିଲା ଏକଥା ତ ଗାଈ ଜାଣିନଥିଲା । ମରିଚିକା ପଛରେ ଧାଇଁଧାଇଁ ସତରେ ଯେ କେତେବେଳେ ତୃଷ୍ଣା ମେଣ୍ଟିଯାଏ ଏହାର ଅନୁଭବ ପ୍ରଦାନ କରିଥିଲା ଏହି ସ୍ନେହମୟୀ ସଦ୍ୟ ପ୍ରସବା । ଶେଷରେ ମାଲିକଙ୍କ ପ୍ରୟାସ ସଫଳ ହେଲା । ଅବୋଲକରା ଗାଈ ମମତା ଜାଲରେ ବାନ୍ଧି ହୋଇ ଡାକ୍ତରଖାନାରେ ପହଞ୍ଚିଗଲା । ତା’ର ଚିକିତ୍ସା ମଧ୍ୟ ହେଲା । ସବୁ ପଛରେ ଏହି ନିରୀହ ଜୀବ ଛାଡ଼ି ଦେଇଗଲା ମା’-ମାତୃତ୍ୱ ଓ ମମତାର ଏକ ବୃହତ୍ ବାର୍ତ୍ତା
