ବଲାଙ୍ଗିର,୦୧/୦୭: ବଲାଙ୍ଗିର ଜେଲ୍ରେ ଥିବା ଡି-ବ୍ରଦର୍ସ ଗ୍ୟାଙ୍ଗର ସୁଶାନ୍ତ ଧଳସାମନ୍ତ ଆଖିକୁ ଭଲ ଭାବେ ଦେଖାଯାଉନାହିଁ । ବାମ ଆଖିର ଚିକିତ୍ସା ପାଇଁ ସୁଶାନ୍ତକୁ ରବିବାର ଅପରାହ୍ନରେ ଭୁବନେଶ୍ୱରସ୍ଥିତ ଏକ ଘରୋଇ ଚକ୍ଷୁ ଚିକିତ୍ସାଳୟକୁ ରେଫର କରାଯାଇଛି । ଗତ ୬ମାସ ହେଲା ସେ ବଲାଙ୍ଗିର ଜେଲ୍ ଓ ବିବିଏମସିଏଚରେ ଆଖି ଚିକିତ୍ସା କରାଉଥିଲା । ପୂର୍ବାହ୍ନରେ ହଠାତ ସୁଶାନ୍ତର ଦୃଷ୍ଟିଶକ୍ତି ଅସ୍ପଷ୍ଟ ହୋଇଯାଇଥିଲା । ଜେଲ୍ କର୍ତ୍ତୃପକ୍ଷ ତୁରନ୍ତ ବିବିଏମସିଏଚ୍ ଚକ୍ଷୁ ବିଭାଗକୁ ନେଇ ଯାଞ୍ଚ କରାଇଥିଲେ । ଉଚ୍ଚତର ଚିକିତ୍ସା ଆବଶ୍ୟକ ବୋଲି ଡାକ୍ତର ପରାମର୍ଶ ଦେବାପରେ କଡ଼ା ସୁରକ୍ଷା ବଳୟରେ ସୁଶାନ୍ତକୁ ଭୁବନେଶ୍ୱର ନିଆଯାଇଥିବା ଜଣେ ବରିଷ୍ଠ ଅଧିକାରୀ କହିଛନ୍ତି ।
ସୂଚନାଯୋଗ୍ୟ, ୨୦୧୮ ମାର୍ଚ୍ଚରେ ଭୁବନେଶ୍ୱର ଝାରପଡ଼ା ଜେଲରେ ଥିବା ସୁଶାନ୍ତକୁ ସୁରକ୍ଷାଗତ କାରଣରୁ ବଲାଙ୍ଗିର ଜିଲ୍ଲା କାରାଗାରକୁ ଅଣାଯାଇଥିଲା । ସୁଶାନ୍ତ ଝାରପଡ଼ା ଜେଲ୍ରେ ଥାଇ ବାହାରର ଅପରାଧିକ କାର୍ଯ୍ୟକଳାପ ନିୟନ୍ତ୍ରଣ କରୁଥିବା ନେଇ ଅଭିଯୋଗ ହୋଇଥିଲା